လံာ်တၢ်ကဲထီၣ်အခီၣ်ထံး 32
32
စီၤယၤကိာ်ကတဲာ်ကတီၤအသးလၢကထံၣ်လိာ်အသးဒီးစီၤဧ့ၡီၤ
1ဒီးဖဲစီၤယၤကိာ်လဲၤတၢ်လၢအကျဲန့ၣ်ကလူးတနီၤဟဲသဂၢၢ်အီၤ န့ၣ်လီၤ. 2တုၤအထံၣ်အဝဲသ့ၣ်န့ၣ်စီၤယၤကိာ်စံးဝဲ, “တၢ်လီၢ်အံၤမ့ၢ် ကစၢ်ယွၤသူၣ်ဒဲအလီၢ်လီၤ.” လၢတၢ်န့ၣ်အဃိကိးဝဲတၢ်လီၢ်အံၤ လၢ ‘မၤဃန့ၤ’ လီၤ.
3စီၤယၤကိာ်မၢပှၤစိာ်တၢ်ကစီၣ်တဖၣ်လဲၤဆိလၢအမဲာ်ညါဆူ အဒီပုၢ်ဝဲၢ်ခွါစီၤဧ့ၡီၤအအိၣ်ဖဲကစၢၢ်စံဧ့ၢ်လၢကီၢ်အဒိၣ် အပူၤန့ၣ်လီၤ. 4စီၤယၤကိာ်မၤလိာ်အဝဲသ့ၣ်လၢကစံး, “ယၤ, စီၤယၤကိာ်, နခ့နပှၤလၢအဒိကနၣ်နၤစံးဘၣ်ယကစၢ်စီၤဧ့ၡီၤလၢ, ယအိၣ်တ့ၢ်လၢ စီၤလၤဘၣ်အအိၣ်ဒီးအိၣ်ဖဲန့ၣ်ယံာ်တုၤခဲကနံၣ်အံၤလီၤ. 5ယအိၣ်ဒီးဂီၤဘုၣ်ဂီၤဖံး, ကသ့ၣ်ယီၤ, သိဒီးမဲာ်တဲးလဲးဒီး ကုၢ်သ့ၣ်တဖၣ်လီၤ. တၢ်ဒိၣ်ဧၢ, ယဆှၢလီၤတၢ်ကစီၣ်လၢတၢ်မုၢ်လၢ်အပူၤဒ်သိးယကဒိး န့ၢ်ဘၣ်နတၢ်သးကညီၤကွၢ်မဲာ်ယၤလီၤ.”
6ဖဲပှၤစိာ်တၢ်ကစီၣ်တဖၣ်ဟဲက့ၤတုၤဆူစီၤယၤကိာ်အအိၣ်န့ၣ်, အဝဲသ့ၣ်စံး, “ပလဲၤဆူနဝဲၢ်စီၤဧ့ၡီၤအအိၣ်, ဒီးအဝဲဟဲ ထီၣ်လံဝဲဒ်သိးအကဟဲသဂၢၢ်နၤလီၤ. အဝဲအိၣ်ဒီးအပှၤအဂၤလွံၢ်ကယၤလီၤ.” 7စီၤယၤကိာ်ပျံၤတၢ်ဒီးဘၣ်ကိၢ်ဘၣ်ဂီၤဝဲလီၤ. ဒီးနီၤဖးလီၤဝဲပှၤလၢအအိၣ်ဒီးအီၤတဖၣ်န့ၣ်ခံဖုဒီးပှၤလၢ အကွၢ်ထွဲသိ, မဲာ်တဲးလဲး, ဒီးဂီၤဘုၣ်ဂီၤဖံးဒီးကီၤလၤအူးတဖၣ်န့ၣ်လီၤ. 8အဝဲဆိကမိၣ်ဝဲဒၣ်, “စီၤဧ့ၡီၤမ့ၢ်ဟဲဒုးပှၤအခီၣ်ထံးတဖု ဒီးအဂၤတဖုပူၤဖျဲးဝဲကသ့န့ၣ်လီၤ.”
