Mat 15
15
Jesus suŋnen kum ndee ɛylak
(Mak 7.1-13)
1Ghele kenone Falisee ɛlee ghene ndintese tesak selee me lòò ɛ Jolesalem è gwiy è bif se Jesus ge: 2Lu bek ghɛ wɛ ghon-ɛyfɛl nə wɛ̀ báà se nɛɛy əbnəə wɛ ɛbàá ɛbàá ə ghɛse nè lɛmen se ghɛsen? Ghene lóó ghàà ɛ́ suu ɛghoo ɛ ndee ɛylak se geese yɛ yiɛ.
3Jesus fise ge: Lu bek ghɛ wɛ ghɛne kolen ɛysak ə Feyin, jumte nɛ lu ndee ɛylak nə ghɛn? 4Feyine nè suuy ge: Wel ngvəmle ba ə wen ghene no ə wen, nɛ̀ naa ndɛ suŋnen kebee kum ba ə wen kene no ə wen, fene ɛ́ yuy wen yuyen. 5Se lu se ghɛn nɛ ghɛn suuy ge, wel ki kefaa kɛ kè lòó əb giamten ba ə wen so kene no ə wen, è suuy ge lu kɛ́ Feyine, fene əb bo bɛɛy wiy se ngvəmle ba ə wen. 6Ghɛne nɛɛye dì me kiye ɛysak ə Feyin lolo, me jumte nɛ lu ndee ɛylak nə ghɛn. 7Ghɛn ghɛ nfefsese! Nfekte yɛ Ezaya nè suuy se əbluuy əbliy wɛ əb nè suŋnen kum ghɛn ge: “Feyine nè suuy ge:
8Ghel ghine kokse mɛ se əbchio,
dî nɛ tetem ə ghene lu əbtəm se mɛ.
9Ɛykokse yɛ ghel ghine fóon se mɛ lɛye se lólò,
bek ge ghene liɛ əbnəə wɛ lɛmen ghel,
dinte se ghele ge lu nchil ə som.”
Kefaa kɛ ke besen wel
(Mak 7.14-23)
10Jesus me jaŋ ghel ghi è suuy se ghene ge: Ghɛn yiote kenəə kɛ mɛ suuy, è keele. 11Kefaa kɛ ke liin əbchio báà se bese wel, kɛ ke besen wel lu kɛ ke fəyen ɛ wel əbchio.
12Ghon-ɛyfɛle kokte gwiy è bif se Jesus ge: Wɛ̀ lɛ ke ge ghele kenone Falisee kè lô yio kenəə kɛ wɛ̀ suuyen, ke yaf ghene-a?
13Əb fise ge: Kefaa lu kɛ nè báà yiɛte Ba ə wom wɛ əb luun ɛ ɛyyio fene əb nɛ̂y chok nɛ̀ ɛghaŋe se ten. 14Ghàà ghɛn yɛ ki shii kum ghene. Ghene lu əbnfef dine jii se əbnfefe, nɛ kenfefe lòò è yɛ dine jii se kenfefe, é ghene ghel ɛjim too se ɛybee.
15Bita me suuy se wen ge: Ko suuy se ghɛs ge ngan yin sɛ dine gee ghɛ-a?
16Jesus bif se ghene ge: Ɛytof ə yɛne bo təmse ka yɛ ghel ɛlee-a? 17Ghɛne báà se ke ge kefaa kɛ ke liin ɛ wel əbchio, chia nduu se əblɛɛ me fəye-a? 18Dî nɛ kefaa kɛ ke fəyen ɛ wel əbchio lòò ɛytem, nɛ̀ lu keghene kɛ ke besen wen. 19Ke lu dî bek ge lu ɛ wel ɛytem ghaa wele loo əb yɛ ki tekwaate tebee, me yuyte ghel, liɛ əbkiy kene ɛlum ə ghel, jaŋ kenjaŋ, choŋe əbchoŋ, yia əbbuam gese bese teghel ə ghel ɛlee. 20Lu əbnəə nɛ̂ vin wɛ əb besen wel, dî nɛ wele yiɛ nɛ əb báà suu ɛghoo ɛ ndee ɛylak, é kii nɛ̂ kine jia bese wen.
