Khuurakikha 8
8
Kameetsi karakikha khukhwiikhilila
1Wele waaba nga waakhwibilila Nowa ni tsisolo tsoosi tse mwirome, atweela ni bibyaayo bibyaba ni naye mu likhoŋolo ta. Aryo kila asiindikha imbewo khuuwuutsa, kameetsi kaarakikha khukhwikhilila aasi. 2Wele waafuunikhaka kimyaanya kikyaba aasi mwiloba nga kifuura kameetsi. Aryo waafuunikhaka ni kimyaanya kye mwikulu, ifula yaakamisa khuuroonya. 3Karyo kameetsi kaaba nga kekhilila kaawelela khu shibala. Lwanyuma lwe biifukhu shitoondo shitweela ni kamakhumi karaano (150), kameetsi kaaba nga kaawelela. 4Khu shifukhu she likhumi na musaafu, mu mweesi kwe kumusaafu, likhoŋolo lyeekha lyekhala khu njiinji tsa Ararati. 5Kameetsi keloosela khuuwelela, uri khu shifukhu shishinyoowa she mu mweesi kwe likhumi, imurwe we tsinjiinji yaarakikha khuubonekhaka.
6Lwanyuma lwe biifukhu kamakhumi kane, Nowa wekulawo litilisa lilyaba khwikhoŋolo, 7waarumana kikhoolo. Kikhoolo waatsya weelikuusa eyi ni neeyi, khukhwoolesa nga kameetsi ni kaawelela khu shibala. 8Lwanyumakho waarumana liwuusi khuutsya khubona oba nga kameetsi kaweleele khu shibala namwe ta. 9Ne liwuusi lyaalekha khuunyoolakho shiifwo shoosi isi linyala lyemikhakho ta, lwekhuuba kameetsi kaaba kashiiliwo khu shibala. Liryo lyaapamburukha lyaakobola isi likhoŋolo, Nowa waarusa kumukhono kweewe ibulafu, waalikobosa mukari.
10Nowa waaliindakho luundi biifukhu musaafu, ne ni byawakho, waarumana luundi liwuusi khuutsya. 11Kumuluundi kuno lyakobola tsinyaanga tse angoloobe, nga lyaasutile lisaafu lye kuusaala ku olivu khu munwa kwalyo. Lweesho Nowa waashimanya ari kameetsi kaweeleele ilala khu shibala. 12Ndi waaliindakho luundi biifukhu musaafu bibiindi, waalirumana khukhwiilayo. Ne kwaluno nga ni lyatsya, lyaalekha khukobola ta.
13Khu mbuka iyo, Nowa aaba nga waayolesa kimiiko bitoondo bisesaba na mutweela (601). Khu shifukhu shishiinyoowa she kumwiiko ukwo, abe aambi kameetsi kaaweelela khu shibala. Aryo Nowa weekulawo shisuli she likhoŋolo khu ngaaki, wesheenga waabona nga shibala shilikho shooma. 14Shifukhu she kamakhumi kabili na musaafu she kumweesi kukuukhola khabili, shibala shaba nga shaayomela ilala buulayi bubweene.
15Kila Wele alomela Nowa ari, 16“Iwe, n'umukhasi woowo, ni basooleli boowo, atweela ni bakhasi baabwe, ni murure mwikhoŋolo. 17Uruse ni biilamu byoosi bibiili mwikhoŋolo, nga binywiinywi, bisolo, ni biilamu bibyaalamila khwiiloba aasi nabyo birure ibulafu, bitsye bisaalane, bibalaahe luundi bitsule khu shibala.” 18Aryo Nowa n'umukhasi weewe, ni basooleli beewe, atweela ni bakhasi be basooleli beewe, baarura khukhwaama mu likhoŋolo. 19Ni khuutubakho ni bisolo bya buli saambo, biilamu bibyalaamila aasi byoosi, ni na buli binywiinywi byoosi. Bino byoosi byaarura ibulafu nga bili mu bikuuka byabyo.
Nowa awaanayo isaayilo
20Lwanyuma Nowa woombekha shisheeso khweesi aaba atsya khuwaanilakho tsisaayilo isi Umukasya. Waakyelawo waaloondamo bisolo biimiliwu bya buli saambo, ni binywiinywi nabyo biryo, waabiwaanayo nga tsisaayilo tsintsoshe khu sheeso khweene. 21Aryo Umukasya waawunyila isilikakha iwunya buulayi, kila mu mwoyo kweewe aloma ari, “Siindilayo luundi khuuwa shibala shitaambiso, abe yakhaba nga bibyambaaso bye mu myoyo kye babaandu bili biibi khukhwaama mu bwaana. Siindilayo luundi khuuhesa biilamu bye khu shibala byoosi, nga ninakholile khu muluundi kuno ta.”
22Nga shibala ni shikane shibe nga shishiiliwo,
kane ibatsakewo imbuka iye khuubyaala ni khuukyesa,
imbuka iye buunyifu ni iye buukhafu,
iye shiimiyu ni iye buunyifu,
kumuusi ni shiilo sibilyakama ta.
Markert nå:
Khuurakikha 8: LCE
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Lumasaaba Catholic Bible © The Bible Society of Uganda, 2017.
