GENESIS 3
3
Eritɔŋɔ Idiɔk Ŋkpɔ
1NDIEN urukikɔt enyene ŋkari akan kpukpru unam obot emi Jehovah Abasi akanamde. Ekem enye ɔdɔhɔ ŋwan oro, ete, Nte Abasi ɔkɔdɔhɔ ete, Mbufo ekudia baba eto iŋwaŋ emi kiet? 2Ndien ŋwan ɔdɔhɔ urukikɔt, ete, 3Nnyin idadia mfri eto iŋwaŋ: edi ama edi mfri eto emi odude ke ufɔt iŋwaŋ, Abasi ama ɔdɔhɔ ete, Mbufo ekudia ke esit, ekunyuŋ etuk enye, mbak edikpaŋa. 4Ndien urukikɔt ɔdɔhɔ ŋwan ete, Mbufo idikpaha: 5koro Abasi ɔmɔfiɔk ete, ke usen eke mbufo ediade ke esit, ndien enyin mbufo eyetara; mbufo eyenyuŋ etie nte Abasi, efiɔk eti ye idiɔk.
6Ekem ŋwan okut nte eto oro ɔfɔnde ke udia, nte onyuŋ eyede ke enyin, nte eto onyuŋ enemde ndise, ndien enye ada mfri esie adia; onyuŋ ɔnɔ ebe esie ŋko, ndien enye adia. 7Ndien enyin mmɔ mbiba etara, mmɔ enyuŋ efiɔk ete ke mmimɔ idi iferi; ndien mmɔ ekim ikɔŋ fig edian, enam mbɔbɔ ke idem mmɔ. 8Ekem ndien mmɔ ekop uyom Jehovah Abasi nte enye asaŋade ke iŋwaŋ ke ofum uwemeyo; ndien owo oro ye ŋwan esie efehe iso Jehovah Abasi ekedibe ke otu eto iŋwaŋ.
9Ndien Jehovah Abasi okot owo oro, ete enye, Afo odu mmɔŋ? 10Ndien enye ɔdɔhɔ ete, ŋkokop uyom fo ke iŋwaŋ, ndien mfehe ndik, koro ami ndide iferi; ndien ŋkedibe. 11Ndien Enye ete, Anie akasian fi ete ke afo edi iferi? Nte afo ama adia eto emi ŋkowukde fi nte, Kudia ke esit? 12Ndien owo oro ɔdɔhɔ, ete, Ŋwan emi afo ɔkɔnɔde ete odu ye ami, enye ɔkɔnɔ mi mfri eto oro, ami nnyuŋ ndia. 13Ndien Jehovah Abasi ete ŋwan, Nso ke afo akanam emi? Ndien ŋwan ete, Urukikɔt akabiaŋa mi, ndien ndia. 14Ndien Jehovah Abasi ɔdɔhɔ urukikɔt, ete, Koro afo anamde emi, osuk ɔdiɔk ɔnɔ fi akan kpukpru ufene, ye kpukpru unam ikɔt: afo eyesaŋa ke idibi fo, 15eyenyuŋ adia ntɔŋ ke ofuri ini uwem fo: nyenyuŋ nsin usua ke ufɔt fo ye ŋwan, ye ke ufɔt ubon fo ye ubon esie: enye eyenuak fi ibuot, afo eyenyuŋ anuak enye nditiŋ-ikpat.
16Enye ɔdɔhɔ ŋwan ete, Nyenam ubiak uman fo awawak: ke ubiak ke afo ediman nditɔ; eyenyuŋ osuk idem ɔnɔ uberi ndien enye eyekan fi. 17Ndien enye ɔdɔhɔ eren owo ete, Koro afo okopde uyo aŋwan fo, onyuŋ adiade mfri eto emi ŋkowukde fi, nte, Kudia ke esit: osuk ɔdiɔk ɔnɔ isɔŋ abaŋa fi; ke ukut ke afo edidia ke esit ke ofuri ini uwem fo: 18enye eyenyuŋ otibe akpap ye mbara ŋkukwɔ-inɔ ɔnɔ fi; afo eyenyuŋ adia ikɔŋ iŋwaŋ ŋko. 19Ke ibibiak iso fo ke afo edidia udia, tutu edifiak ke isɔŋ emi esiode fi ke esit: koro afo edide ntan, eyenyuŋ afiak ke ntan. 20Ndien Adam osio ŋwan esie enyiŋ Eve; koro enye edide eka kpukpru mme andidu uwem. 21Ndien Jehovah Abasi anam edisine ŋkpɔ ke ikpa unam ɔnɔ Adam ye ŋwan esie, esine mmɔ ke idem.
22Ndien Jehovah Abasi ɔdɔhɔ ete, Sese, owo amakabare edi nte nnyin kiet, ke erifiɔk eti ŋkpɔ ye idiɔk: mmɔdo, mbak enye edinyan ubɔk esie, onyuŋ ada eto uwem ŋko adia, ndien odu uwem ke nsinsi: 23ndien Jehovah Abasi ebin enye ke iŋwaŋ Eden efep, ete aka okofuŋ isɔŋ emi esiode enye ke esit. 24Ntem ke enye osio owo oro efep: ndien onim cherubim ye emineŋmineŋ ofut ikaŋ ke edem usiaha utin iŋwaŋ Eden, ete ekpeme usuŋ eto uwem.
Markert nå:
GENESIS 3: ENA
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Efik Old Bible With Sectional Headings © Bible Society of Nigeria, 2013, 2019.
