Make 10
10
Nanao so mapasyay so kataned do vahay
(Matay 5:31-32; 19:1-12; Locya 16:18)
1Karwan na rana ni Yeso do dang a kapeyhavas na do ayo a meyngaran so Yotan a meypangay do Yotay. Macita da sira no aro a tao am meysinsinmo sira do tangain ni Yeso. Akman sang a amnanao sira.
2O tatasa ka tao a macyagom do Vadisay am mangay sira ji Yeso. Naknakmen da o keyleylamdam da sya. Maniring sira jya am, “Ikongo yadomket do iwawalam ta do mahakay a mapakaro so kataned na do vahay. Pancyan pala jyamen.” 3Makarahan am olin na sira pacicin ni Yeso. Maniring jira am, “Ikongo o ciring na ni Moyse.” 4Maniring sira am, “Apyahen ni Moyse o kapeyvatvatek so vakong a itoro do pakarwen a mavakes a kapya na rana no akman sang a vazay.” 5Maniring si Yeso jira am, “O nipadketan na so sang ni Moyse am tey rahet kamo jyapasovoy. 6Am no kavayo na pa ni Ama ta do to a mangamaog so karawan am nimangamaog so mahakay a kano mavakes.#10:6 Tswang Se Ci 1:27. 7Am ori rana o karwan da na do inyapwan da no mapapapen a tao a matarek so vahay. 8So icyakma dey yasa ka tao rana meyyaven do vahay.#10:8 Tswang Se Ci 2:24. 9Am ori o jya to meysyai no meyyaven do vahay. Ta nimeysinmo rana sira do tangain ni Ama ta do to.”
10Somdep sira do vahay am malavat da pa o vazay ang no macinanao jya. 11Maniring si Yeso jira am, “O mahakay rana to mapakaro so kataned na do vahay a kapasakay na pa so kadwan am manoyong rana o akman sang a raraten na, do kaji na mapanadnaden so kadwan na do vahay. 12No togcin o mavakes do mahakay na kangay na someksek do kadwan am raraten o akman sang, do kaji na mapanadnaden so kahanghangan na mahakay.”
Ipanlanlag na ni Yeso o kanakan
(Matay 19:13-15; Locya 18:15-17)
13Tatasa ka tao o mangay no kanakan ji Yeso a kapanci da nya a omapwapo sira. Macita da sira no macinanao jya am azahen da sira ioya. 14Macita na sira ni Yeso o macinanao jya omza sira am maoya o aktokto na. Maniring jira am, “Pancyan kamo sira o kanakan a mai jyaken. Ji nyo ngaza sira, ta o italamozong na ni Ama ta do to a tao am akman sira so kanakan eya. 15Ko pa ipanci jinyo am o tao a makza no katalamozong na nira ni Ama ta do to am inarahen da o kanakan a meyhanhan no inyapwan da.” 16Makarahan am sapopowen na o kanakan, kateyteyhesa na sira apwapwen no lima na a ipanlanlag.
Aro so peymeymasaodan a malavayo a tao
(Matay 19:16-30; Locya 18:18-30)
17To rana jyangay si Yeso am to ngyan so asa ka tao a malayo a mangay a meylilitod do tangain na. Maniring jya am, “Mo Mangnanao a tey yapya so nakenakem. Makongo ko so wanjin a kapakahap ko so to meyyonong a ikavyay no pahad ko.” 18Maniring jya si Yeso am, “Ikongo mo pancyan nyaken a apya so nakenakem. Si Ama ta do to o apya so nakenakem am. 19Mo katenngan o iwawalam ni Ama ta do to do kaji mangapan so tao. Ji mangzakza. Ji manakaw. Ji mangamaog so malas a ciring. Ji manlita. Ikaglaw nyo a ikanig o inyapwan nyo.”#10:19 Soayci Ci 20:12-16; Sen Ming Ci 5:16-20. 20Maniring o tao am, “Mo Mangnanao, ko na nimamimin o akman sang a yanimapeyvazay no kalyalikey ko pa.” 21Citahen ni Yeso o tao ori am ikarilaw na. Maniring am, “Yasa pa mo jya nimapeyvazay. Ipanazang mo o peymeymasaodan mo. O ngina na nizpi am ipangarilaw mo so makasi a tao. Ta ori o iyan no kangangay mo do teyngato a kapacihza mo na jyaken.” 22Mamizing na ori no tao ori am to rana meykaraherahet o moing na mangay rana. Ta tey yaro o kangangay na.
23Citahen na ni Yeso o amyan do livolivon na tao am maniring jira am, “Tey masalit sira o aro so kangangay a tao a italamozong ni Ama ta do to.” 24Yeyyak da no macinanao jya o ciring ni Yeso. Maniring pa si Yeso am, “Manoyong, manga keypong, o kaji na to macitapatapasan no italamozong ni Ama ta do to a tao. 25O aro so peymeymasaodan am masalit a italamozong ni Ama ta do to. Mowwamek pa o meykavokovokoz so likod a baka a lomyos do lala no rayom, a kano aro so peymeymasaodan a tao a macikaop do italamozong na ni Ama ta do to.” 26Makarahan am isavasavak da no macinanao jya. Maniring sira do kadwan jira am, “No akman sang am sino o patazadangen na ni Ama ta do to do teyngato.” 27Citahen na pa sira ni Yeso. Maniring jira am, “O masalit do tao am mowwamek ji Ama ta do to. Ta abo ji na peyvazay ni Ama ta do to.”