Əbvii wɛ̂ Kanaan fó ɛytem se Jesus
(Mak 7.24-30)
21Jesus nɛy lòò se fo, è fəy se keluune è ndu ɛ keleŋe Taya ghene Sidon. 22Əbvii wɛ̂ Kanaan əblee wɛ əb nè chiin fo me gwiy è se beŋte wen suuy ge: Báàba wɛ wán ə David, ko cham ɛysen ə yom. Ɛyfime nəkse wán ə wom əbvii ɛ jii ɛybee.
23Jesus jia suuy kenəə ghɛy. Ghon-ɛyfɛl nə wene kokte gwiy è se lone wen suuye ge: Ko nɛɛy é əb lòò bek ge əb gwiy ɛ ghɛsen ɛybam toŋe.
24Jesus me fise ge: Feyine nè tum ge mɛ gwiy kɛn se ghele Islael ghɛ ɛ́ lɛyenmen.
25Əb sɛ́y gwiy è təm ɛləy ɛ Jesus ɛyshiɛ è suuy ge: Báàba, giamten mɛ.
26Jesus fise ge: Ke báà jof ge ɛ́ liɛ əbfua-əbyíɛ́ne nə ghone è mak se buose. 27Əbvii vi bente ge: Lu se əbluuy, dî nɛ buose loo se yɛ biŋte ɛykfək əbfua wɛ ɛbaa ghene yiɛn nɛ əb chemke ɛ ntiɛ. 28Jesus me suuy se wen ge: Əbvii, wɛ̀ lu nɛ wɛ̀ fó ɛytem se mɛ naa se ŋaŋ. Ke gan kɛn ka wɛ̀ foon ɛytem se mɛ. Əb suuy dì ɛ leghɛ, wan əbvii vi me bonen.
Jesus chuk ghel se ɛydio
29Jesus nɛy lòò se fo è chia əbghune kechem keghuye kɛ Galilee, è kok è diom ɛ ketuu kfən. 30Ngose wel se kaame fo, gwiye nɛ̀ ghel ɛləmmene, nɛ̀ əbnfefe, nɛ̀ ghel ɛkɛblene, nɛ̀ əbchichii, gese nɛ̀ ghel ɛyafkene ɛlee, lɛme ɛ wen ɛyshiɛ nɛ əb chuke ghene. 31Ghele se lu nɛ̀ əbchíò əbyúméné se yɛn nɛ əbchichii suŋnene, nɛ ɛləmmene bonene, nɛ ɛkɛblene jɛle, nɛ əbnfefe yɛne əblik. Ghele yɛn dî, è se foo ɛykokse se Feyine ghele Islael.
Jesus yiɛse ghel nɛ ɛ́ chia nkam sekɛɛk
(Mak 8.1-10)
32Jesus nɛy lòò è kwayte ghon-ɛyfɛl nə wen è suuy se ghene ge: Mɛ koosen ɛysen se ghel ghine bek ge ghene shi fɛn ghɛse ghene se əbchii əbtal, ki wiy kefaa se yiɛ. Mɛ báà se koŋe se suuy ge ghene yɛ kfəəy se jeŋ bek ge lòó jeŋ mak ghene ɛ jii.
33Ghon-ɛyfɛl nə wene bif se wen ge: Lòó é ghɛs liɛ ghááy əbfua-əbyíɛ́ne əbkwak fɛn wɛ əb kwɛn se ngose wel yin?
34Jesus bif se ghene ge: Ghɛn ki ntukse keban se sek? Ghene fise ge: Se lu saamba, gese nɛ̀ əmsəətese se ɛylaay.
35Jesus me suuy ngose wel yi diom se ntiɛ. 36Əb liɛ ntukse keban sɛ saamba shi, gese nɛ̀ əmsəətese mi, è bɛ̀ɛ̀lè Feyine, è bɛkte, è fo se ghon-ɛyfɛl nə wene, ghene giate se ngose wel yi. 37Wel əbjim yiɛ è kul. Ghon-ɛyfɛle biŋte əbmbɛkele wɛ əb nè bɛɛsen, əb lun nkaase saamba. 38Ghel ghɛ ɛ́ nè yiɛn nè lu nkam sekɛɛk nɛ ɛ́ báà taŋ əbkiy ghene ghone.
39Jesus nɛy tinse ngose wel yi ge ɛy yɛ kfəəy, è lii se kenək è me ndu se ntaam Magadan.
Markert nå:
Mat 15: oku
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©CABTAL, 2012
