GÉNESIS 8
8
Uma taripäwin tukusxatapa
1Diosasti, Noé chachata, jupamp chika arca manqhankapkän taqi uka animalanakat amtasïna. Uraqirusti mä thaya thayt'ayanïna, ukatsti umax wañaqañ qalltxäna; 2lamar qutan jalsunakapasa, alaxpachan punkunakapas jist'antasxänwa. Jallux janiw purkxänti, 3umasti juk'at juk'at wañaqañ qalltäna. Patak phisqa tunkan urunak qhipatsti, umax juk'at juk'at wañaqaskakïnwa; 4paqallqüri phaxsina, tunka paqallqun uru saraqatarusti, arcax Ararat sata qullunak pataruw sayt'xäna. 5Umasti wañaqaskakïnwa, tunkïr phaxsina, mä uru saraqatarusti, jach'a qullunakax uñstxarakïnwa.
6Pusi tunka urunak saraqxipansti, Noé chachax kuna ventantix arcar uskkatayna, uka ventana jist'aräna, 7ukatsti allqamar jamach'i antutnuküna; ukampisa uka jamach'ix uksar aksaruw uma patxan jalnaqäna, uma wañaqañapkama. 8Ukatsti, Noé chachax mä paloma antutnukurakïna, uraqix wañäxpachati janicha uk yatiñataki, 9ukampis paloman kawkharus jan puriñjamätapatxa, arcaruw kuttanxäna, uraqisti uman chhaqtayatakïskänwa. Noé chachasti amparap aysusin palomarux katuqxäna, ukatsti arcaruw irpantxäna.
10Noé chachasti yaqha paqallqu urumpiw suyt'äna, ukatsti wasitat palomar antutnuküna. 11Ukampis ch'amakthapiruw palomax kuttanxäna, mä olivo laphis acht'asita. Ukhamat Noé chachax uraqin niya wañäxatap amuyäna. 12Yaqha paqallqu urump suyt'askakïnwa, ukatsti wasitat palomarux khithanuküna, ukampis palomax janiw kuttankxänti.
13Kunapachatix Noé chachax suxta patak mayan maranïxän ukkhaxa, uraqix wañäxänwa. Nayrïr phaxsina, mä uru saraqatarusti, Noé chachax arcan uta patxap apaqasin uraqin wañäxatap uñjäna. 14Payïr phaxsina, pä tunka paqallqun uru saraqatarusti, uraqix suma wañäxänwa. 15Ukat Diosax Noé chachar säna: 16“Arcat mistxam, warmimampi, yuqanakamampi, yuxch'anakamampi. 17Jumamp chikäki uka animalanaka, jamach'inaka, uywañ animalanaka, uraqinjam qatatnaqtir animalanaksa irpsxarakim, ukhamat aka uraqir aywitatxapxañapataki, ukatsti wal mirantapxañapataki” sasa.
18Ukhamasti Noé chachasa, warmipasa, yuqanakapasa, yuxch'anakapasa arcat mistxapxäna. 19Ukhamaraki, uywañ animalanakasa, pampankir animalanakasa, uraqinjam qatatnaqtir animalanakasa, thuqnaqir animalanakasa, taqiw mistxapxäna. 20Ukatsti jank'akiw Noé chachax Tatitutak mä altar lurt'äna, ukatsti q'uma animalanakata, jamach'inakatsa#8.20 Q'uma animalanaka, jamach'inaka: Q'añu animalanakax janipuniw kunapachas wilañchat luqtañatakix askïkänti. Lv 11; Dt 14.3-21. mayakam katüna, ukatsti Tatituruw mä nakt'ayat wilañcha#8.20 Nakt'ata luqtäwisti mä wilañchawa, kawkhantix mä uywax altaran taqpach nakhantayatäñapäkäna uka, lip'ichikiw sacerdotetak jilt'añapäna, ukat uksarux taqpachapuniw nakhantayatäñapäna. Noé chachax Diosar yuspagarañatakiw uka wilañcha luqtäna. luqtäna. 21Kunapachatix uka suma q'aphix Tatitun ukar purïna ukkhasti, Tatitux akham sänwa: “Janipuniw mayampsa aka uraqirux jaqin jucha luratap laykux ñanqhachkxäti, jaqix waynatpacha ñanqha lurañak amtaski. Janirakiw animalanakarus mayampsa tukjkxäti, kunjämtix jichhax lurktxa ukhama.#8.21 Is 54.9.
22“Aka uraqin utjañapkamasti,
yapuchañasa, yapu apthapiñas utjapuniniwa,
junt'usa, thayasa, juyphipachasa, jallupachasa,
urusa, arumasa utjaskakipuniniwa” sasa.
Markert nå:
GÉNESIS 8: AYOPD
Marker
Del
Kopier
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fno.png&w=128&q=75)
Vil du ha høydepunktene lagret på alle enhetene dine? Registrer deg eller logg på
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996