လံာ်တၢ်ကဲထီၣ်အခီၣ်ထံး 28
28
1စီၤအံၤစဲးကိးဝဲစီၤယၤကိာ်ဒီးဆၢဂ့ၤဆၢဝါအီၤဒီးတဲဘၣ် အီၤ, “ဟံးန့ၢ်နမါလၢပှၤကနၤဧၣ်မုၣ်ဖိတဂၤတဂ့ၤ. 2အခိၣ်တလိာ်, လဲၤဆူကီၢ်မ့းစပတၤမံဆူနဖုစီၤဘသူၤအ့လး အဟံၣ်ဒီးန့ၢ်နမါလၢပိာ်မုၣ်ဖိတဖၣ်အကျါတဂၤလၢအမ့ၢ်နဖါတံၢ် စီၤလၤဘၣ်အဖိမုၣ်အကျါတဂၤန့ၣ်တက့ၢ်. 3မ်သ့တၢ်လၢာ်ကစၢ်ယွၤဆိၣ်ဂ့ၤနတၢ်ဖျီဒီးဟ့ၣ်နၤလၢနဖိတဖၣ် အါအါဂီၢ်ဂီၢ်ဒ်သိးနကကဲထီၣ်ပှၤအါကလုာ်အပၢ်န့ၣ်တက့ၢ်. 4မ်ယွၤဆိၣ်ဂ့ၤနၤဒီးနစၢၤနသွဲၣ်တဖၣ်ဒ်အဆိၣ်ဂ့ၤတ့ၢ်စီၤအၤ ဘြၤဟၣ်အသိးဒီးမ်နကန့ၢ်သါကီၢ်လၢနအိၣ်တ့ၢ်လံလၢအပူၤလၢ ကစၢ်ယွၤဟ့ၣ်တ့ၢ်စီၤအၤဘြၤဟၣ်န့ၣ်တက့ၢ်.” 5စီၤအံၤစဲးဆှၢဝဲစီၤယၤကိာ်ဆူကီၢ်မ့းစပတၤမံ, ဆူစီၤလၤဘၣ်လၢအမ့ၢ်ပှၤစူၤရံဖိစီၤဘသူၤအ့လးအဖိခွါ, စီၤယၤကိာ်ဒီးစီၤဧ့ၡီၤအမိၢ်နီၢ်ရံးဘကၤအဒီပုၢ်ဝဲၢ်ခွါ အအိၣ်န့ၣ်လီၤ.
စီၤဧ့ၡီၤဟံးန့ၢ်ကဒီးအမါလၢခံတဂၤ
6စီၤဧ့ၡီၤသ့ၣ်ညါဝဲလၢစီၤအံၤစဲးဆိၣ်ဂ့ၤတ့ၢ်လံစီၤယၤ ကိာ်ဒီးဆှၢအီၤဆူကီၢ်မ့းစပတၤဒ်သိးကထံၣ်န့ၢ်အမါတဂၤအဂီၢ် လီၤ. အဝဲသ့ၣ်ညါစ့ၢ်ကီးဝဲဒၣ်လၢဖဲစီၤအံၤစဲးဆိၣ်ဂ့ၤအီၤန့ၣ် မၤလိာ်တ့ၢ်အီၤလၢအသုတဟံးန့ၢ်ပှၤကနၤဧၣ်မုၣ်တဂၤတဂ့ၤန့ၣ် လီၤ. 7ဒီးအဝဲထံၣ်ဝဲဒၣ်လၢစီၤယၤကိာ်စူၢ်အမိၢ်ဒီးအပၢ်ဒီးလဲၤဝဲ ဆူကီၢ်မ့းစပတၤမံလံန့ၣ်လီၤ. 8တုၤနုၤတစု, စီၤဧ့ၡီၤနၢ်ပၢၢ်ဝဲဒၣ်လၢအပၢ်စီၤအံၤစဲးတဘၣ် ဘၣ်အသးလၢပှၤကနၤဧၣ်မုၣ်ဖိတဖၣ်ဘၣ်န့ၣ်လီၤ. 9ဒီးလၢတၢ်န့ၣ်အဃိလဲၤဝဲဆူစီၤအၤဘြၤဟၣ်အဖိခွါစီၤယံး ၡမၤဧ့လးအအိၣ်ဒီးဒိးတ့ဒိးဖျီအသးဒီးနီၢ်မၤဃလးလၢအမ့ၢ် စီၤယံးၡမၤဧ့လးအဖိမုၣ်, စီၤနဘါယိးအဒီပုၢ်ဝဲၢ်မုၣ်န့ၣ်လီၤ.
