Mat 16

Jesus tɛn se nɛɛy kenəə əbchio əbyúméné

(Mak 8.11-13; Luk 12.54-56)

1Ghele kenone Falisee ɛlee ghene Sadduseese gwiy se Jesus se mome wen, è suuy ge əb nɛɛy kenəə əbchio əbyúméné se din ge əbtaawe ə wene lòò se Feyine. 2Jesus me suuy ge: Chuye lóó sooy, ghɛn suuy ge kebɛye nɛ̂y yɛ lu kejuŋ ɛ likebvəchi bek ka ɛyyio baŋen. 3Loo lu ɛ bvəse bvəse nɛ ɛyyio baŋe nɛ mbàkse fine, ghɛn me suuy ge ɛyghuu nɛ̂y gwiy. Ghɛn ke se kiy ɛyyio, se suuy ka kechii nɛ̂y yɛ lu, dî ke wiy se fekte əbnəə wɛ kum keleŋ əbliy kin. 4Ghɛne ghɛ́ ntem fɛne lu ghel ɛbee, kokse wiy Feyin, kenəə əbchio əbyúméné di wiy kɛ Feyine nɛɛy se ghɛn bak kɛn kɛ əb nè nɛɛyen se Jona.

Əb suuy dì, è me lòò se fo è se nduu.

Ghɛn yɛ bààme teyiɛke ghel əbbuam

(Mak 8.14-21)

5Ghon-ɛyfɛl nə Jesus diaŋ se njine jio se vəəy, diaŋe di nɛ ɛ́ lɛysen se liɛ keban. 6Jesus suuy se ghene ge: Ghɛn yɛ toknen kum feshike ghele kenone Falisee gese nɛ̀ fɛ́ kenone Saddusee. 7Ghon-ɛyfɛl nə wene yio dî, è me se kantê se ngeŋse ghene ge: Tam fene əb suuye lɛ bek ka ghɛsen kè báà gwiy nɛ̀ kebane. 8Jesus keele kenəə kɛ ghene ghɛyten, è bif se ghene ge: Ghɛn ghɛ ɛ́ foon ɛytem se mɛ kɛn se ɛylaay! Lu bek ghɛ wɛ ghɛne kanten kum kenəə keban kɛ ghɛn kè báà liɛ? 9Ghɛne yɛne əbnəə chəysen wiy-a? Ghɛn bo kuume wiy ntukse keban sɛ setan sɛ mɛ nè yiɛsen ghel so nkam setan-a? Ghɛn nè biŋte əbmbɛkele ten əb lun nkaa se sek? 10Ghɛn lɛysenmen sɛy ghel ghɛ nkam sekɛɛk ghɛ mɛ nè yiɛsen nɛ̀ ntukse keban sɛ saamba-a? Ghɛn nè biŋte əbmbɛkele ten əb lun nkaa se sek? 11Nɛɛy ghɛ ge ghàà ghɛn keele ge mɛ kè báà se suŋnen kum keban? Mɛ gese kunte suuye se ghɛn ge ghɛn yɛ toknen kum feshike ghele kenone Falisee nɛ̀ fɛ́ kenone Saddusee. 12Əb suuy dì ghon-ɛyfɛl nə wene me keele ge əb kè báà se suŋnen kum feshik fɛ ɛ́ sɛɛ vii ɛ keban. Əb kè suŋnen nɛ lu kum teyiɛke ghele kenone Falisee ghene tɛ́ ghele kenone Saddusee.

Bita suuy ge Jesus lu vi wɛ Feyine nè yiosen

(Mak 8.27-30; Luk 9.18-21)

13Jesus nɛy ndu è chin ɛ nseŋe Saesalea Filibi, è bif se ghon-ɛyfɛl nə wene ge: Ghele suuye ge Wanwel lu ndɛ?

14Ghene fise ge: Ghel ɛlee suuy ge wɛ̀ lu Joon Nfoo Moo, nɛ ɛlee suuy ge wɛ̀ lu Elija, nɛ ɛlee suuy ge Jelemia, kene wele ntum nə Feyine wɛ́ mbiy əblee.

