လံာ်တၢ်ကဲထီၣ်အခီၣ်ထံး 34
34
တၢ်မၤဆူၣ်မၤစိးနီၢ်ဒံနၤ
1ဘၣ်မုၢ်တနၤန့ၣ်, စီၤယၤကိာ်ဒီးနီၢ်လ့ၤအၤအဖိမုၣ်နီၢ်ဒံနၤ လဲၤအိၣ်သကိးပှၤကနၤဧၣ်ဖိပိာ်မုၣ်တနီၤလီၤ. 2တုၤပှၤဃံၤဝံၤဖိစီၤဃမိၢ်အဖိခွါစီၤၡက့ၣ်, ပဒိၣ်ဖဲလီၢ်ကဝီၤန့ၣ်ထံၣ်အီၤဒီးဟံးန့ၢ်အီၤဒီးမၤဆူၣ်မၤ စိးအီၤန့ၣ်လီၤ. 3ဘၣ်ဆၣ်အဝဲထံၣ်ဘၣ်ဝဲလၢပိာ်မုၣ်ဖိသၣ်န့ၣ်အိၣ်ဒီးအတၢ်ရဲၢ်သံ တုၤဒၣ်လဲာ်အဝဲအဲၣ်ဘၣ်အီၤဒီးကျဲးစၢးမၤန့ၢ်အတၢ်အဲၣ်န့ၣ် လီၤ. 4အဝဲစံးဘၣ်အပၢ်, “မၤန့ၢ်ယၤလၢပိာ်မုၣ်ဖိသၣ်အံၤဒ်သိးကကဲ ထီၣ်ယမါန့ၣ်တက့ၢ်.”
5စီၤယၤကိာ်သ့ၣ်ညါဘၣ်ဝဲဒၣ်လၢအဖိမုၣ်ဘၣ်တၢ်မၤမဲာ်ဆှးတ့ၢ် လံအီၤန့ၣ်လီၤ. ဘၣ်ဆၣ်မ့ၢ်လၢအဖိခွါတဖၣ်အိၣ်ဒံးဒၣ်လၢပျီပူၤ ဃုာ်ဒီးအဂီၤဘုၣ်ဂီၤဖံးတဖၣ်အဃိ, တချုးလၢအဝဲသ့ၣ်ဟဲက့ၤဒံးဘၣ်န့ၣ်, အဝဲတမၤတၢ်နီတမံၤဘၣ်. 6စီၤၡက့ၣ်အပၢ်စီၤဃမိၢ်ဟးထီၣ်ဒ်သိးကကတိၤတၢ်ဒီးစီၤယၤကိာ်, 7ဖဲစီၤယၤကိာ်အဖိခွါတဖၣ်ဟဲက့ၤတုၤဝဲလၢပျီပူၤန့ၣ်လီၤ. တုၤအဝဲသ့ၣ်နၢ်ဟူတၢ်ဂ့ၢ်န့ၣ်ဒီးအဝဲသ့ၣ်အသးဘၣ်ဒိဘၣ်ထံး ဒီးအတၢ်သးဒိၣ်ကဲၤထီၣ်ဝဲလၢစီၤၡက့ၣ်မၤတ့ၢ်လံတၢ်တမံၤလၢ အမၤဘၣ်ဒုၣ်ဒွဲၣ်တ့ၢ်အံၣ်စရ့လးအပှၤဂီၢ်မုၢ်ခီဖျိမၤဆူၣ်မၤ စိးစီၤယၤကိာ်အဖိမုၣ်အဃိန့ၣ်လီၤ. 8စီၤဃမိၢ်စံးဘၣ်အီၤ, “ယဖိခွါစီၤၡက့ၣ်အဲၣ်လိာ်အသိးဒီး နဖိမုၣ်လီၤ. ဝံသးစူၤပျဲအဖျီအသးဒီးအီၤတက့ၢ်. 9မ်ပမၤသကိးတၢ်သးလီၤပလိာ်တမံၤလၢတၢ်တ့ဃုာ်ဖျီဃုာ်ကအိၣ်ဝဲ လၢပပှၤဂီၢ်မုၢ်ဒီးသုအဘၢၣ်စၢၤတက့ၢ်. 10ဒီးသုကအိၣ်ဖဲအံၤလၢပထံလီၢ်ကီၢ်ပူၤဒီးပှၤ, သုကအိၣ်ဖဲ သုအဲၣ်ဒိးအိၣ်တပူၤပူၤ, မၤကူၣ်မၤကၤသဘျ့သူၣ်သဘျ့သးဒီး အိၣ်ဒီးသုစုလီၢ်ခီၣ်ခိၣ်ဒၣ်ဝဲလီၤ.”
