Make 13
13
Ipanci ni Yeso o kakavakava no rako a panaralayan
(Matay 24:1-2; Locya 21:5-6)
1Makowbot si Yeso a apo do rako a panaralayan am maniring jya o asa ka macinanao jya am, “Cita pala o yatey yapya da nyamaog no vato a panaralayan.” 2Maniring si Yeso am, “Nyo ikalak o yatey yapya so kamamaogan a vahay am mangay o kazdazday da so vato a yada nyamaog sya. So ikabo na rana no vato a mavezed do dang.”
Omanam a alalaw
(Matay 24:3-14; Locya 21:5-19)
3Amyan si Yeso do tokon a meyngaran so Kanlan do katovangan na no rako a panaralayan. Omlisna si Pite a kani Yake a kani Yowani a kani Antele am pacicin da si Yeso. 4Maniring sira am, “Si mango am makaranes o akman sang a vazay. Makongo so wanjin ori si makaranes.”
5Maniring si Yeso jira am, “Azimanen nyo o littan da jinyo no tao. 6Ta amyan so tao a amvood so ngaran ko a manci no ka Kizisto da a ilita da do aro a tao. 7No mamizing nyo o meyyarap do livolivon no pongso nyo am ji kamo anyahey. Ta amyan so akman sang a vazay. Am beken a kavosan na ori no karawan. 8Meyyarap sira o meytarek so itetngehan a kapeyyarap da no teyhesa ka mahataw. So iyan na no rako a kanini a kano abcil do karawan. Am ori rana am papwan na rana so kapakaranes na rana no alalaw do teyrahem.
9“Azimanen nyo, ta rakpen da inyo a yangay do pacicicyan a kabakbak da jinyo do peyneynozyan, do kararalay nyo nyaken. So ikanoyong nyo a meylimwang no Mapasaray a Ciriciring na ni Ama ta do to do tangain da no panirsirngen a kano meymatmatngeh no teyhesa ka mahataw. 10Am manmanma kapeylimwang na no Mapasaray a Ciriciring na ni Ama ta do to do tao do peycyamahamahatawan a kakavos na rana no karawan. 11No rakpen da inyo a yangay do pacicicyan am ji nyo a ratan o ciring nyo a ipasapa nyo jira. Ta sidongen na inyo ni Ama ta do to a mapasapa jira. Ta o ipasapa nyo jira am beken a monganay jinyo. Ta omaing do Seyzi na ni Ama ta do to a ciriciring a pasapahen nyo. 12No si marateng o araraw no nang am ipanazang da no tao o meysinogat a kakteh da a wakwaken no tao. So icyakman na sang no ama da do ananak da. O ananak da am ioya da sira o inyapwan da manci no kawakwak da sira no tao. 13Pacioyyan da inyo a omraralay nyaken. Am o to ngotokot a jyahayo so nakem a omraralay nyaken am mahap da o to meyyonong a ikavyay no pahad da.
Tey manganyahey a alalaw
(Matay 24:15-28; Locya 21:20-24)
14“Macita nyo o mapaoya a somazovaz si Ama ta do to#13:14 Taniar 9:27; 11:31; 12:11. a mangay da patneken do ji nyo mamyapyan a tankan na. (No vilangan nyo a ciring eya am to nyo na naknakma o peypeypangayan na.) No si marateng ori am o meyvahay do Yotay am mangay sira tomayo do takey. 15So ji da ranandepi no tao do vahay da a mangap so apzapzatan. 16O amyan do nihakawan da am ji rana ngoli a mangap so ayob da. 17No marateng o araraw ori am to sira makasi o mamlis so kanen a kano mangahanas a mavakes. 18Mapasyasi kamo ji Ama ta do to a kaji na makaransan no akman sang a vazay do ahemyan. 19Ta o akman rana sang a alalaw do araraw am abo pa o akman sang no kamaog na so karawan ni Ama ta do to. So ikabo na no akman sang no makwa. 20No ji na pazikenkeni ni Ama ta do to o araraw no akman sang a alalaw do teyrahem am abo tao a mavyay. Am na kapakanakem so na nipamnekan a yamraralay nya a tao. Ori o na pazikenkenan do araraw no alalaw do teyrahem.
21“No amyan so tao a manci nya jinyo so, ‘Oya do jya si Kizisto. Ori do kwang si Kizisto,’ am ji nyo nganoyngi. 22Ta amyan so tao no makwa a manci no ka si Kizisto da kano malas so ipangnanao a tao. Sira rana am meyvazay sira so mapangyangyalak a vazay a ipeycyakawad da do nipamnekan na ni Ama ta do to a yamraralay nya tao. 23Azimanen nyo. Ta ko rana nipanmanma a ipanci jinyo o akman sang a vazay.
No mai o Nipamnekan na ni Ama ta do to a tao
(Matay 24:29-31; Locya 21:25-28)
24“No mavitos rana o aro a alalaw ori do araraw am to rana kedep o araw. Ji rana manikap o vehan. 25Makas rana o mata no hanit. Mablis rana o masamasaod no hanit.”#13:25 Isayya 13:10; 34:4. 26No si marateng rana ori am meytotwaw ko rana a Nipamnekan na ni Ama ta do to a tao do cinalab a meygegcin no rako a oyowyat ko a kano azwazway ko. 27Pasonsonen ko o tinsi a mangay do peycyamahamahatawan a kalovot ko sira so nipamnekan na ni Ama ta do to a tao a apo do teyhesa ka mahataw.
Pehngehngain na o nanao na do kayo
(Matay 24:32-35; Locya 21:29-33)
28“To nyo na nita o voovoong no ovako a kayo. No to naod rana do yangayangaw na am to nyo na tenngi o ka teyteyka na. 29Akman sang an, ta no macita nyo o makakaday a alalaw do teyrahem am makeykai ko rana a mai. 30Manakem nyo an, ta amyan kamo pa tao sicyakwaya am makaranes rana o akman sang a vazay. 31Mabalinas o hanit a kano teyrahem. Am jyablis o ciring ko a mangay do kaidan no karawan.
Abo tao a makateneng do araraw ang
(Matay 24:36-44)
32“Am abo tao a makateneng do araraw no yai ko. Tana tinsi am ji da tenngi. Akman sang o Anak na ni Ama ta do to a ji makateneng jya. Ta si Ama ta do to o makateneng jya. 33Azimanen nyo. Yokain nyo o onowned nyo. Ta ji nyo a tenngi o ipakaranes no araraw ang. 34Akman so tao a mangay mangilili a tomoro no makakaday a vazay do lamlamsoy na peyvazain da a kapanci na rana no mangiwangiwang so pazevngen a lamlamsoy na a ji mapaitkeh so kataotao na. 35Am ori an ipeytataziman nyo. Ta ji nyo a tenngi o yai no mapeyvahay sya tao. Ala mai do maseyrem. Ala mai do avak no ahep. Ala mai do ikaraw na rana. Ala mai do peysibwen no tao. 36No si ji mapaziman a mai a kapakacita na jimo a mitkeh am jyabo kapya mo a. 37O yako ipanci jinyo am inyo a aro a tao o ko peycirngan sya. So ipeytataziman nyo!”
Markert nå:
Make 13: snt
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible Society in Taiwan
