GÉNESIS 8
8
1Taita Diosca, Noé shuti runatapash, huambuna jatun huasipi paihuan tiaj tucui animalcunatapash, charina tucui animalcunatapashmi yarirca. Shina yarishpami Taita Diosca, cai pachaman huairata cachamurca. Chai huairahuanmi, yacucunaca asha asha chaquishpa catirca. 2Shinallata manllanayai ucu ucu yacu pugyucunapash, jahua pacha fajchacunapashmi vicharirca. Jahua pachamanda tamiamujujpashmi jarcarirca. 3Shinami yacucunaca, asha asha cai pachamandaca chaquirijurca. Patsaj picha chunga punlla tucujpica, yacucunaca ñami tucurijurca. 4Shinallata huambuna jatun huasica, canchis quilla chunga canchis punllapimi, Ararat shuti urcu jahuacunapi quedarca. 5Yacucunaca, chunga quillacamanmi chaquishpa catijurca. Chunga quillapaj callari punllapimi, urcu pundacunaca ricurirca.
6Chai jipami, cashna tucurca: Noé runaca, ña chuscu chunga punlla tucujpimi, huambuna jatun huasipi pai rurashca ventanata pascarca. 7Shina pascashpami, cuervo nishca alasyu shuj animalta cacharirca. Chai animalca, alpa jahuapi yacucuna chaquingacamanmi shamushpa, cutin tigrashpa purijurca. 8Cai pachapi yacucunaca, tucuilla chaquishcata ali yachangapajmi, shuj palomatapash cacharirca. 9Chai palomaca, tucui cai pachapi yacucuna nara chaquishca cajpimi, maipi shayaritapash na ushashpa, huambuna chai jatun huasimanllata Noé runapajman tigramurca. Shina tigramujpimi Noé runaca, paipaj maquita chutashpa japishpaca, huambuna jatun huasi ucuman churarca.
10Cutin shuj canchis punllatapash shuyashpami, palomataca huambuna jatun huasimanda cutin cacharirca. 11Chai palomaca ña chishi horaspimi, shuj olivos fangaguta shimipi apashpa, Noé runapajman tigramurca. Shina tigramujpimi Noé runaca, cai pachamanda yacucunaca ña chaquishca cajta ali yacharca. 12Cutin shuj canchis punllatapash shuyashpami, palomataca cutin cacharirca. Chai palomaca, cutinga na paipajman tigramurcachu.
13Noé runaca, sucta patsaj shuj huatata charijpimi, cashna tucurca: Chai huatapaj callari quillapaj punda punllapimi, cai pachapi yacucunaca chaquirca. Noé runaca, huambuna jatun huasi jahua quilpashcata pascashpami, cai pacha alpaca ña chaquishcata ricurca. 14Ishcai quillapaj ishcai chunga canchis punllapimi, alpaca chaquirca. 15Shina cajpimi Taita Diosca, Noé runataca cashna nirca: 16“Huambuna jatun huasimandaca cambash, cambaj huarmipash, cambaj churicunapash, cambaj churicunapaj huarmicunapash, llujshichi. 17Shinallata canhuan tiaj causaita charij tucui animalcunata, alasyu animalcunata, sacha animalcunata, alpata llucashpa purij tucui animalcunatapash canhuan llujchingui. Shina llujshijpi tucui cai pachata rishpami, cai pachapica ninanda mirashpa jundanajunga” nircami.
18Shina nijpimi taita Noepash, paipaj churicunapash, paipaj huarmipash, paipaj churicunapaj huarmicunapash paihuan llujshirca. 19Shinallata tucui animalcunapash, llucashpa purij tucui animalcunapash, chuscu chaquiyu animalcunapash, alasyu tucui animalcunapash, cai pachapi causaita charishpa cuyurij tucui animalcunapash, ima animal cashpapash, chai animal purallami, huambuna jatun huasimanda llujshinajurca. 20Chai jipami Noé runaca, Mandaj Diosman shuj altarta rurarca. Chai altarpimi, micuna tucui animalcunamanda alasyu tucui animalcunamanda japishpa, Diosman cushpa tucuillata rupachijurca. 21Chaitami Mandaj Diosca, ali mishquillaguta ashnachijurca. Chaimandami Mandaj Diosca, paipaj shungupi cashna yajurca: “Alpataca, runapaj jahuaca na cutinga nalicachishachu. Runaca, chairalla viñaimandapachami nalitalla ruranata, shungupi yarishpa causan. Causaita tucui charijcunataca, cunan tucuchishcashnaca na ashtahuan tucuchishachu. 22Cai pacha tiashcacamanga tarpuipash, cozechaipash, chiripash, rupaipash, rupai quillacunapash, tamia quillacunapash, punllapash, tutapash na tucuringachu” yajurcami.
Markert nå:
GÉNESIS 8: QUII
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Quichua Imbabura Bible © United Bible Societies, 1994.