11ဒီးစီၤၡက့ၣ်စံးဘၣ်နီၢ်ဒံနၤအပၢ်ဒီးအဒီပုၢ်ဝဲၢ်ခွါတဖၣ်, “မ်သုသးကညီၤကွၢ်မဲာ်ယၤတက့ၢ်. ဒီးယကဟ့ၣ်သုတၢ်လၢသုအဲၣ် ဒိးတမံၤလၢ်လၢ်လီၤ. 12သုအဲၣ်ဒိးတၢ်ဟ့ၣ်ကနၢၤမနုၤတဖၣ်လဲၣ်န့ၣ်တဲဘၣ်ယၤတက့ၢ်. ပာ်တလးမူးပိာ်မုၣ်အပှ့ၤဖဲသုအဲၣ်ဒိးဃ့တက့ၢ်. ထဲသုမ့ၢ်ပျဲယဒိးတ့ဒိးဖျီယသးဒီးအီၤန့ၣ်, ယကဟ့ၣ်သုတၢ်တမံၤလၢ်လၢ်လၢသုဃ့န့ၣ်လီၤ.”
13မ့ၢ်လၢစီၤၡက့ၣ်မၤမဲာ်ဆှးတ့ၢ်လံအဝဲသ့ၣ်အဒီပုၢ်ဝဲၢ်မုၣ် နီၢ်ဒံနၤအဃိဒီးစီၤယၤကိာ်အဖိခွါတဖၣ်စံးဆၢစီၤၡက့ၣ်ဒီး အပၢ်စီၤဃမိၢ်လၢတၢ်လီတၢ်ဝ့ၤအပူၤန့ၣ်လီၤ. 14အဝဲသ့ၣ်စံးဘၣ်အီၤ, “ပပျဲပဒီပုၢ်ဝဲၢ်မုၣ်ဒိးတ့ဒိးဖျီ အသးဒီးပှၤတဂၤလၢအတဒိးကူးတရံးအသးတသ့ဘၣ်. တၢ်န့ၣ်ကမ့ၢ်တၢ်လီၤမဲာ်ဆှးတမံၤလၢပဂီၢ်လီၤ. 15တၢ်အဂ့ၢ်အခၢးထဲတမံၤဧိၤလၢကဒုးသးလီၤပလိာ်ပှၤဒီးသုန့ၣ် မ့ၢ်ဒၣ်သုကကဲထီၣ်တၢ်ဒ်သိးဒီးပှၤခီဖျိသုပှၤပိာ်ခွါခဲ လၢာ်ဒိးဘၣ်တၢ်ကူးတရံးအီၤန့ၣ်လီၤ. 16တုၤနုၤတစု, ပကသးလီၤပလိာ်လၢတၢ်တ့တၢ်ဖျီဃုာ်လိာ်သးအပူၤ န့ၣ်လီၤ. ဒီးပကအိၣ်ကဆိးလၢသုကျါဒီးကဲထီၣ်ပှၤဂီၢ်မုၢ်တဖုဃီဒီးသု န့ၣ်လီၤ. 17မ့မ့ၢ်သုမ့ၢ်တတူၢ်လိာ်ပတၢ်ဂ့ၢ်တၢ်ကျိၤလၢပပာ်လီၤအီၤတဖၣ် ဒီးဒိးတၢ်ကူးတရံးဘၣ်န့ၣ်ပကဟံးန့ၢ်အီၤဒီးဟးထီၣ်ကွံာ်န့ၣ်လီၤ.”
