Matayo 7
7
1Mi kota tavo ko, a kotaro tavo amidre ko. 2Ado tavo tai ya mi dre tavo tale dise, a kota tavo amidre: ado nga ya nga tibizo di mi adre nga tibi asa, a kotibi nga amidre asa. 3Mi kono fa camva di adrelepi ami adrupini mikisi a di adose ya, fa lalale di adrelepi ami tandini mikisi a di dre tušuzo ko? 4Mi ta ami adrupidre angini ya, ki di, Mi ko o ma kape fa ca di ami mikisi ase, mi no ka, fa lalale di dre adrezo ami tandini mikisi a? 5Mi dia togo iri dii, dridri mi kape fa lalale di ami tandini mikisi ase: velero mi kono geagea fa ca di ape ami adrupini mikisi ase.
6Mi kofe nga lolo di kokiadre ko, mi kode ami lulu kezia kandra ko, ngale aii to lulu pase, dre alazo ami loa.
7Mi kozi, i dre fezo amidre; mi konda, mi dre kusuzo: mi koga, a konji amidre: 8dia angodi ya nga zilepi di dre dole dise; akodi nga ndalepi di dre kusuzo; i dre njizo dia galepi di dre. 9Ago angodi ya amiki ketona, akodi, ai mva zi ai ti ambatase di, kofe kiramva adidre; 10Adi zi akodi ti kosiase di, kofe ni adidre? 11Mi adrelepi konji dii ni nga tani fele amiki anjiadre di, amba tai nidi amiki Ata buna di kadre nga tani dii fe dia i ti zilepi di dre ko ya? 12Tandu nidise, tai titi mi dre lele mundia o amidre dii, mi ko’o aiidre indi: tai nidi torati e, nabikia tai e dise.
13Mi kosi lovotini camva di ase: lovotini, lati be lilepi vo dia tizale di na di dre adrele wawa dise, dia poya dre sizo asa. 14Lovotini, lati be lilepi lidri na di dre adrele boroboro dise, mundia lati nidi kusulepi dii adre ca.
15Mi kolama tai nabi kinzoro alilepi ami vuna kabilikia kini na diise, aii dre adrezo mangili nga dolepi dii be aii lena. 16Mi koni aii aiiki lo’wase. Mundia ki lo’wa kuci ase ya? Mundia ki malobi gora ase ya? 17Ngoro nitini fa tani o̱ei dii a lo’wa tani di: fa kujikuji di dre lo’wa konji di ’azo. 18Fa tani di kicoa fa lo’wa konji di a ko, fa kujikuji di kicoa fa lo’wa tani di a ko. 19A ga fa o̱ei fa alepi tani ko dii, dre bezo aci a. 20Tandu nidise mi koni aii aiiki lo’wase. 21Mundia o̱ei talepi, Miri, Miri, madre dii, kosi mataya bu adea na di ko; akodi ta olepi ngoro ama Ata buna di dre lele di tini di kosi mataya bu adea na. 22Kitu nadise mundia bi kota madre, ki di, Miri, Miri, ama fe mando tai ami ruse dre ko ya? dre teri konji dii ladrozo ami ruse ko ya? dre tai murungu dii ozo ami ruse ko ya? 23Ma dre tazo aiidre, ki di, Ma ni ami dre tejia ko: mi koli ma vulese, mi takonji olepi dii. 24Tandu nidise, dia angodi ya tai mana nii dii yilepi di, olepi di, adre ago togi be tini, ai jo šilepi kiradre di tini: 25Kozia dre dizo, tai yi dre tizo di acazo, lia dre vizo, dre jo nadi coazo, jo dre dezo ko: i dre buna dile kira dre sile sisi dise. 26Dia angodi ya tai mana nii dii yilepi di dre ozo ko, adre ago azaza ai jo silepi siña dre di tini: 27Kozia dre dizo, tai yi dre tizo di acazo, lia dre vizo, dre jo nadi coazo, jo dre dezo: tai jo dre dezo di dre adrezo murungu.
28Kadre nitini, Yesu ko’o tai nii akele di, dia lezolepi diiki lindri gaga ai ta tadale dise: 29adi dre ta tadale aiidre ngoro dia mi lanjilanji di tini dise, dia aiiki ta‐tisilepi dii tini ko.
Markert nå:
Matayo 7: LOG
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
first printed by the British and Foreign Bible Society in 1924 and 1927.