28Maniring si Pite am, “Cita pala yamen a yato ngaro do yamakakaday a vazay namen a namen kapacilolo jimo.” 29Maniring si Yeso jira am, “To ko na macitangayan jinyo am o mahap so vazay ko a kano meylimwang no Mapasaray a Ciriciring ko a to rana ngaro do vahay da kano kakakteh na kano inyapwan na kano minapodpod jya kano nihakawan da am 30arwaro pa o makadpeh jya do karawan a vahay na kano kakakteh na kano inyapwan na kano minapodpod jya kano nihakawan na. Am amyan so alalaw na do karawan. Am cyaha, ta mahap na no makwa o to meyyonong a ikavyay no pahad na. 31Am o macipanmanma sicyaikwaya am masipanownowji rana no makwa do teyngato. Sira rana nimasipanownowji am masipanmanma rana sira do teyngato.”
Ikeypitlo na rana ni Yeso a manci no kawakwak na a kapirwa na a mavyay
(Matay 20:17-19; Locya 18:31-34)
32Amyan sira do rarahan a meypangay do Yelosaleng am nimamanong dang si Yeso. Makarahan am meytataziman sira o macinanao jya. So icyakman da sang no macihza jira a tao a manyahey. Meyratateng am lovoten na sira o rarwa so ikakarwan a macinanao jya, kapanci na nya jira so omanam a vazay do kataotao na. 33Maniring am, “Citahey kamo, do tamo ipeypangay do Yelosaleng an, da kapanazang nyaken a Nipamnekan na ni Ama ta do to a tao no panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a tao. Ipanci da o kawakwak da jyaken, katoro da nyaken do beken a tao do Yotay. 34Ji da ninigan a cicippan a kasipsipzot da jyaken a kawakwak da jyaken. Am si ikatlo na araw am mirwa ko pa a mavyay.”
Kakzeben ni Yake a kani Yowani a vazay ji Yeso
(Matay 20:20-28)
35O anak ni Sipitay a meyngaran so Yake a kani Yowani am mangay sira ji Yeso. Maniring sira am, “Mo Mangnanao, yamyan so yasa ka vazay a namen kakzeben jimo. Inaoy si apyahen mo.” 36Maniring si Yeso am, “Ikongo nyo kakzeben jyaken.” 37Maniring sira am, “No si amyan ka do peypanirsirngen mo am peysaviken mo yamen do wanan mo a kado ozi mo a palisnahen a meypanirsirngen an.” 38Maniring si Yeso jira am, “Nyo jyatenngi o yanyo kakzeben. Manngwa, mahap nyo o rako a alalaw ko an? Manngwa, meynaran nyo yaken a mangay a mawakwak an?” 39Maniring sira am, “Noon, mahap namen.” Maniring si Yeso jira am, “Manoyong o kapakahap nyo so alalaw ko. Manoyong o kapakeynaran nyo jyaken a wakwaken da. 40Am beken a yaken o mamnek do omlisna do ozi ko a kado wanan ko a meypanirsirngen. Ta o pamnemnekan na ni Ama ta do to a tao o amlisna do dang.”
41Mamizing da ori no asa ngarnan a macinanao jya am ikaoya da si Yake a kani Yowani. 42Am ori o nilovotan na ni Yeso so macinanao jya do tangain na. Maniring jira am, “O panirsirngen rana do teyrahem am abo ji ngamizing so akman sang a tao an. So pancyan da no nang a makayokod nira tao. 43Am inyo rana am ji nyo nginara o akman sang. No si myan jinyo so tao a makza no kaizay na am pavevehen nyo o kataotao nyo a manidong so icyatatao nyo an. 44O makza no kaizay na am inarahen na o lamlamsoy a mapeylamnay so aro a tao. 45Ta o na nyai no Nipamnekan na ni Ama ta do to a tao am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”
Niwakwakan na o mavota tao a meyngaran so Patimay
(Matay 20:29-34; Locya 18:35-43)
46Karwan da o yanan da ili a meyngaran so Yedike ni Yeso a kano macinanao jya kano aro a tao am amyan so mavota tao a anak ni Timay a meyngaran so Patimay a omlisna do siri no rarahan a macikakanen. 47Mamizing na o keyyan na ni Yeso a tao do Nasale am amlololos. Maniring am, “Mo Yeso a sivovoong ni Tawey, ikarilaw mo pa yaken an.” 48Meyratateng am aro tao a omwoya nya do kagalagal na. Am ikeykavevek na amlololos. Maniring am, “Imo rana sivovoong ni Tawey am ikarilaw mo pa yaken an.” 49Makarahan am mina to neyked si Yeso. Maniring am, “Rarrey kamo jya.” Maniring sira do mavota tao am, “Cyaha, tanek rana, ta na ipanci imo.” 50Am ori o mina to na walici no ayob na a katanek na a mangay do tangain ni Yeso. 51Maniring si Yeso jya am, “Ikongo mo kakzeben jyaken.” Maniring o mavota tao am, “Mo Mangnanao, ko ikakza o yako kapakacita.” 52Maniring si Yeso am, “Angay rana, ta mo rana nikapya o mo kapeyhanhan ni Ama ta do to.” So ji na nimeyyahahai a makacita no mavota tao. Makarahan am macihza rana ji Yeso.
Markert nå:
Make 10: snt
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible Society in Taiwan