18တၢ်ဂ့ၢ်တၢ်ကျိၤတဖၣ်အံၤဖျါကြၢးဝဲဘၣ်ဝဲလၢစီၤဃမိၢ်ဒီးအဖိ ခွါစီၤၡက့ၣ်အဂီၢ်, 19ဒီးစီၤၡက့ၣ်တသုးဆၢသုးကတီၢ်လၢကမၤတၢ်ဒ်အဘၣ်တၢ်ဟ့ၣ်ကူၣ်အီၤ ဘၣ်လီၤ. အဂ့ၢ်ဒ်အံၤ, အဝဲအဲၣ်လိာ်အသးဒီးစီၤယၤကိာ်အဖိမုၣ်န့ၣ်လီၤ. အဝဲဒၣ်န့ၣ်မ့ၢ်ပှၤအကါဒိၣ်ကတၢၢ်တဂၤလၢအဟံၣ်ဒူၣ်ဃီထၢအပူၤ န့ၣ်လီၤ.
20စီၤဃမိၢ်ဒီးအဖိခွါစီၤၡက့ၣ်လဲၤဆူတၢ်အိၣ်ဖှိၣ်အလီၢ်လၢဝ့ၢ် အတြဲၤန့ၣ်, ဒီးကတိၤတၢ်ဆူအပှၤဝ့ၢ်ဖိကဒဲကဒဲတဖၣ်, ဒီးစံးဝဲ, 21“ပှၤတဖၣ်အံၤမ့ၢ်တံၤသကိးအဂ့ၤလၢပဂီၢ်လီၤ. မ်အအိၣ်သကိးဒီးပှၤလၢကီၢ်အံၤအပူၤဒီးဟးထီၣ်က့ၤလီၤလၢတၢ် သဘျ့အပူၤတက့ၢ်. ကီၢ်အံၤလဲၢ်ဝဲလၢလၢလီၣ်လီၣ်လၢအဝဲသ့ၣ်အဂီၢ်စ့ၢ်ကီးလီၤ. မ်ပကဒိးတ့ဒိးဖျီပသးဒီးအဖိမုၣ်တဖၣ်ဒီးဟ့ၣ်အဝဲသ့ၣ်လၢ ပဖိမုၣ်တဖၣ်လၢတၢ်တ့တၢ်ဖျီ အဂီၢ်တက့ၢ်. 22ဘၣ်ဆၣ်ပှၤတဖၣ်အံၤကသးလီၤပလိာ်ဒ်သိးကအိၣ်ဆိးလၢပကျါဒီးကဲ ထီၣ်ပှၤဂီၢ်မုၢ်တဖုဃီဒီးပှၤထဲဒၣ်လၢတၢ်အဂ့ၢ်အခၢးတမံၤဧိၤ အဖီခိၣ်လၢအမ့ၢ်ပပှၤပိာ်ခွါခဲလၢာ်ကဘၣ်ဒိးတၢ်ကူးတရံးဒ်အဝဲ သ့ၣ်အသိးန့ၣ်လီၤ. 23မ့ၢ်အဝဲသ့ၣ်အဂီၤဘုၣ်ဂီၤဖံးခဲလၢာ်ဒီးကယဲၢ်အတၢ်တမံၤလၢ်လၢ် ကဲထီၣ်ပတၢ်တသ့ဘၣ်ဧါ. မ့မ့ၢ်ဒ်န့ၣ်ဒီး, မ်ပသးလီၤပလိာ်လၢအဝဲသ့ၣ်အိၣ်ဆိးလၢပကျါ ကသ့အဂီၢ်တက့ၢ်.” 24ကယဲၢ်ဝ့ၢ်အထံဖိကီၢ်ဖိခဲလၢာ်အသးလီၤပလိာ်ဒီးတၢ်ဂ့ၢ်လၢစီၤ ဃမိၢ်ဒီးစီၤၡက့ၣ်ဆှၢထီၣ်တ့ၢ်ဝဲ, ဒီးကယဲၢ်ပှၤပိာ်ခွါခဲလၢာ်ဒိးတၢ်ကူးတရံးအီၤန့ၣ်လီၤ.
