Bl 7
7
Đak lip
1Kră Yang khan kơ Nôê thoi âu: “Ih păng đĭ-đăng hnam dơnŏ ih mơ̆t bĕ lăm duk, yua kơ lăm lu bơngai chăl dang ei Inh 'bôh ih jơ̆ minh 'nu bơngai tơpăt. 2Lăm lu kon sem brem 'lơ̆ng rơgoh, ih athei anhăk ba minh adrĕch tơpơh hơgrop, tơno păng akăn; gah lu sem brem mă ưh kơ 'lơ̆ng rơgoh minh adrĕch minh hơgrop, wă kơ pơm adrĕch jơ̆p kơpal teh đak. 3Ih kư̆m athei anhăk ba lu sem păr, rim khŭl tơpơh hơgrop tơmông păng yŏng, wă kơ ih wei sư arih chek lar jơ̆p kơpal teh. 4Yua kơ pă tơpơh năr dơ̆ng, inh gô ăn 'mi jruh tơ teh, lăm puăn-jĭt năr puăn-jĭt măng; Inh gô pơrăm lê̆ đĭ kơpal teh mă dôm kon sem brem mă đĭ adrĕch đơ̆ng inh đei pơjing.”
5Na Nôê pơm kiơ̆ tôm dôm lu nơ̆r đơ̆ng Kră Yang đei pơkă kơ sư.
6Kơplah đak lơ̆p, lah lai jơ̆p kơpal teh, Nôê đei tơdrâu-hrĕng sơnăm boih. 7Nôê hăm akăn sư mơ̆t lăm duk, hơdai lu kon lu mŏ mai sư wă kơ klaih đơ̆ng đak lơ̆p. 8Dôm lu kon sem brem mă 'lơ̆ng rơgoh păng lu kon sem brem mă ưh kơ 'lơ̆ng rơgoh, lu sem păr, lu kon hơdrông kơep lep-ler kơpal teh, 9minh hơgrop tơno păng akăn, tơmông păng yŏng, năm đĭ tơ Nôê păng mơ̆t lăm duk 'blep trŏ thoi nơ̆r Kră Yang 'Bok Kei-Dei bơtho pơkă kơ sư. 10Đơ̆ng rŏng kơ tơpơh năr, đak pơtơm jur jơ̆p kơpal teh.
11Kơplah noh Nôê tơdrâu-hrĕng sơnăm, khei 'bar năr mơjĭt-tơpơh, trŏ kơ năr noh, dôm lu tu đak đôh pơchah đak bluh đơ̆ng teh, đơ̆ng kơpal plĕnh kư̆m pơih tơjur đak. 12'Mi jruh tơ teh lăm puăn-jĭt năr, puăn-jĭt măng.
13Kŭm lăm năr noh, Nôê akăn sư, pêng 'nu kon sư, Sem, Cham, Japhet, hăm pêng 'nu mŏ mai sư kư̆m mơ̆t lăm duk. 14Lu sư mơ̆t hơdai păng đĭ-đăng lu sem brem, lu sem dơrong kiơ̆ kơ adrĕch, lu kon hơdrông kơpal teh kư̆m kiơ̆ kơ adrĕch, sem păr kư̆m kiơ̆ kơ adrĕch păng đĭ-đăng lu sem kiơ mă đei pơnăr. 15Hơgrop, hơgrop kiơ̆ Nôê mơ̆t lăm duk; wă khan đĭ-đăng dôm lu đei sĕch akar mă dui jơhngơ̆m. 16Tơno minh akăn minh, đei tơmông đei yŏng, đĭ-đăng kư̆m mơ̆t lăm duk, kiơ̆ thoi nơ̆r Kră Yang 'Bok Kei-Dei khan pơkă, na Kră Yang tang lê̆ 'măng duk.
17Đak lơ̆p kơpal teh puăn-jĭt năr puăn-jĭt măng, đak tŏk kơjung tưk duk kư̆m rai kơjung đơ̆ng teh dơ̆ng kơpal đak. 18Kơpal teh, đak tih păng rai tŏk kơjung dêh, duk đông kơpal đak. 19Đak tŏk rai dêh kơpal teh, đĭ-đăng lu kông kơjung kư̆m lơ̆p đĭ. 20Đak tŏk truh tơ mơjĭt-pơđăm hlok kơjung hloh kơ đĭ-đăng lu kơ̆l kông kơjung. 21Đĭ-đăng dôm lu adrĕch sĕch akar arih kơpal teh lôch glơ̆k, mă lu sem păr, mă lu kon sem dơrong, kon sem bri, mă kon hơdrông kơep lep-ler păng đĭ kon bơngai. 22Mă dui jơhngơ̆m trong muh lôch đĭ. 23Đĭ-đăng adrĕch khŭl arih kơpal teh pơrăm pơlôch đĭ, đơ̆ng kon bơngai truh tơ kon sem brem, lu hơdrông kơep lep-ler, lu sem păr; lăp Nôê hăm lu bơngai, lu sem brem lăm duk đĕch oei arih.
24Đak oei lơ̆p kơpal teh 'blep minh-hrĕng pơđăm-jĭt năr.
Markert nå:
Bl 7: bdq
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©Bahnar Bible Association. All rights reserved.
