Mattheos 6
6
1Wicaśta itokam ihnuhan taku ituyaḣanpi kinhan, wanniyakapi kta heon; hecen ecanonpi kinhan Niyatepi maḣpiya ekta un kin he takudan nic̣upi kte śni.
2Heon etanhan tohan taku wicayaqu kta hecinhan nitokam cotanka yajowicayakiye kte śni, wanaic̣iḣmanpi kin omniciye tipi qa canku ohna econpi ece kin iyececa, wicaśta on wicayatanpi kte cin heon; awicakehan heciciyapi; Hena wokajuju hduhapi ece.
3Tuka niye taku wicayaqu eca ninape etapa taku econ kin he nicatka sdonye kte śni.
4Hecen wawicayaqu kin he naḣmana un kta; qa Niyatepi taku naḣmana un kin wanynku ece kin he iye taninyan nicicajuju kta.
5Qa tohan ceyakiya eca wanaic̣iḣmanpi kin iyenicece kte śni; hena eqe omniciye tipi qa canku oise kin en najin cekiyapi waśtedakapi ece, wicaśta wanwicayakapi kta e heon; awicakehan heciciyapi; Hena wokajuju hduhapi ece.
6Tuka niye qe ceyakiye cinhan, tipi cistinna nitawa kin en timahen yakiyahde c̣a tiyopa ecen iyacu kinhan, hehan Niyate naḣmana un kin he cekiya wo, qa Niyate naḣmana wawanyaka ece kin he taninyan nicicajuju kta.
7Ceyakiyapi kinhan akihdehde oie kic̣unpi śni po, Ikcewicaśta econpi kin iyececa; hena e iapi ota unpi kin on nawicaḣon kta kecinpi.
8Niye hena iyenicecapi kte śni; hinaḣin yakidapi śni itokam, hena taku kin yacinpi, Niyatepi sdonya ece.
9Heon etanhan kaken cekiya po; Ate unyanpi maḣpiya kin en; Nicaje wakandapi kte;
10Nitokiconze u kte; Nitawacin ecen econpi nunwe, maḣpiya kin en iyececa, nakun makaakan:
11Anpetu kin de anpetu woyute unqu miye:
12Qa waunḣtanipi kin unkicicajuju po, tona waunkiciḣtanipi wicunkicicajujupi kin he iyececa:
13Qa taku wawiyutanyan un kin en unkayapi śni po, tuka taku śice cin etanhan eunhdaku po: Wokiconze kin he niye nitawa, qa wowaśake kin, qa wowitan kin, owihanke wanic̣a. Amen.
14Niye wicaśta waḣtanipi wicayecicajujupi kinhan, Niyatepi maḣpiya ekta un kin he nakun niye nicicajujupi kta.
15Tuka niye wicaśta waḣtanipi kin wicayecicajujupi śni ehantanhan, nakun Niyatepi wayaḣtanipi kin nicicajujupi kte śni.
16Tohan wote śni yaunpi kinhan wanaic̣iḣmanpi kin iyecen ite śinkiyapi śni po; hena eqe ite hduśicapi ece, hecen wicaśta ekta wote śni unpi e ihdutaninpi kta; awicakehan heciciyapi, Hena wokajuju hduhapi ece.
17Tuka niye qe wote śni yaun kinhan pa sdakiye c̣a ite hdujaja wo:
18Hecen wicaśta en wote śni yaun nihdutanin kte śni, tuka Niyate naḣmana un kin he en nihdutanin kta; qa Niyate naḣmana wawanyake cin he taninyan nicicajuju kta.
19Woyuha maka akan ekihnakapi śni po; hen wamduśkadan qa gigi kin wayutakuniśni ece, qa wamanon sa wayujujupi qa wamanonpi ece.
20Tuka woyuha maḣpiya kin ekta ekihnaka po; heciya wamduśkadan qa gigi kin wayuśice cin wanica, qa wamanon sa wayujujupi śni qa wamanonpi śni.
21Tukten woyuha niciyankapi hecinhan, nicantepi nakun hen un kta.
22Wiciśta kin he wicatancan iyoyanpa kin hee; heon etanhan niiśta tokeca śni kinhan nitancan ocowasin iyoyanpa kta:
23Tuka niiśta śice cinhan nitancan kin ocowasin otpaze kta. Heon iyoyanpa en niun kin he otpaza hecinhan, otpaza kin he tanka ḣinca.
24Tuwedan wicaśta itancan nom anawicagoptan kta okihi śni; wanji śice kidake kta, qa unma kin iś wadte kidake kta: wanji en iyaihdaśke kta, qa unma kin iś en etonwe kte śni: Wakantanka qa mammon napin anagoptan oyakihipi kte śni.
25Heon etanhan heciciyapi; Yanipi kin on nagiyeic̣iyapi śni po, taku yatapi kta, qa taku datkanpi kta; qa nakun nitancanpi on taku kodakapi kta: Wiconi kin he woyute isanpa śni he; qa wicatancan kin iś wokoyake isanpa yawapi śni he.
26Maḣpiya okinyanpi kin hena wanwicayaka po, hena wojupi śni, qa woksapi śni, qa mazopiye en omnayanpi śni, tuka Niyatepi maḣpiya ekta un kin he hena wo wicaqu ece; unkan niye hena isanpa niyawapi śni he.
27Niyepi etanhan wanji tukte e he awacannipi on wiciśpa wanjidan kaeś sanpa nihduhanskapi oyakihipi kta he.
28Qa tokeca wokoyake on iyokiśinniciyapi he; tinta mnaḣcaḣca kin wanyaka po, icage cin; ḣtani śni qa nakun wapahmun śni;
29Tuka heciciyapi; Solomon wowitan tanka hduha un qon hee kaeś de wanji iyececa wokoyake kic̣un śni.
30Unkan tinta peji, dehan icage c̣a heyakecinhan oceti en eḣpeyapi ece kin, he Wakantanka hecen koyagya hecinhan, niś niye wacinyan nicistinpidan, sanpa wakoyagniyanpi kte śni he.
31Heon etanhan, Taku untapi, qa taku unyatkanpi, qa taku kounyakapi kta he, eya wacin iyokiśicapi śni po.
32Taku kin hena owasin Ikcewicaśta akitapi ece; qa Niyatepi maḣpiya ekta un kin he dena takuowasin yacinpi esdonya ece.
33Tuka Wakantanka tokiconze kin he tokaheya akita po, qa toowotanna nakun; kinhan dena taku owasin koya nic̣upi kta.
34Heon etanhan heyakecinhan on iyokiśinic̣iyapi śni po; heyakecinhan he taku tawa kin on iyokiśica ece e kta; anpetu eca taku śica tawa kin yukan ece e kta.
Markert nå:
Mattheos 6: DAKOTANT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Copyright 2015 American Bible Society. All Rights Reserved.
