Génesis 12
12
Txokb'il te Abram tu'n Dios
1Tma Qman te Abram kyja': Tetza tuj ttanmiya, kyxol qe t-xjalila ex tuj tja tmana, ex txi'ya tuj tx'otx' kxel nyek'une teya. 2Ti'ja kb'el nb'incha'ne jun nasyon ma'xix, kb'el nq'o'ne nky'iwb'ile tib'aja, kjawil nnimsa'ne tb'iya, ex k'okela te jun ky'iwb'il kye txqantl xjal. 3Che b'el nky'iwla'ne qeju che b'el ky'iwlante teya, ex ktzajel nq'o'ne mya b'a'n kyib'aj qeju che tzajel qaninte mya b'a'n tib'aja; ex noq ti'ja che ky'iwlanjtzel kykyaqil xjal twitz tx'otx', chi Qman.
4Etztzun Abram tuj tnam Harán ik tza'nx otoq tma Qman te; ex tuk'ix Lot etz tuk'il. Otoq japun Abram twi' 75 ab'q'i tej tetz tuj tnam Harán. 5Tzaj ti'n Sarai tuk'il, aju t-xu'jil, tuk'ix Lot aju tky'ajal terman, ex xi kyi'n tkyaqil kyq'inumab'l aju otoq knet kyu'n, kyuk'ix qe kymajen aqeju otoq che knet tuj tnam Harán. Kub'tzun b'e kyu'n tu'n kyul tuj tx'otx' Canaán, ex tuj tx'otx' Canaán e ul. 6Tzajtzun b'et Abram tuj tx'otx' lu ex ul tuj Siquem, kanun t-xe' jun wi' tze' k'ol tuj lugar More. Tuj tq'ijlalil lu atzun najltoq qe aj Canaán. 7Atzun kub' tyek'un tib' Qman twitz Abram ex xi tma'n te kyja': Atzun tx'otx' lu kxel nq'o'ne kye tiyjila, chi Qman.
Tujtzun lugar lu jaw tb'incha'n Abram jun altar twitz Qman aju kub' tyek'un tib' twitz.
8Ik'tzun tuj lugar lu tu'n tul twi' jun witz ttxlaj tnam Betel tuj tjawitz q'ij. Atzun kub' tq'o'n tja, xb'alun ja, t-xol kab'e tnam; atzun tkub' tnam Betel tuj telex q'ij, atzunte tnam Hai tkub' tuj tjawitz q'ij. Tujtzun lugar lu jaw tb'incha'n Abram juntl altar tu'n tk'ulun te Dios, ex o kub'san twitz Qman. 9Tzajtzun b'et Abram tuj lugar lu tu'n tul tuj tx'otx' Néguev.
Pon Abram tuj Egipto
10Tujtzun tq'ijlalil lu tzaj nim we'yaj tuj tx'otx' Canaán. Xi'tzun Abram tuj Egipto tu'n tnajan nik'xi q'ij ma chixin, tu'nju nimxix we'yaj tzaj jatum najltoq. 11Tejtzun ch'ixtoq tpon tuj Egipto xi tma'n te Sarai aju t-xu'jil: B'a'n wu'ne tb'anilxix ke'yina, 12ex ok tok ke'yina kyu'n qe aj Egipto oklo kyma': T-xu'jil xinaq lu aju xu'j lu, che chilo. Oklo chin b'el b'yo'ne kyu'n, atzun teya mlay kub' b'yo'na kyu'n. 13Tu'ntzun jlu, b'inchama xtalb'il, b'ix txi tma'na: Tanb' xjal lu qine, chikuya, tu'ntzun ntene b'a'n ex tu'n mi'n nkub' b'yo'ne tu'n tlaja.
14Tejtzun tpon Abram tuj Egipto, ok kyke'yin qe aj Egipto tb'anilxix ke'yin t-xu'jil. 15Ax ikx ok kyke'yin qe aj sanjelal ate'k ttxlaj Faraón. E je'xtzun q'malte te: Tb'anilxix ke'yin xu'j lu, che chi. Xitzun kyi'n tuj tja Faraón.
16Tu'n tlaj Sarai tb'incha Faraón nimxix xtalb'il te Abram, ex xi tq'o'n qe ẍne'l te, kyuk'ix wakẍ, bur, chej camey, majen xinaq ex majen xu'j. 17Ex tu'n tlaj Sarai kub' tcastiw Faraón tu'n Qman, ex kyuk'ix qeju ate'toq tuj tja, tzaj nimxix yab'il kyi'j. 18Tzajtzun ttxko'n Faraón Abram ex xi tma'n te kyja': ¿Tiqu'n ma tb'inchaya jlu wi'je? ¿Tiqu'n mi tzaj tma'na weye qa t-xu'jila aju xu'j lu? 19¿Tiqu'n o tmaya qa tanb'a xu'j lu? Kyja'tzun tzaj wi'ne tu'n tok te nxu'jile. Ja'lotzun, lu t-xu'jila lu. Q'inxa ex txi'ya, chi Faraón. 20Xitzun tma'n Faraón kye t-xjalil tu'n tex kyi'n Abram tuj Egipto junx tuk'il t-xu'jil ex tkyaqilju attoq te.
Markert nå:
Génesis 12: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