စီၤယၤကိာ်အတၢ်မံမီၢ်ဖဲဝ့ၢ်ဘ့ၤသ့လး
10ဒီးစီၤယၤကိာ်ဟးထီၣ်လၢဝ့ၢ်ဘ့ၢ်ၡဘၤဒီးလဲၤဝဲဆူဝ့ၢ်ဟၤရၣ် န့ၣ်လီၤ. 11ဒီးဖဲမုၢ်လီၤနုာ်အကတီၢ်န့ၣ်ဟဲတုၤဝဲဆူတၢ်လီၢ်စီဆှံတတီၤ ဒီးမံဝဲဖဲန့ၣ်လီၤ. ဒီးစူၣ်လီၤအသးဒ်သိးကမံဝဲဒီးပာ်လီၤအခိၣ်လၢလၢၢ်တဖျၢၣ် အလိၤလီၤ. 12ဒီးမံမီၢ်ဝဲဒၣ်လၢထံၣ်ဘၣ်ဝဲဒၣ်ဃီတဘိပိာ်ထီၣ်အသးလၢဟီၣ် ခိၣ်တုၤဆူမူခိၣ်, ဃုာ်ဒီးမူခိၣ်ကလူးတဖၣ်လဲၤထီၣ်က့ၤလီၤလၢအဖီခိၣ်န့ၣ်လီၤ. 13ဒီးယွၤအိၣ်ဆၢထၢၣ်လၢအကပၤဒီးစံးဝဲ, “ယမ့ၢ်ယွၤ, စီၤအၤဘြၤဟၣ်ဒီးစီၤအံၤစဲးအကစၢ်ယွၤန့ၣ်လီၤ. ယကဟ့ၣ်နၤဒီးနစၢၤနသွဲၣ်တဖၣ်လၢကီၢ်အံၤလၢနမံလီၤလၢအဖီခိၣ် အံၤန့ၣ်လီၤ. 14အဝဲသ့ၣ်အနီၣ်ဂံၢ်ကအါဝဲဂီၢ်ဝဲဒ်ဟီၣ်ခိၣ်အကမူၣ်ကမှံၤအဖီးတဖၣ် လၢဟီၣ်ခိၣ်လိၤအသိးန့ၣ်လီၤ. ဒီးကမၤလဲၢ်ထီၣ်အကီၢ်ဆူတၢ်လီၢ်ကိးကပၤဒဲးဒီးယကဆိၣ်ဂ့ၤပှၤ ကလုာ်ခဲလၢာ်ခီဖျိနၤဒီးနစၢၤနသွဲၣ်တဖၣ်န့ၣ်လီၤ. 15ဒီးသ့ၣ်နီၣ်လၢယကအိၣ်ဒီးနၤဒီးဒီဒၣ်အိၣ်ပှိၤနၤဖဲနလဲၤတၢ် တပူၤလၢ်လၢ်, ဒီးယကဟဲက့ၤစိာ်နၤဆူကီၢ်အံၤတက့ၢ်. ကယဲၢ်တၢ်လၢယအၢၣ်လီၤနၤတဖၣ်န့ၣ်တချုးယမၤလၢထီၣ်ပှဲၤထီၣ်ဒံး ဘၣ်ဒီးယတလဲၤသဒၣ်ဘၣ်နၤဘၣ်.”
16ဒီးစီၤယၤကိာ်ပၢၢ်ထီၣ်ဒီးစံးဝဲ, “ယွၤအိၣ်ဖဲအံၤလီၤ. ယွၤအိၣ်ဖဲတၢ်လီၢ်အံၤဒီးယတသ့ၣ်ညါတ့ၢ်ယဲဘၣ်.” 17ဒီးစီၤယၤကိာ်ပျံၤတၢ်ဒီးစံးဝဲ, “တၢ်လီၢ်တပူၤအံၤမ့ၢ်တၢ် လီၤပျံၤအလီၢ်ဆံးဒိၣ်လဲၣ်. တၢ်လီၢ်အံၤကဘၣ်မ့ၢ်ဝဲကစၢ်ယွၤအဟံၣ်လီၤ. ကဘၣ်မ့ၢ်ကျဲစၢၤအိၣ် အိးထီၣ်အသးဆူမူခိၣ်န့ၣ်လီၤ.” 18စီၤယၤကိာ်ပၢၢ်ထီၣ်ဂီၤဂီၤလၢမုၢ်ဆ့ၣ်ထီၣ်တနံၤဒီးဟံးန့ၢ် လၢၢ်လၢအတခၢၣ်ဝဲဒီးပာ်ထီၣ်ဝဲဒ်တၢ်သ့ၣ်နီၣ်တမံၤအသိးန့ၣ်လီၤ. ဒီးလူလီၤဝဲသ့ၣ်စၤယံးအသိလၢအဖီခိၣ်ဒ်သိးကပာ်စီဆှံထီၣ် ဝဲဆူကစၢ်ယွၤအအိၣ်န့ၣ်လီၤ. 19ဒီးကိးဝဲတၢ်လီၢ်အံၤလၢဝ့ၢ်ဘ့ၤသ့လးန့ၣ်လီၤ. (ဝ့ၢ်လၢအအိၣ်ဖဲအံၤန့ၣ်တဘျီဘၣ်တၢ်သ့ၣ်ညါတ့ၢ်အီၤဒ်ဝ့ၢ်လူး စးအသိးန့ၣ်လီၤ.) 20ဒီးစီၤယၤကိာ်မၤတၢ်ဆိၣ်တမံၤဒီးယွၤစံးဝဲ, “နမ့ၢ်အိၣ်ဒီးယၤဒီးဒီဒၣ်အိၣ်ပှိၤယၤလၢယတၢ်လဲၤတၢ်က့ၤ အပူၤဒီးဟ့ၣ်ယၤတၢ်အီၣ်တၢ်အီဒီးတၢ်ကူတၢ်သိး, 21ဒီးယမ့ၢ်ဟဲက့ၤတုၤပူၤဒုၣ်ပူၤဒါဆူယပၢ်အဟံၣ်န့ၣ်ဒီးနကမ့ၢ် ယကစၢ်ယွၤန့ၣ်လီၤ. 22တၢ်သ့ၣ်နီၣ်ထီၣ်အလၢၢ်လၢယပာ်လီၤအီၤအံၤကမ့ၢ်တၢ်လီၢ်လၢနဘၣ်တၢ်ဘူၣ်ထီၣ်ဘါထီၣ်နၤဒီးယကဟ့ၣ်နၤကယဲၢ်တၢ်လၢနဟ့ၣ်ယၤအကျါဆံဆဲၣ်ပူတပူန့ၣ်လီၤ.”
Markert nå:
လံာ်တၢ်ကဲထီၣ်အခီၣ်ထံး 28: KSWC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sgaw Karen Common Bible © Bible Society of Myanmar, 1992.
