Hechos 5
5
Ananías tuk'ix Safira o che nik'an yol
1Ex attoq juntl xinaq Ananías tb'i, ex Safira tb'i t-xu'jil, xi kyk'ayin jun piẍ kytx'otx'. 2Ex b'ant ti'j tu'n tuk'il t-xu'jil tu'n tkyaj kytzyu'n ch'in twi tx'otx' te kye; noqtzun mijx ul ti'n, ex xi tq'o'n tuj kyq'ab' apostol. 3Xitzun tma'n Pedro te:
—Ananías, ¿tiqu'n ma txi tq'o'na amb'il te Satanás tu'n tokx tuj tanmiya tu'n tnik'ana yol twitz Xewb'aj Xjan, ma kyaj ttzyu'na mij twi tx'otx'? 4¿Na'nxtoq t-xi tk'a'yina tx'otx', myapetzun teya? ex tej t-xi tk'a'yina tx'otx', ¿myapetzun tuj tkwenta ta' twi'? ¿Tiqu'n ma kub' t-ximana tuj tanmiya ikju? Mya twitz xjal ma nik'ana yol, noq o'kx twitz Dios.
5Tejtzun tb'inte Ananías ju yol lu, kub' tz'aq ex kyim. Tzajtzun nim kyxob'il kykyaqil qeju e b'inte jlu. 6E ultzun junjun ku'xun, okx kyb'alq'i'n t-ximlal Ananías tuj jun xb'alun, ex kyi'n ex ku'x kymaqu'n.
7Matoq ox or tb'ajlen jlu tej tul t-xu'jil Ananías, okx tuja minti' b'a'n tu'n ti otoq b'aj ti'j tchmil. 8Xitzun tqanin Pedro te:
—Q'mantza, ¿ikpetzun twi tx'otx' xi kyk'ayine ik tza'n ma kymaye?
Atzunte xu'j tma:
—Iktzun twi'ju.
9Xitzun tma'n Pedro te:
—¿Tiqu'n xb'ant ti'j kyu'ne tu'n tok T-xew Qman tuj joyb'il ti'j kyu'ne? B'inxa, lu ma che ul qe ku'xun ttzi ja, aqeju ma che'x aj maqulte tchmila; ikxtzun k'elex q'i'na kyu'n.
10B'i'x kub' tz'aq naj ju xu'j t-xe tqan Pedro ex kyim. Tejtzun kyokx qe ku'xun tuja, otoq kyim te xu'j; etztzun kyi'n, ex ku'x kymaqu'n ttxlaj tchmil. 11Tzajtzun nim kyxob'il kykyaqil okslal, ex tzaj kyxob'il kykyaqil xjal aqeju e b'inte jlu.
Kyb'incha apostol qe b'inchb'en nim kyipumal ex nim señ
12Ex nimku kyb'inchb'en apostol nim kyipumal ex nimku qe señ kyb'incha kyxol xjal tu'n tipumal Dios; ex junxtoq kychmon kyib' kykyaqil twitz ja te Salomón tb'i. 13Atzun kye txqantl xjal minti' ok kynimarin kyib' tu'n tok kymojb'an kyib' kyuk'il apostol; ex e yolin b'a'n kyi'j. 14Ex nimku xjal e okslan ti'j Qajaw; tkyaqil q'ij kukx in che okslan tza'nx qe xinaq ax ikx qe xu'j; 15kyja'tzun e je'tz q'i'n qe yab' ttzi b'e, ex kub' kyq'o'n twitz watb'il ex twitz koẍb'il, ichaq noq t-xlekumal Pedro tzik' aj kyib'aj yab' ok tik' tuj b'e. 16Ax ikx nimku xjal in che tzajtoq kyuj qe tnam niqayin ttxlaj Jerusalén, e ul tuj Jerusalén q'i'n qe yab' kyu'n ex qeju in che yajlanjtz kyu'n ju'ẍ, ex kykyaqil e b'anix.
Tej tyajlanjtz Pedro tuk'ix Juan
17Jawtzun we' ju nejenel kye pal kyxol judiy kyuk'ix qe tuk'il, aqeju jun k'loj xjal saduceo kyb'i, ex tzaj tlo'ch kyk'u'j kyi'j apostol; 18ex e tzaj kytzyu'n qe apostol, e okx kyq'o'n tuj pres tuj tnam. 19Ex ul jun t-anjel Qman te qonik'an, e jaqet qe tlamel ja tu'n jatum ate' qe pres, e je'tztzun ti'n qe apostol, ex xi tma'n kye:
20—Kyxi'ye, ex che we'kuye tuj tja Dios, ex kymanxe kye xjal tqanil yol te chwinqlal, chi anjel.
21Tejtzun kyb'inte qe apostol ju yol lu, e okx tuj tja Dios te prim ex xi kyq'o'n xnaq'tzb'il kye xjal.
B'ajtzun kychmon kyib' qe nejenel kye pal kyxol judiy kyuk'ix qe kyuk'il, ex e je'x txokb'aj qe Aj Sanjelal kye xjal judiy kyu'n, ax ikx kykyaqil qe kytijil xjal aj Israel, ex xitzun kysama'n qe polisiy q'ilte kye apostol tuj pres. 22Tejtzun kypon qe polisiy minti' e knet qe apostol kyu'n tuj pres; e ajtztzun meltz'aj q'olte tqanil, 23che chi kyja':
—Ax tok aju kyja pres ma knet qu'ne lamo'nxix wen, ex qe xq'uqil pres ma che knet qu'ne wa'l qe ttzi tlamel ja; ex tej xjaqet qu'ne, mi jun xjal at tuj, che chi.
