तोलिङ्सोमु 11
11
बाबेलबा चङ्हिम्
1खे़न् ये़म्मो के़रे़क् इक्सादिङ् खाम्बेःक्मो लत्छारक् पाःन्दाङ् वये़ हे़क्क्याङ् लत्छा परिक्ले़न् पाःन्छेःक्वा वये़॥ 2मे़न्छाम् याप्मिहाॽ नाम्गे़न् पिसाङ् मे़जत्छिङ्ल मे़बेःल्ले़ सिनार लाजेॽओ लत्छा ते़म्बेॽधिक् मे़घोसुआङ् हाबा खे़प्मो मे़युङ्सिङ्॥
3खे़ङ्हाॽ अक्खे मे़मे़त्छिङ्, “आल्ल आनिॽ खाम्ले़क् चोगुम्माङ् सङ्ल ओॽरुम्॥” खे़ङ्हाॽरे़ लुङ्ङिल्ले़ कुले़क्वा खाम्ले़क् हे़क्क्याङ् सॽमनाबा खाम्मिल्ले़ कुले़क्वा अलकत्रान् ओगप् मे़जोगु॥ 4खे़ब्याङ् खे़ङ्हाॽरे़ मे़बाःत्तु, “लु, आनिॽ आबाङे लत्छा ये़क्यक्थिक् चोगुम्, खे़न् ये़क्यक्को थो साङ्ग्राम्पेदाङ् के़सुबा चङ्हिम्धिक् चोगुम्, हे़क्क्याङ् आनिॽ मिङ् युक्खुम् खे़ल्ले़चोगुल्ले़ आनिॽ इक्सादिङ् खाम्बेःक्मो के़रे़क् पिसाङ् आन्छे़ने़न् आम्बेःक्नेल्लरो॥”
5कर मे़न्छाम् याप्मिहाॽरे़ मे़जोगुर मे़यागे़बा ये़क्यःक्किन् नु चङ्हिम्मिन् ओमे़त्छे़ यहवे दाङ्बान् थासिङ् ये़॥ 6हे़क्क्याङ् यहवे दाङ्बाल्ले़ पाःत्तु, “आल्ल कन् मे़न्छाम् याप्मिहाॽ लत्छा सुवाङ् हे़क्के लत्छा परिक्ले़न् पाःन्दाङ् मे़बाःत्ताङ् आल्लो कन् मे़जोगुने़फाग्र, आल्ल खे़ङ्हाॽरे़ मे़इःत्तुबान् थेसाङ् चोःक्मा मे़सुक्तुरो॥ 7पेगि, आनिॽ यो थ्ये़ॽइआङ् खे़ङ्हाॽरे़ खुन्छिॽ पाःन्निन् फोःत्तुम् पिरुम्सिम्, हे़क्क्याङ् खे़ङ्हाॽ मे़बाःत्तिल्ले़ खुन्छिॽ पान् मे़दङ्ने़ल्ल॥”
8खे़ब्याङ् यहवे दाङ्बाल्ले़ खे़ॽयोलाम् खे़ङ्हाॽ के़रे़क् इक्सादिङ् खाम्बेःक्मो से़सुदेसुसि, हे़क्क्याङ् खे़ङ्हाॽरे़ खे़न् ये़क्यःक्किन् चोःक्मा मे़नाॽरु॥ 9खे़ल्ले़चोगुल्ले़ खे़न् ते़न्निन् बाबेल#११:९ बाबेल—कन् मिङ्ङिन् हिब्रुओ “फःम्मा” हे़क्तङ्बा खे़म्दे़त्॥ मे़मे़त्तु, थेआङ्भे़ल्ले़ यहवे दाङ्बाल्ले़ खे़प्मोए इक्सादिङ् खाम्बेःक्मोबा के़रे़क् मे़न्छाम् याप्मिहाॽरे़ खुन्छिॽ पाःन्हाॽ फोःत्तु पिरुसिआङ् वये़॥ हे़क्केलॽरिक् यहवे दाङ्बाल्ले़ खे़ङ्हाॽ के़रे़क् इक्सादिङ् खाम्बेःक्मो से़सुदेसुसिरो॥
सेमे़ल्ले़ कुस्सा कुम्मे़न्छाॽहाॽ
(१ साप्मु १:२४-२७)
10सेमे़ल्ले़ कुस्सा कुम्मे़न्छाॽहाॽरे़ खुन्छिॽ साप्मुःन्धुम्मिन् हाबा कन्लो॥ #१ साप्मु १:२४-२७ वदप्मा थाङे़आङ् वये़बा तङ्बे ने़त्छि एगाङ् सेमे़न् किप् थिक् तङ्बे के़रे़ल्ले़ खुने़ॽ अर्पक्छ्यदे़न् कत्तु॥ 11अर्पक्छ्यदे़न् वये़आङ् सेमे़न् याम्मो किप् ङासि तङ्बे थारिक् हिङे़ हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ मे़वये़॥
12अर्पक्छ्यदे़न् सुम्बोङ्ङाङ् ङासि तङ्बे के़रे़ल्ले़ खुने़ॽ कुस्सा ये़म्बित्छा सेलहन् कत्तु॥ 13सेलहन् वये़आङ् अर्पक्छ्यदे़न् याम्मो किप् लिसिआङ् सुम्सि तङ्बे हिङे़ हे़क्क्याङ् वेॽ कुस्सा ये़म्बित्छा नु मे़न्छुमाहाॽ मे़वये़॥
