Marcos 7
7
Aju in tz'ilix xjal tu'n
Mateo 15.1-20
1Ul kychmon kyib' fariseo tuk'il Jesús, kyuk'ix junjun xnaq'tzal ti'j ley e tzaj tuj tnam Jerusalén. 2Tej kylonte at junjun t-xnaq'tzb'en Jesús in che wa'n ex minti' nne'l kytx'jo'n kyq'ab' ik tza'n in tma'n kyley:
—Mya b'a'n jlu, che chi fariseo. 3(Porke qe fariseo kyuk'ix kykyaqil xjal judiy, nimanxix kyu'n aju ley kyaj b'ant ti'j kyu'n kytijil xjal, kyja'tzun qa minti' ma b'aj kytx'jo'n kyq'ab' ik tza'n in tma'n ley, ax mlay che wa'n. 4Ex ok kyajtz meltz'aj tuj plas, mlay che wa'n qa minti' ma b'aj kytx'jo'n kyq'ab'. Ex nimku txqantl in kyb'incha'n aju in tma'n kyley, ik tza'n tu'n kytx'jet qe vas kyu'n, ex qe xar, ex qe k'il k'uxb'il ex qe watb'il.) 5Xitzun kyqanin fariseo ex qe xnaq'tzal ti'j ley te Jesús:
—¿Tiqu'n minti' in kyb'incha'n t-xnaq'tzb'ena ik tza'nxju kyaj b'ant ti'j kyu'n kytijil xjal? In che wa'n ex minti' nne'l kytx'jo'n kyq'ab'. Che chi.
6Xi ttzaq'we'n Jesús:
—Xmletz' qeye, ax tok aju o tma Isaías kyi'je, aju t-sanjel Dios, ik tza'n tz'ib'an tuj Tu'jil, porke chi Isaías tuj Tu'jil:
Qe xjal lu noq tu'n kytzi' in chin nimanjtze kyu'n, atzunju kyanmi najchaq ta' wi'je.
7Noqx gan in che k'ulun nwitze, porke aju xnaq'tzb'il in kyq'o'n, kymandamyent xjal, chi Isaías.
8Porke in kyaj kyq'o'ne aju tmandamyent Dios, atzunju kyaj b'ant ti'j kyu'n xjal atzunju in b'ant kyu'ne, tu'n kytx'jet qe xar kyu'ne ex qe vas; ex nimku txqantl in kyb'incha'ne ik tza'n qe jlu.
9Ax ikx xi tma'n Jesús kye:
—Ax tok aju tmandamyent Dios nno'k kyq'o'ne minti' tajb'en tu'n tjapun kyu'ne aju kyaj q'ma'n kyeye kyu'n kytijil xjal. 10Porke o tma Moisés: Kynimanxe kymane ex kytxu'ye; ax ikx in tma'n: Alkye ma yasun ti'j tman ex qa ti'j ttxu', il ti'j tu'n tkub' b'yet. 11Atzun kyeye in kyma'ne qa b'a'n tu'n t-xi tma'n jun xjal te tman ex qa te ttxu' kyja': Mlay chin onine ti'ja, ex tkyaqilju at weye Corbán. (Aju yol Corbán atzun in tma'n, ma txi nq'o'ne te Dios te jun oyaj.) 12Tu'n jlu in xi kymayo'ne tu'n mi'n tonin xjal te tman ex qa te ttxu'. 13Kyja'tzun nno'k kyq'o'ne tyol Dios te minti' tajb'en, tu'nju yol kyaj q'ma'n kyeye, ex wiqinwiq tkyaj kymane kye kyk'wa'le. Ex nimku in kyb'incha'ne ik tza'n jlu.
14E tzaj ttxko'n Jesús qe xjal ex xi tma'n kye:
—Kyb'intze nyole kykyaqile, ex tz'elx kynik'e ti'j: 15Aju in xi' tu'n xjal, mlay tz'ilix tuj tanmi tu'n, atzunju in jatz tuj tanmi xjal, atzunju in tz'ilsante tuj tanmi xjal. 16[Alkye at t-ẍkyin, b'inx ju yol lu.]
17Tejtzun tel tpa'n tib' Jesús kyi'j xjal, okx tuj ja. Xitzun kyqanin qe t-xnaq'tzb'en ti t-xilen ju techal lu. 18Xi tma'n Jesús kye:
—¿Maj ikx kyeye minti' nne'l kynik'e ti'j? ¿Minti'pe nne'l kynik'e ti'j, aju in xi' tu'n xjal mlay tz'ilix tuj tanmi tu'n? 19Porke minti' nno'kx tuj tanmi, noq o'kx in ku'x tuj tk'u'j, ex nne'x tk'u'jin.