24Tejtzun tb'inte nejenel kye xq'uqil tja Dios aju yol lu, kyuk'ix qe nejenel kye pal, tzaj jun kyximb'etz ti'j jatum kpol we' tkyaqil jlu. 25Ex ul jun xjal kyuk'il tzaj tma'n tqanil kye, chi kyja':
—Aqeju xinaq okx kyq'o'ne tuj pres, lu qe ate' tuj tja Dios, in kyq'o'n xnaq'tzb'il kye xjal.
26Xi'tzun aju nejenel kye polisiy kyuk'ix qe polisiy, ex cheb'a e tzaj kyi'n, ex tzaj kyxob'il tu'n mi'n kyok xo'n tu'n ab'j kyu'n xjal. 27E ultzun q'i'n apostol kywitz Aj Sanjelal kye xjal judiy, ex xitzun tqanin nejenel kye pal kye apostol, chi kyja':
28—¿Minti'pe xi kyb'i'ne aju orden xi qq'o'ne kyeye tu'n mi'n t-xi kyq'o'ntle xnaq'tzb'il ti'j xjal lu? Atzun ja'lo ma kyb'i kykyaqil xjal aju kyxnaq'tzb'ile tuj tkyaqil Jerusalén, ex kyajb'ile tu'n tok kyq'o'ne te qeye qil aju tkyimlen ju xjal lu, che chi.
29Xi kytzaq'we'n Pedro ex qe txqantl apostol:
—Tnejel ilxix ti'j tu'n t-xi qnimane Dios, ex mya qe xjal. 30Aju Kydios qxe'chel jaw anq'in Jesús tu'n, aju jaw kyyob'ine twitz jun crus, ex kub' kyb'yo'ne. 31Ate jlu ma jaw tnimsa'n Dios, ma kub' tq'o'n ttxlaj tuj b'anq'ab'aj tu'n tok te Nejenel ex Kolol, tu'ntzun tajtz ti'j kyanmi aj Israel ex tu'n tnajset kyil. 32Ex testiw qo'ye ti'j tkyaqil jlu, ax ikx te Xewb'aj Xjan testiw ti'j, aju ma tzaj tq'o'n Dios kye qeju in che niman te, che chi apostol.
33Tejtzun kyb'inte Aj Sanjelal jlu, tzaj nimxix kyq'oj, ex o kyajb'e tu'n kykub' b'yo'n apostol kyu'n. 34Ex at jun fariseo kyxol Aj Sanjelal, Gamaliel tb'i, chik'b'al ti'j ley, ex nimanxix kyu'n kykyaqil xjal. Kub' we' Gamaliel ex xi tma'n tu'n kyetz q'i'n qe apostol ttxa'n pe'n noq te ch'in tuj. 35Xitzun tma'n kye Aj Sanjelal:
—Aqeye xinaq aj Israel, kyq'o'nke kwent ti'j ju ok kyb'incha'ye kyi'j xjal lu. 36Porke na'n kyu'ne, ela'xi q'ij ul jun xjal Teudas tb'i, tma qa ma' toklen. Ex atlo kyaje syent xjal e ok lpe' ti'j. Ex kub' b'yo'n Teudas ex kykyaqil qeju e ok lpe' ti'j e je'l sputj ex e kub' naj. 37Tb'ajlenxi jlu ul jun xjal Judas tb'i, aj Galilea; ul tuj tq'ijlalil tu'n ttz'ib'anjtz kyb'i xjal, ex nim xjal e ok lpe' ti'j. Ax ikx kub' b'yo'n te jlu, ex kykyaqil qeju e ok lpe' ti'j e el sputj. 38Ja'lotzun kxel nma'ne kyeye: Mi'n tz'ok kyq'on kyib'e kyi'j xjal lu, ex mi'n che lab'te kyi'j; ex qa kyu'n xjal aju kyximb'etz lu ex ju kyaq'un, k'okel yupjtzun; 39ex qa tu'n Dios, mlay b'ant tu'n tyupj kyu'ne; atwit tchi tuj kywitze, mya yajku ti'j Dios in che q'ojine, chi Gamaliel.
40Xitzun kyniman tyol Gamaliel; e tzajtzun kytxko'n qe apostol ex e b'aj kyasyalin, ex xi kyma'n kye tu'n mi'n kyyolintl ti'j Jesús, ex e je'xtzun kytzoqpi'n. 41E je'tztzun qe apostol kywitz Aj Sanjelal in che tzalaj tu'nju b'a'n ela tuj twitz Dios tu'n tkub' kych'ixwi kywitz xjal, noq tu'n tlaj okslal qe ti'j Jesús. 42Ex tkyaqil q'ij minti' xi kykolin tu'n t-xi kyq'o'n xnaq'tzb'il tuj tja Dios ex tujile kyja xjal ex tu'n t-xi kypakb'a'n tqanil b'a'n ti'j Jesús aju at toklen tu'n Dios.
Markert nå:
Hechos 5: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