14सेलहन् सुम्बोङ् तङ्बे के़रे़ल्ले़ खुने़ॽ एबेरे़न् कत्तु॥ 15एबेरे़न् वये़आङ् सेलहन् याम्मो किप् लिसिआङ् सुम्सि तङ्बे थारिक् हिङे़, हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥
16एबेरे़न् सुम्बोङ्ङाङ् लिसि तङ्बे के़रे़ल्ले़ खुने़ॽ पेलेगे़न् कत्तु॥ 17पेलेगे़न् वये़आङ् एबेरे़न् याम्मो किप् लिसिआङ् सुम्बोङ् तङ्बे हिङे़, हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥
18पेलेगे़न् सुम्बोङ् तङ्बे के़रे़ल्ले़ खुने़ॽ रउन् कत्तु॥ 19रउन् वये़आङ् पेलेगे़न् याम्मो किप् ने़त्छिआङ् फाङ्सि तङ्बे थारिक् हिङे़, हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥
20रउन् सुम्बोङ्ङाङ् ने़त्छि तङ्बे के़रे़ल्ले़ खुने़ॽ सरुगे़न् कत्तु॥ 21सरुगे़न् वये़आङ् रउन् याम्मो किप् ने़त्छिआङ् नुसि तङ्बे थारिक् हिङे़, हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥
22सरुगे़न् सुम्बोङ् तङ्बे योरे़ल्ले़ खुने़ॽ नाहोरे़न् कत्तु॥ 23नाहोरे़न् वये़आङ् सरुगे़न् याम्मो किप् ने़त्छि तङ्बे थारिक् हिङे़॥ हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥
24नाहोरे़न् निबोङ्ङाङ् फाङ्सि तङ्बे के़रे़ल्ले़ खुने़ॽ तेरहन् कत्तु॥ 25तेरहन् वये़आङ् नाहोरे़न् याम्मो किप् थिक् हे़क्क्याङ् थिबोङ्ङाङ् फाङ्सि तङ्बे हिङे़, हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ मे़बोःक्खे़॥
26तेरहन् नुबोङ् तङ्बे के़रे़ल्ले़ खुने़ॽ अब्राम, नाहोर नु हारान्ने़न् कत्तुसि॥
तेरहःल्ले़ कुमुॽइदाङ्साहाॽ
27तेरहरे़ कुस्सा कुम्मे़न्छाॽहाॽरे़ खुन्छिॽ साप्मुःन्धुम्मिन्—
तेरहःल्ले़ अब्राम, नाहोर नु हाराने़न् कत्तुसि॥ हे़क्क्याङ् हाराने़ल्ले़ लुते़न् कत्तु॥ 28तेरहन् मे़न्छिए वये़ल्ले़सा हाराने़न् सावाःन्छिङ्बा कल्दिहाॽरे़ खुन्छिॽ लाजेॽ उरओ मासिङ्॥ 29अब्राम नु नाहोर ने़प्मजाङ्ले़ मेःत् तारे़सुआङ् ते़न्धाम् मेःक्खिम् चोगे़त्छु॥ अब्राम्मिल्ले़ कुमेःत्तिल्ले़ कुमिङ् साराइ वये़, हे़क्क्याङ् नाहोरे़ल्ले़ कुमेःत्तिल्ले़ कुमिङ् मिल्का वये़॥ मिल्कान् हाराने़ल्ले़ कुस्सा वये़॥ हाराने़न् मिल्का नु यिस्कारे़ खुन्छिॽ पा वये़॥ 30साराइन् सामे़ङ्गप्मनामा वये़, खे़ल्ले़ थिक्काङ् कुस्सा मे़होःप्ते़॥
31तेरहरे़ कुस्सा अब्राम्मे़न् नु कुम्बाङ्लि साराइन् हे़क्क्याङ् हाराने़ल्ले़ कुस्सा खुने़ॽ कुम्मे़न्छाॽ लुते़न् तेॽरुसिआङ् कनान लाजेॽओ पेःक्मारे़ लागि कल्दिहाॽरे़ खुन्छिॽ उर लाजेन् मे़ले़रुआङ् मे़लःन्दे़॥ कर खे़ङ्हाॽ हारान लाजेॽओ मे़गे़रे़आङ्ग हाबा खे़प्मोए युङ्मा मे़हेःक्ते़॥
32तेरहन् किप् ने़त्छिआङ् तङ्बे ङासि हिङे़, हे़क्क्याङ् खुने़ॽ हारान्नो मासिङ्॥
Markert nå:
तोलिङ्सोमु 11: LIF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2009, 2023, Wycliffe Bible Translators, Inc. All rights reserved.
