GÉNESIS 12
12
Diospa Abramta waqyasqan
1Señor Diosmi Abramta nirqan:
—Ripuy hallp'aykimanta, aylluykimanta, taytaykiq wasinmanta, rikuchisqayki chay hallp'aman. 2Mirayniykikunatan ancha hatun suyuman tukuchisaq, saminchasqaykin, anchatapunin hatunyachisqayki, hukkunapaqtaq samincha kanki.
3Saminchaqniykikunatan saminchasaq,
ñakaqniykikunatan ñakasaq,
kay pacha lliw ayllukunan ninqaku:
Abramta hina saminchaway, nispa.
4Hinaqtinmi Abramqa Señor Diospa nisqanman hina ripurqan, Lotpas paywan ripullarqantaq. Haranmanta lloqsipushaspataq Abramqa qanchis chunka phisqayoq watayoq karqan. 5Paymi Sarai warminta pusarikurqan, wawqenpa churin Lot-tapas, hinallataq Haranpi lliw tarisqankunatapas, tarisqanku runakunatapas, hinaspanmi lloqsirqanku Canaán hallp'aman ripunankupaq. Canaán hallp'aman chayaspankutaq 6Abramqa chayninta rirqan Shehempi yupaychana cheqaskama, chaypin Moré kashan terebinto sach'ayoq. (Canaán runakunataq chaypacha chayneqpi kasharqan). 7Señor Diostaq Abramman rikhurispa nirqan:
—Mirayniykimanmi kay hallp'ata qosaq, nispa.
Hinaqtinmi rikhuriqnin Señor Diospaq chaypi altarta perqarqan. 8Chaymantataq rirqan Betel chimpa inti lloqsimuy kinray orqo-orqoman, hinaspan inti haykuy kinray Betel llaqta inti lloqsimuy kinray Hai llaqta chawpipi karpanta sayarichirqan. Chaypipas Señor Diospaq altarta perqallarqantaqmi, hinaspan Señor Diosmanta mañakurqan. 9Chaymantataq Abramqa hatarispa Neguev kinrayman asta-astarikuspa rirqan.
10Chay suyupitaq yarqay karqan, hinan Abramqa Egiptoman rirqan chaypi pisi tiempolla tiyamunanpaq, chay suyupi sinchi yarqay kaqtin. 11Egiptoman haykushaspataq warmin Saraita nirqan:
—Qanqa sumaq rikch'ayniyoqmi kanki, 12Egipto runakuna rikuspasuykiqa ninqakun: “Warminmi”, nispa, hinaspanmi ñoqata wañuchiwanqaku, qantataq mana wañuchisunkikuchu. 13Kunanqa, niykapuway panay kasqaykita, qanrayku ñoqa allin rikusqa kanaypaq, hinaspa mana wañuchiwanankupaq, nispa.
14Egiptoman Abram haykuqtintaq, Egipto runakunaqa warminta rikurqankupuni ancha sumaq rikch'ayniyoq kasqanta. 15Egipto rey Faraonpa kamachikuqninkunapas Saraita rikurqanku, hinaspan paymanta willaykurqanku ancha sumaq rikch'ayniyoq kasqanta, chaymi warmiqa Faraonpa wasinman pusasqa karqan.
16Hinan Faraonqa Abramta warminrayku allinta rikurqan, qorqantaq ovejakunata, wakakunata, asnokunata, qhari kamachikunata, warmi kamachikunata, camellokunatapas. 17Señor Diostaq ichaqa Faraonta wasinpi kaqkunatawan manchayta muchuchirqan Abrampa warmin Sarairayku. 18Chaymi Faraonqa Abramta waqyaspa nirqan:
—¿Imatataq kaytari ruwaykuwanki? ¿Imanaqtintaq mana willawarqankichu warmiyki kasqanta? 19¿Imanaqtintaq niwarqanki:
—Panaymi, nispa? Paytan warmiy kananpaq yuyaykachiwarqanki. ¡Kayqa warmiyki, pusakapuy, hinaspa ripuy! nispa. 20Hinaspanmi Faraonqa runankunata kamachirqan Abramta, warmintawan, lliw kaqnintinta pusarqonankupaq.
Markert nå:
GÉNESIS 12: QC88
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Biblia en Quechua de Cuzco © Sociedades Bíblicas Unidas, 1988.