9ဒီးစီၤယၤကိာ်ဃ့ဘါထုကဖၣ်တၢ်, “ယဖုစီၤအၤဘြၤဟၣ်အကစၢ် ယွၤ, ယပၢ်စီၤအံၤစဲးအကစၢ်ယွၤဧၢ, ဒိကနၣ်လၢ်ယၤတက့ၢ်. ယွၤဧၢ, နတဲယၤလၢယဘၣ်က့ၤဆူ ယကီၢ်ဒီးယဘူးယတံၢ်သ့ၣ်တဖၣ်အအိၣ်ဒီးနကမၤတၢ်ကိးမံၤဒဲးဂ့ၤ ဂ့ၤဘၣ်ဘၣ်လၢယဂီၢ်န့ၣ်လီၤ. 10ယၤ, နခ့နပှၤတကၢကီၣ်ဘၣ်ဒီးကယဲၢ်နတၢ်သးကညီၤဒီးနတၢ်တီတၢ် လိၤလၢနဒုးနဲၣ်တ့ၢ်ယၤန့ၣ်ဘၣ်. ယခီဂာ်ထံကျိယၢ်ဒ့ၣ်ထဲစုယၢ်ခီဒီးအိၣ်ဒၣ်ထဲနီၣ်ထိးဘိတ ဘိ ဧိၤန့ၣ်လီၤ. ဒီးခဲကနံၣ်အံၤ, ယဟဲက့ၤကဒါက့ၤဃုာ်ဒီးပှၤခံ ဖုအံၤန့ၣ်လီၤ. 11ယဃ့ထုကဖၣ်လၢနကအုၣ်က့ၤခီၣ်က့ၤယၤလၢယဝဲၢ်စီၤဧ့ၡီၤအစု ပူၤလီၤ. ယပျံၤတၢ်, ယပျံၤလၢအဝဲကဟဲဒုးပှၤဒီးမၤဟးဂီၤကွံာ်ပှၤတုၤ ဒၣ်လဲာ်ဖိသၣ်ဒီးပှၤပိာ်မုၣ်တဖၣ်ခဲလၢာ်န့ၣ်လီၤ. 12သ့ၣ်နီၣ်ထီၣ်က့ၤလၢနအၢၣ်လီၤတၢ်လၢနကမၤတၢ်ကိးမံၤဒဲးဂ့ၤ ဂ့ၤဘၣ်ဘၣ်လၢယဂီၢ်ဒီးနကဟ့ၣ်လီၤယၤယစၢၤယသွဲၣ်အါန့ၢ်ဒံးပှၤ ဂံၢ်အီၤသ့တက့ၢ်, အါဒ်မဲးဧိၤဟီၣ်ဧိၤလၢပီၣ်လဲၣ်နံၤအသိးန့ၣ်တက့ၢ်.”
13အိၣ်ဝဲဖဲန့ၣ်ဝံၤမုၢ်တနၤဒီး, စီၤယၤကိာ်ဃုထၢဆၣ်ဖိကီၢ်ဖိ တနီၤလၢကဟ့ၣ်အဝဲခွါစီၤဧ့ၡီၤအဂီၢ်ဒ်တၢ်ဟ့ၣ်ကနၢၤလၢမ့ၢ်ဝဲ, 14မဲာ်တဲးလဲးမိၢ်ခံကယၤဒီးအဖါခံဆံ,
15သိအမိၢ်ခံကယၤဒီးအဖါခံဆံ, ကီၤလၤအူးအမိၢ်အိၣ်ဒီးအဖိဆံးသၢဆံ, ဂီၤဖံးမိၢ်လွံၢ်ဆံ ဒီးဂီၤဖံးဖါတဆံ, ကသ့ၣ်ယီၤအမိၢ်ခံဆံဒီးအဖါအဒုတဆံန့ၣ်လီၤ. 