GÉNESIS 11
11
Babel Torre
1Khä urunakansti taqi jaqisa mä laxraki parlapxäna. 2Kunapachatix jaqinakax inti jalsu tuqit mistunipkän ukapachaxa, Babilonia uraqin mä qhirwa uraqi jikxatapxäna, ukatsti ukan jakiriw qhiparapxäna. 3Mä urusti jupanakkamaw aruskipasipxäna akham sasa: “Ladrillonak lurañäni, ukatsti ninaruw phichsuñäni” sasa. Ukhamat ladrillonakxa qalanak lanti apnaqapxäna, mezcla lantsti asfalto apnaqapxarakïna. 4Ukatsti sapxarakïnwa: “Jutapxam, jichhax mä jach'a marka sayt'ayañäni, torrepas alaxpachar puriñapkama lurapxañäni. Ukhamat taqininsa jach'at uñt'atäñäni, ukatsti janirakiw taqi aka uraqpacharux aywitatkañäniti” sasa.
5Ukampisa Tatitux uka marka uñjiriw saraqanïna, ukhamarak jaqinakan torre lurasipkatap uñjiri, 6ukatsti sänwa: “Jupanakax mä sapa markakïpxiwa, mä sapa laxrak parlapxaraki, ukatpï uka lurañ qalltapxixa, jichhasti jupanakarux janiw kunas uk lurañ jark'kaspati. 7Ukhamasti parlanakap mayjt'ayir saraqañäni, ukhamat jupanakkama jan kuna parlatanakapsa amuyasipxañapataki” sasa.
8Tatitusti ukhamwa taqi aka uraqpacharu jaqinakar ananuküna, ukatsti jupanakax uka marka lurañsa apanukxapxarakïnwa. 9Uka chiqanwa Tatit Diosax taqi jaqinakan parlanakap mayjt'ayxäna, uka chiqatwa jaqinakarux aka uraqpachar ananukxäna. Ukat uka markax Babel sataxa.
Sem chachan wawanakapa
(1 Cr 1.24-27)
10Sem chachan wawanakapax akanakänwa. Uma taripäwit pä mara saraqxipansti, Sem chachax pataka maranïxän ukkhasti, Arfaxad sat wawapaw yurïna. 11Uka qhipatsti Sem chachax phisqa patak marampiw jakaskäna, ukatsti yaqha yuqanakampi, phuchhanakampiw jupan utjäna.
12Arfaxad chachasti kimsa tunka phisqani maranïnwa kunapachatix Sélah wawapax yurkän ukkhaxa. 13Uka qhipatsti, Arfaxad chachax pusi pataka kimsani marampiw jakaskäna, ukatsti yaqha yuqanakampi, phuchhanakampiw jupan utjäna.
14Sélah chachax kimsa tunka maranïnwa kunapachatix Éber wawapax yurkän ukkhaxa. 15Uka qhipatsti Sélah chachax pusi patak kimsani marampiw jakaskäna, ukatsti yaqha yuqanakampi, phuchhanakampiw jupan utjäna.
16Éber chachasti kimsa tunka pusini maranïnwa, kunapachatix Péleg wawapax yurkän ukkhaxa. 17Uka qhipatsti Éber chachax pusi patak kimsa tunkan marampiw jakaskäna, ukatsti yaqha yuqanakampi, phuchhanakampiw jupan utjäna.
18Péleg chachax kimsa tunka maranïnwa, kunapachatix Reú wawapax yurkän ukkhaxa. 19Uka qhipatsti Péleg chachax pä pataka llätunkani marampiw jakaskäna, ukatsti yaqha yuqanakampi, phuchhanakampiw jupan utjäna.
20Reú chachasti kimsa tunka payan maranïnwa, kunapachatix Serug wawapax yurkän ukkhaxa. 21Uka qhipatsti Reú chachax pä patak paqallquni marampiw jakaskäna, ukatsti yaqha yuqanakampi, phuchhanakampiw jupan utjäna.
22Serug chachasti kimsa tunka maranïnwa kunapachatix Nahor wawapax yurkän ukkhaxa. 23Uka qhipatsti Serug chachax pä patak marampiw jakaskäna, ukatsti yaqha yuqanakampi, phuchhanakampiw jupan utjäna.
24Nahor chachasti pä tunka llätunkani maranïnwa kunapachatix Térah wawapax yurkän ukkhaxa. 25Uka qhipatsti Nahor chachax patak tunka llätunkan marampiw jakaskäna, ukatsti yaqha yuqanakampi, phuchhanakampiw jupan utjäna.
26Térah chachasti paqallq tunka maranïnwa, kunapachatix Abram, Nahor, Harán wawanakapax yurkän ukkhaxa.
Térah chachan wawanakapa
27Térah chachan wawanakapax akanakänwa, Abram, Nahor, Harán ukanaka. Harán chachasti Lot jaqin awkipänwa, 28Harán chachasti Caldea uraqinkir Ur sat chiqan jiwxäna, awkipa jakaskipana, kawkhantix yurkatayna uka pachpan jiwxarakïna.
29Abram chachasti Sarai warmimpiw jaqichasxäna, Nahor chachasti Milcá warmimpirakiw jaqichasxäna, Milcá warmisti Harán chachan phuchhapänwa, Iscá warmin kullakaparakïnwa. 30Sarai warmisti janiw wawanïkänti, jan wawachasirïtap layku.
31Térah chachasti caldeonakan uraqipankir Ur sat chiqat mistusin, Canaán uraqiruw sarxäna, jupamp chiksti Abram yuqapampiru, Lot allchhipampiru, Sarai yuxch'apampiruw irpasxäna. Ukampisa, Harán markar purisinxa, jupanakax ukan jakiriw qhiparxapxäna. 32Térah chachasti pä patak phisqani maranïkän ukkhaw Harán chiqan jiwxäna.
Markert nå:
GÉNESIS 11: AYOPD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
