Mat 8
8
Jesus chuk wele kensaase
(Mak 1.40-45; Luk 5.12-16)
1Jesus nɛ̂y chio se kfən fɛy, ngose wel se nduu ɛ wen ɛybam. 2Ɛ́ loo chin wel əblee, nɛ əb yafe nɛ̀ kensaase gwiy è təm ɛləy ɛ wen ɛyshiɛ, è suuy ge: Báàba, loo lu nɛ wɛ̀ koŋe, wɛ̀ nɛɛy é mɛ bonen.
3Jesus me nase keghoo è kum wen so, è suuy ge: Mɛ koŋe; bonene! Kɛn se əbliy, kensaase kɛ́ tene me laane se wen əbghun. 4Jesus me suuy se wen ge: Yɛɛ ke se suuy kenəə kɛ ke kooyen se wel naa se nkan. Dî nɛ wɛ̀ ndu è din ngeŋ ə yiɛ se wele ntaŋle è taŋle ntaŋle ka ɛysake Mosese dinen.
Ɛybeeme wele mbiy ɛyghoŋ
(Luk 7.1-10)
5Jesus me lii ndu ɛ Kabanaum ɛ leghɛ, wele mbiy ɛyghoŋ əblee gwiy se wen è se beŋte wen, 6suuy ge: Báàba, wel ɛyfɛl nə mɛ nyiŋ ɛ ndaa nɛ ɛybee əbghun ɛylee kuomen, nɛ əb gese yio ɛylum naa se ŋaŋ.
7Jesus me suuy se wen ge: Mɛ nɛ̂y gwiy, è chuk wen. 8Wele mbiy ɛyghoŋ vi fise ge: Báàba, mɛ báà se lu kekwɛnten ka wɛ̀ lii se mɛ ndaa. Suŋnen kɛn suŋnen, é wel ɛyfɛl nə mɛ me bonen. 9Mɛ lu sɛ̂y wel əblee wɛ əb luun ɛ ɛyshaa ɛysak, nɛ ghel ɛyghoŋ ɛlee lu ɛ ɛyshaa ɛysak nə mɛ. Nɛ mɛ suuy se vin ge: Ndu fɛɛy, é əb ndu, è suuy se vii ge: Gwiye fɛn, é əb gwiy; è suuy se wel ɛyfɛl nə mɛ ge: Nɛɛy kine, é əb nɛɛy.
10Jesus yio kii nɛ̂ kine, è se lu nɛ̀ əbchíò əbyúméné, è me suuy se ghel ghɛ ɛ́ nè nduun ɛ wen ɛybam ge: Mɛ suuy se ghɛn ge chèmè lu ɛ Islael fene mɛ bɛɛy ghàà yɛn ɛynkii ɛybeeme ɛytaa ka yine. 11Mɛ suuy se ghɛn ge, ghel se ɛydio nɛ̂y lòò əblik əbjim ɛ mbi fɛn è gwiy è diom è yɛ yiɛ ghene ghe Ablaham, nɛ̀ Ayzek, gese nɛ̀ Jakob ɛ kelik ɛysak nə əbfon ɛyyio. 12Ɛ́ náà loo lu dì é Feyine fəyse ghel ghɛ ɛ́ kè luun se yɛ lu fo, è mak se mbi nfiine bene fɛ ghene yɛ toŋ, kfəle ɛsoŋ. 13Jesus me suuy se wel ɛyghoŋ vi ge: Yɛɛ kfəəye, ke gan kɛn ka wɛ̀ beemen se mɛ.
Wel ɛyfɛl nə wele mbiy ɛyghoŋ vi me bonen kɛn se əbliy.
Jesus chuk ghel se ɛydio
(Mak 1.29-34; Luk 4.38-41)
14Jesus nɛy ndu ɛ Bita ə ndaa, è yɛn no əbchii nə Bita nɛ əb nyiŋ ɛ əbkun, nɛ kenchɛme chakse. 15Jesus kum keghoo ə wen, kenchɛme kɛ́ tene me takle, əb loole è se noole nɛ̀ Jesus.
16Nɛy se lu ɛ likfəəy fo, ghele se gwiye nɛ̀ ghel ghɛ ɛyfime liin se əmlɛɛ se ɛydio se Jesus, əb se suŋnen kɛn suŋnen nɛ ɛyfime me fəye se wel əblɛɛ. Əb gese se chuke ghel ɛyafkene. 17Əb nè nɛɛye kii nɛ̂ kine se lunse kenəə kɛ wele ntum nə Feyine wɛ Ezaya nè suuyen ge: “Əb nè fii gon ə sɛs è gese buuse teyaf ə tɛs.”