16အဝဲနီၤဖးလီၤတၢ်တဖၣ်န့ၣ်တဖုတဖုဒီးပာ်လီၤဝဲပှၤတဂၤစုာ် စုာ်လၢအကုၢ်အပှၤတဖၣ်အကျါဒ်ပှၤကွၢ်ထွဲဆၣ်ဖိကီၢ်ဖိတဖုဘၣ်တဖု အဂီၢ်အသိးန့ၣ်လီၤ. ဒီးအဝဲစံးဘၣ်အဝဲသ့ၣ်, “လဲၤဆိလၢယမဲာ်ညါဒီးပာ်တၢ်လီၢ် လီၤဟိလၢဆၣ်ဖိကီၢ်ဖိတဖုဘၣ်တဖုအဘၢၣ်စၢၤန့ၣ်တက့ၢ်.” 17အဝဲမၤလိာ်အခ့အပှၤအခီၣ်ထံးတဂၤစံးဝဲ, “ဖဲယဒီပုၢ်ဝဲၢ်ခွါစီၤဧ့ၡီၤဘၣ်သဂၢၢ်နၤဒီးသံကွၢ်နၤလၢ, နကစၢ်မ့ၢ်မတၤလဲၣ်, နကလဲၤဆူလဲၣ်, ဆၣ်ဖိကီၢ်ဖိတဖၣ်လၢနမဲာ်ညါ အံၤအကစၢ်မ့ၢ်မတၤလဲၣ်န့ၣ်, 18နကဘၣ်စံးဆၢအီၤ, ‘တၢ်တဖၣ်န့ၣ်ဘၣ်ဃးဒီးနကုၢ်အပှၤစီၤယၤကိာ် န့ၣ်လီၤ. အဝဲဆှၢလီၤဝဲဒၣ်တၢ်တဖၣ်အံၤဒ်တၢ်ဟ့ၣ်ကနၢၤအသိးဆူ အကစၢ်စီၤဧ့ၡီၤအအိၣ်လီၤ. စီၤယၤကိာ်အနီၢ်ကစၢ်ဒၣ်ဝဲအိၣ်လၢပလီၢ်ခံလီၤ.’ 19ဒီးစီၤယၤကိာ်မၤလိာ်ဝဲပှၤခံဂၤတဂၤမ့ၢ်ဂ့ၤ, ပှၤသၢဂၤတဂၤမ့ၢ်ဂ့ၤ, ဒီးကယဲၢ်ပှၤအဂၤခဲလၢာ်လၢအဘၣ်ကွၢ်ထွဲပၢဆှၢဆၣ်ဖိကီၢ်ဖိ အဖုအဂီၢ်တဖၣ်, ‘အအံၤမ့ၢ်တၢ်လၢသုကဘၣ်စံးဘၣ်တဲဘၣ်စီၤဧ့ ၡီၤဖဲသုထံၣ်အီၤန့ၣ်လီၤ. 20သုကဘၣ်စံး, ‘အၢၣ်, နခ့နပှၤစီၤယၤကိာ်ဟဲလၢပလီၢ်ခံ ဖိအံၤလီၤ.’ ” ဒီးစီၤယၤကိာ်ဆိကမိၣ်ဝဲဒၣ်လၢ, “ယကမၤန့ၢ်စီၤဧ့ၡီၤအတၢ်ဘၣ်သူၣ်ဘၣ်သးယၤခီဖျိတၢ်ဟ့ၣ် ကနၢၤတဖၣ်အံၤဒီးဖဲယထံၣ်အီၤန့ၣ်ဘၣ်သ့ၣ်သ့ၣ်အဝဲကပျၢ်ယတၢ်ကမၣ် န့ၣ်လီၤ.” 21စီၤယၤကိာ်ဆှၢလီၤဆိတၢ်ဟ့ၣ်ကနၢၤသ့ၣ်တဖၣ်လၢအမဲာ်ညါဒီးမုၢ် တနၤန့ၣ်အဝဲအိၣ်ဝဲဆိးဝဲလၢအဒဲပူၤန့ၣ်လီၤ.