Tma Jesús jlu tu'n tel kynik' ti'j qa b'a'n tchyo'njtz tkyaqil chib'j. 20Ex tmatl Jesús:
—Aju in jatz tuj tanmi xjal, atzunju in tz'ilsante tuj tanmi. 21Porke tuj kyanmi xjal in jatz kyximb'etz mya b'a'n, tu'n kyb'inchante aj pajil, tu'n kyyaẍin, tu'n tkub' kyb'yo'n jun xjal, 22tu'n kyelq'an, tu'n tpon kyk'u'j ti'j nimku, tu'n kyb'inchante mya b'a'n, tu'n kysb'un, tu'n mi'n kyjak'unte kyib', tu'n ttzaj tlo'ch kyk'u'j, tu'n tb'ant jun simj yol, tu'n kyok puro jawni qe, ex tu'n kyok minti' kynab'l. 23Tkyaqil jlu mya b'a'n tuj tanmi xjal in jatz, ex in tz'ilix tuj tanmi xjal tu'n, chi Jesús kye.
Jun xu'j stranjer xjal xi toksla'n tyol Jesús
Mateo 15.21-28
24Ik'tzun Jesús tuj lugar lu, xi' tuj tx'otx' jatum ate' qe tnam Tiro tuk'ix Sidón. Okxtzun tuj jun ja posadiyil, o tajb'e tu'n mi'n kyb'inte xjal, ex minti' tumel tu'n tten tuj ewaj. 25Tu'nju at jun xu'j at jun tal txin at ju'ẍ tuj tanmi; tej tb'inte xu'j tqanil ti'j Jesús, pon naj tuk'il ex kub' ẍmeje' t-xe tqan. 26Ate xu'j lu aj Sirofenicia, mya judiy xjal, ex kub'san twitz Jesús tu'n tetz tlajo'n Jesús ju'ẍ tuj tanmi txin aju tal. 27Atzunte Jesús xi tma'n te:
—E tnoj kyk'u'j k'wa'lb'aj nej, porke mya b'a'n tu'n tel q'i'n kywa k'wa'lb'aj ex tu'n t-xi q'ot kye tx'yan, chi Jesús te.
28Xi ttzaq'we'n xu'j:
—Ax tok Tat; pero qe tx'yan in che wa'n tjaq' mes ti'j tb'uchil kywa k'wa'lb'aj, chi xu'j.
29Xi tma'n Jesús te xu'j:
—Tu'nju yol lu ma tzaj tma'na b'a'n tu'n taja, ma tz'etz ju'ẍ tuj tanmi tala, chi Jesús te.
30Tejtzun tpon xu'j tja, lu tal koẍl twitz watb'il, otoq tz'etz ju'ẍ tuj tanmi.
Jun xjal chkyin twi' ex men, b'anix tu'n Jesús
31Ajtztzun meltz'aj Jesús tuj tx'otx' jatum ta' tnam Tiro, ik' aj tuj tnam Sidón, ex ik' aj tuj tx'otx' Decápolis tb'i, pon ttzi laguna tuj Galilea. 32Ul kyi'n xjal jun xjal twitz Jesús, chkyin twi' ex men, ex e kub'san twitz Jesús tu'n tkub' tq'o'n tq'ab' tib'aj. 33El tlaq'b'an tib' Jesús kyi'j xjal, xi ti'n ju xjal men, okx tq'o'n tal tq'ab' tuj t-ẍkyin, ex ok ttzub'an twi tq'ab', ok tmako'n taq' xjal. 34Jawtzun tke'yin Jesús twitz kya'j, in xjiq'b'an tk'u'j ex tma:
—Efata. (Atzun in tma'n ju yol lu, kjaqetel t-ẍkyina.)
35Te jurat naj e jaqet qe t-ẍkyin xjal, ex b'ant naj tyolin clarxix wen. 36Xi tkyuwsa'n Jesús kye tu'n mi'n tel tqanil kyu'n; maske nimku maj xi tma'n Jesús kye, atzun kye mas el tqanil kyu'n. 37Nimxix e lab'in xjal ti'j, in kyma'n:
—B'a'n tkyaqilju in tb'incha'n: qe chkyin in b'ant kyb'in tu'n, ex qe men in b'ant kyyolin tu'n.
Markert nå:
Marcos 7: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