15Əb bif se ghene ge: Ghɛne suuy kɛne ge mɛ lu ndɛ?

16Simon Bita fise ge: Wɛ̀ lu Vi wɛ Feyine nè Yiosen wɛ wán ə Feyin Fɛ Fe chiin.

17Jesus suuy se wen ge: Ke lu kejuŋ se wɛ̀ Simon Wán ə Jona! Báà nɛɛy wele-mesoŋ ge wɛ̀ keele əbluuy vin; nɛɛy Ba ə wom wɛ əb luun ɛ ɛyyio. 18Mɛ me se suuy se wɛ̀ ge: Wɛ̀ lu Bita, dii ge wɛ̀ lu ɛyghok, nɛ lu ɛ ketuu ɛyghok nɛ̂ ghan yɛ mɛ nɛ̂y baklé kenchintene ghel ɛbeemene nə mɛ, nɛ lòó ɛykuo jia yî taa è chia. 19Mɛ nɛ̂y vii əbnchok ɛysak nə Feyin ɛ wɛ̀ keghoo. Naa ghɛ kɛ wɛ̀ tunsen ɛ ntiɛ fɛn, lu nɛ Feyine tunse ɛyyio, nɛ naa ghɛ kɛ wɛ̀ beemen ɛ ntiɛ fɛn, lu nɛ Feyine beeme ɛyyio.

20Jesus suuy dì, è me chiise se ghon-ɛyfɛl nə wene ge, ghàà ghene suuy se wel ge yi lu Vi wɛ Feyine nè Yiosen.

Jesus suuy ge yi nɛ̂y yɛn ngɛk è kuo

(Mak 8.31–9.1; Luk 9.22-27)

21Se kɛ̀ɛ̀tè se əbliy fo Jesus me se suŋnene se ghon-ɛyfɛl nə wene ge yi lu se ndu ɛ Jolesalem se yɛne ngɛk ɛ ɛghoo nə chɛɛse ghene ghele mbiye se ghɛ́ ntaŋlee gese nɛ̀ ndintese tesake, é ɛ́ yuy yi, é əbchii lun əbtal é yi loole se ɛykuo.

22Bita me liɛ wen, ghene wen bak əbghun, əb me se yole Jesus suuy ge: Báàba Feyine tɛɛke fɛ kii nɛ̂ kine yî gan se wɛ!

23Jesus benle è suuy se Bita ge: Loo se mɛ ɛybee, wɛ̀ lu Satan! Wɛ̀ tiy ɛ mɛ jii, bek ge ɛykwaate ə yiɛ báà se lu yɛ́ Feyine, lu yɛ́ wele.

24Jesus me suuy se ghon-ɛyfɛl nə wene ge: Naa ndɛ wɛ əb kɛŋen se yɛ jumte ɛybam ə yom lu se liɛ ngeŋ ə wen ka kefaa lólò, se bɛɛye kentam ə wen se yɛ jɛl so ɛ mɛ ɛybam. 25Bek ge naa ndɛ wɛ əb kɛŋen se babte ɛychii ə wene náà lɛy ɛyghene, nɛ naa ndɛ wɛ əb lɛyen ɛychii ə wen bek mɛ lu nɛ əb náà yɛ ki ɛychii. 26Lòó sɛk yɛ lu ghɛ se wel ɛ lefɛ əb kiilen ketuu ntiɛ kejim, è lɛy ɛychii ə wen? Moo kefaa lu kɛ lòó wel fó se ten ɛychii ə wen so-a? Ke wiy. 27Wanwel shi se gwiy ɛ əbtaawe nə Ba ə wen, gwiye ghene nchiyse-ndaa nə wene. Əb nɛ̂y gwiy è yɛ makte wel əbjim se əbnəə wɛ əb nɛɛyenmen. 28Mɛ suuy əbluuy se ghɛn ge ghel ɛlee tiy fɛn nɛ ɛ́ jia yî kuo nɛ ɛ́ báà yɛn Wanwel nɛ əb gwiy ka əbfon.

Markert nå:

Mat 16: oku

Marker

Del

Kopier