စီၤယၤကိာ်ကနိတၢ်ဖဲပနံၤအ့လး
22ဒီးတနၤဃီန့ၣ်, စီၤယၤကိာ်ဂဲၤထၢၣ်ဒီးကိးထီၣ်အမါခံဂၤ, သံၣ်မါခံဂၤဒီးအဖိတဆံတဂၤဒီးခီဂာ်ထံကျိယးဘိးန့ၣ် လီၤ. 23ဖဲအဝဲဆှၢခီဃီၤအဝဲသ့ၣ်တဖၣ်ဝံၤန့ၣ်, အဝဲဆှၢခီဃီၤစ့ၢ် ကီးတၢ်လၢအအိၣ်ဒီးအီၤခဲလၢာ်လီၤ. 24မ့မ့ၢ်အဝဲအိၣ်လီၤတဲာ်တ့ၢ်ထဲတဂၤဧိၤန့ၣ်လီၤ. ဖဲန့ၣ်ပှၤတဂၤဟဲဒီးကနိတၢ်ဒီးအီၤတုၤမုၢ်ဘူးကဆ့ၣ်ထီၣ်န့ၣ် လီၤ. 25တုၤပှၤတဂၤအံၤသ့ၣ်ညါဝဲလၢကနိတၢ်တနၢၤလၢၤဘၣ်န့ၣ်အဝဲမၤဘၣ် ဒိစီၤယၤကိာ်ဖဲအခံကွီၢ်ဒီးအကံၢ်ဒုၣ်အဆၢတလံာ်ကွံာ်ဝဲလီၤ. 26ပှၤတဂၤန့ၣ်စံးဘၣ်အီၤ, “ပျၢ်ယၤတက့ၢ်. မုၢ်ဆ့ၣ်ထီၣ်လံ.” ဒီးစီၤယၤကိာ်စံးဆၢအီၤ, “မ့တမ့ၢ်ဘၣ်လၢနဆိၣ်ဂ့ၤယၤဘၣ် န့ၣ်, ယတပျၢ်နၤဘၣ်.”
27ပှၤတဂၤန့ၣ်သံကွၢ်အီၤ, “နမံၤဒ်လဲၣ်” ဒီးအဝဲစံးဆၢဝဲ, “စီၤယၤကိာ်လီၤ.”
28ဒီးပှၤတဂၤန့ၣ်စံးဘၣ်အီၤ, “နမံၤတမ့ၢ်လၢၤဘၣ်စီၤယၤကိာ် ဘၣ်. နဂဲၤပျုၢ်ပြၢလိာ်တ့ၢ်နသးဒီးကစၢ်ယွၤဒီးပှၤကညီ, ဒီးနမၤနၢၤလံတၢ်လံ. အဃိဒီးနမံၤကမ့ၢ်စီၤအံၣ်စရ့လးလီၤ.”
29စီၤယၤကိာ်စံးဘၣ်အီၤ, “ခဲကနံၣ်အံၤတဲယၤလၢနမံၤတက့ၢ်.” ဘၣ်ဆၣ်အဝဲသံကွၢ်ဝဲ, “ဘၣ်မနုၤလၢနအဲၣ်ဒိးသ့ၣ်ညါယမံၤန့ၣ် လဲၣ်.” ဒီးအဝဲဆိၣ်ဂ့ၤစီၤယၤကိာ်လီၤ.
30စီၤယၤကိာ်စံးဝဲ, “ယထံၣ်ဘၣ်လံကစၢ်ယွၤမဲာ်သကိးမဲာ်, ဒီးယမူဒံးယဲလီၤ.” အန့ၣ်ဒီးကိးန့ၢ်တၢ်လီၢ်န့ၣ်အမံၤလၢ ပနံၤအ့လးလီၤ. 31မုၢ်ဟဲထီၣ်တ့ၢ်လံဖဲစီၤယၤကိာ်ဟးထီၣ်လၢပနံၤအ့လးလီၤ. ဒီးအဝဲဟးတကျဲၢ်တကျဲၢ်လၢအကံၣ်ဒုၣ်အဆၢလီၤတလံာ်အဃိလီၤ. 32တုၤလၢမုၢ်မဆါတနံၤအံၤဒၣ်လဲာ်, ပှၤအံၣ်စရ့လးဖိအစၢၤအသွဲၣ် တဖၣ်တအီၣ်ဘၣ်တၢ်အညၣ်ထူၣ်လၢအိၣ်လၢခံကွီၢ်အ လိၤန့ၣ်ဘၣ်. အဂ့ၢ်ဒ်အံၤ, စီၤယၤကိာ်ဘၣ်တၢ်မၤဘၣ်ဒိအီၤဖဲ တၢ်အညၣ်ထူၣ်အဝဲန့ၣ်လီၤ.
Markert nå:
လံာ်တၢ်ကဲထီၣ်အခီၣ်ထံး 32: KSWC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sgaw Karen Common Bible © Bible Society of Myanmar, 1992.