25သၢသီဝံၤအလီၢ်ခံ, ဖဲပှၤပိာ်ခွါတဖၣ်အပူၤလီၢ်ဆါဒံးဝဲ လၢတၢ်ကူးတရံးအဃိန့ၣ်, နီၢ်ဒံနၤအဒီပုၢ်ဝဲၢ်ခွါ, စီၤစူးမ့ၤအိၣ်ဒီးစီၤလ့ၤဝံလၢအမ့ၢ်စီၤယၤကိာ်အဖိခွါခံ ဂၤ, ဟံးထီၣ်အနးတဖၣ်ဒီးလဲၤနုာ်ဝဲဆူဝ့ၢ်ပူၤဖဲပှၤတပာ်သူၣ်ပာ် သးဘၣ်အခါဒီးမၤသံကွံာ်ပှၤပိာ်ခွါခဲလၢာ်, 26ဃုာ်ဒီးစီၤဃမိၢ်ဒီးစီၤၡက့ၣ်န့ၣ်လီၤ. ဒီးအဝဲသ့ၣ်ဟံးန့ၢ် နီၢ်ဒံနၤလၢစီၤၡက့ၣ်အဟံၣ်ဒီးဟးထီၣ်ကွံာ်ဝဲဒၣ်န့ၣ်လီၤ. 27ဖဲတၢ်မၤသံမၤဝီဒ်အံၤဝံၤန့ၣ်စီၤယၤကိာ်အဖိခွါအဂၤတဖၣ် ဂုာ်ဆူၣ်ပျီဆူၣ်ဝ့ၢ်လၢတၢ်ဟ့ၣ်ကၣ်ဆၢက့ၤအဝဲသ့ၣ်အဒီပုၢ်ဝဲၢ် မုၣ်အတၢ်မဲာ်ဆှးအဂီၢ်န့ၣ်လီၤ. 28အဝဲသ့ၣ်ဟံးန့ၢ်ကွံာ်သိအဖုတဖၣ်, ဂီၤဘုၣ်ဂီၤဖံးတဖၣ်, ကသ့ၣ်ယီၤတဖၣ်ဒီးကယဲၢ်တၢ်အိၣ်လၢဝ့ၢ်ပူၤဒီးပျီပူၤခဲလၢာ် န့ၣ်လီၤ. 29အဝဲသ့ၣ်ဟံးန့ၢ်ကွံာ်တၢ်လုၢ်ဒိၣ်ပှ့ၤဒိၣ်ခဲလၢာ်, ဖီၣ်န့ၢ်ကယဲၢ်ပှၤပိာ်မုၣ်ဒီးဖိသၣ်ခဲလၢာ်ဒီးစိာ်ကွံာ်ကယဲၢ် တၢ်အိၣ်လၢဟံၣ်တဖၣ်အပူၤန့ၣ်လီၤ.
30စီၤယၤကိာ်စံးဘၣ်စီၤစူၤမ့းအိၣ်ဒီးစီၤလ့ၤဝံ, “သုဒုးလီၤဘၣ်ယၤလၢတၢ်ကိၢ်တၢ်ဂီၤအပူၤလံ. ခဲကနံၣ်အံၤပှၤကနၤဧၣ်ဖိ တဖၣ်, ပှၤပရးစးဖိတဖၣ်ဒီးကယဲၢ်ပှၤအိၣ်လၢကီၢ်ပူၤတဂၤလၢ်လၢ် ကသးဟ့ယၤလီၤ. ယတအိၣ်ဒီးပှၤပိာ်ခွါအါဂၤဘၣ်. အဝဲသ့ၣ်ခဲလၢာ်မ့ၢ်ပာ်ဖှိၣ်ထီၣ်အသး, ထီဒါယၤဒီးဒုးယၤန့ၣ် ပဒူၣ်ဖိထၢဖိဒီတဒူၣ်ညါကဟးဂီၤကွံာ်ဝဲန့ၣ်လီၤ.”
31ဘၣ်ဆၣ်အဝဲသ့ၣ်စံးဆၢဝဲ, “ပပျဲပဒီပုၢ်ဝဲၢ်မုၣ်ဘၣ်တၢ်မၤ အီၤဒ်ပှၤဃဲသဲမုၣ်ပတီၢ်မုၢ်တဂၤအသိးတကဲဘၣ်.”
Markert nå:
လံာ်တၢ်ကဲထီၣ်အခီၣ်ထံး 34: KSWC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sgaw Karen Common Bible © Bible Society of Myanmar, 1992.