Ngɛk se yɛ jumte ɛybam ə Jesus
(Luk 9.57-62)
18Jesus nɛ̂y yɛn nɛ ngose wele kaame ɛ wen ɛybee, è me suuy se ghon-ɛyfɛl nə wene ge ɛ́ diaŋ se njine jio se vəəy. 19Ndinte tesak ɛylee gwiy se wen è suuy ge: Ndinte, mɛ yɛ jumte wɛ̀ naa ghááy ghaa wɛ̀ nduun. 20Əb fise ge: Ndumse ki əbbuk ə ghen, nɛ əmnənme ki ndaase ghen, dî nɛ Wanwel ki wiy kelik kɛ əb nyiŋse ketuu ɛ ten è zəəle. 21Wan-ɛyfɛl nə wen əblee suuy se wen ge: Báàba, vəse é mɛ kase fiile è ndu è náà gvəəme ba ə wom se geese gwiy. 22Jesus fise ge: Gwiy ɛ́ lòò, é ghii dii ghɛ ɛ́ lɛyenmen yɛ gvəəme ghel ghɛ kuon.
Jesus chil mfəme
(Mak 4.35-41; Luk 8.22-25)
23Jesus ghene ghon-ɛyfɛl nə wene me lii se kenək è loo ndu, 24Mfəme tum è fəy, è se shikse jio, nɛ moome loole lii se kenək nɛ Jesus sɛ̂y buune buunen. 25Ghon-ɛyfɛle chia è se yɛme wen suuy ge: Boyse ghɛse Báàba! Ghɛsene kuo ɛ jio fɛn.
26Jesus fise ge: Ghɛne fane bek ghɛ? Ghɛn fo ɛytem se Feyine kɛn se ɛylaay lɛ lɛɛy? Əb bif dì, è loole, è kɛy mfəme yi gese nɛ̀ jio yi, əblike se lu nyiaŋ. 27Wel əbjim se lu nɛ̀ əbchíò əbyúméné, kante ge: Vin lu ɛynkii wel əbkɛ wɛ mfəme gese nɛ̀ jio yionen se wen?
Jesus chuk ghel ɛyfim ɛbaa
(Mak 5.1-20; Luk 8.26-39)
28Jesus ndu chin ɛ njine vii ɛ́ ntɛke Gadala, è konen ghene ghel ɛbaa nɛ ɛ́ loo ɛ ngvəəmese. Ghel nɛ̂ ghin nè ki tefim ɛ ghen əmlɛɛ, gese foo ngɛk naa se ŋaŋ ɛ jii yɛ ghele nè báà se chia ɛ jii fo. 29Ghene me sasen è zəəme ge: Wan ə Feyin, wɛ̀ kɛŋe se nɛɛye ghɛ se ghɛs? Wɛ̀ gwiymen se nyable nɛ̀ ghɛs nɛ əbliye tene bɛɛy ghàà kwɛn-a?
30Nè lu dì nɛ kenone nkfəənyamse yiɛ ɛ nchiɛ ɛ nchiɛ. 31Ɛyfim yii me beŋte Jesus ge: Loo yɛ lu ge wɛ̀ jum ghɛs, wɛ̀ tinse ghɛs se kenone nkfəənyamse fɛɛy.
32Jesus fise ge: Ghɛn ndu; ghene me lòò è chia è lii se nkfəənyam shii əmlɛɛ. Se me foonten è chio è chin ɛ ketuu koŋ, è chakle se kechəm keghuye è kuoke.
33Ghel ghɛ ɛ́ nè toknen nɛ̀ nkfəənyam sɛ tene nyiŋ è ndu ɛ ntɛk è fiɛl kenəə kejim, è fiɛl sɛy kenəə kɛ ke ganen se ghel ɛyfim ghɛ ɛbaa ghii. 34Ghel ɛjime me kuŋ əbghun se ntɛk fô ge ɛ́ ndu è yɛn Jesus. Ɛ́ yɛn wen, è se lone ge əb lòò se ghene ntaam.
Markert nå:
Mat 8: oku
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©CABTAL, 2012
