ޔޫޙަންނާ 20

އީސާގެފާނު އަލުން ދިރިވަޑައިގަތުން

1އާދީއްތަ ދުވަހު ފަތިހުގެ އަލި ފާއްދާލުމާއެކު މަރިޔަމް މަގްދަލޭނާ އެ ހޮހަޅައިގެ ދޮށަށް ދިޔައެވެ. އޭރު އެ ހޮހަޅައިގެ އަނގަމަތީ ބާއްވާފައި އޮތް ހިލަ ދުރަށް ލެވިފައިވާތަން އޭނާއަށް ފެނުނެވެ. 2އޭނާ ދުވަމުން ގޮސް ޝަމްއޫނު ޕަތަރަސްއާއި އަދި އީސާގެފާނު ލޯބިފުޅުވާ އަސްޙާބީ ހޯދާފައި ބުންޏެވެ. ”⁠އެމީހުން މާތްސާހިބާގެ ހަށިކޮޅު އެތަނުން ގެންގޮއްސި. މިހާރު އެމީހުން އެކަލޭގެފާނުގެ ހަށިކޮޅު ގެންދިޔަ ތަނެއް ވެސް އަހަރެމެންނަކަށް ނޭނގެ.⁠“

3ޕަތަރަސްއާއި އަނެއް އަސްޙާބީ އެ ހޮހަޅަ ހުރިތަނަށް ދިޔުމަށް ނުކުތެވެ. 4އެ ދެމީހުން ދުވަމުން ދިޔައެވެ. އަނެއް އަސްޙާބީ ޕަތަރަސްއަށް ވުރެން ބާރަށް ދުވެފައި ހޮހަޅައިގެ ކައިރިއަށް ދިޔައެވެ. 5އޭނާ ގުދުވެ އެތެރެ ބެލިއިރު އީސާގެފާނު ކަފުން ކުރެވުނު ފޮތިގަނޑު އެތާނގައި އޮތްތަން އޭނާއަށް ފެނުނެވެ. ނަމަވެސް އޭނާ އެ ހޮހަޅައިގެ އެތެރެއަކަށް ނުވަދެއެވެ. 6ދެން ޝަމްއޫނު ޕަތަރަސް އައިސް އެ ހޮހަޅައިގެ ތެރެއަށް ވަދެ ބެލިއިރު އޭނާއަށް ވެސް އެ ފޮތިގަނޑު އެތާނގައި އޮތްވާ ފެނުނެވެ. 7އަދި އީސާގެފާނުގެ މޫނުފުޅު ފޮރުވުމަށް އެޅި ފޮތިގަނޑު ކަފުން ކުރެވުނު ފޮތިގަނޑާއި ވަކިން އެތާނގެ އެއްކައިރިއެއްގައި ފަތް ޖަހާލާފައި އޮތެވެ. 8ދެން ފުރަތަމަ އެތަނަށް އައި އަސްޙާބީ ވެސް އެތާނގެ ތެރެއަށް ވަދެ ބެލިއެވެ. ދެން އޭނާ ވެސް މިކަން ގަބޫލުކުރިއެވެ. 9އޭރު އަދި ޕަތަރަސްއަށާއި އަނެއް އަސްޙާބީއަކަށް އީސާގެފާނު އަލުން ދިރިވަޑައިގަންނަވާނެ ކަމަށް ބާވައިލެއްވި ފޮތްކޮޅުތަކުގައި ލިޔެވިގެންވާ ކަމެއް ނޭނގެއެވެ. 10ދެން އަސްޙާބީން އެނބުރި ގެއަށް ހިނގައްޖެއެވެ.

މަރިޔަމް މަގްދަލޭނާއަށް އީސާގެފާނު ފެނިވަޑައިގަތް

11އޭރު މަރިޔަމް މަގްދަލޭނާ އެ ހޮހަޅައިގެ ކުރިމަތީގައި ރޯން ހުއްޓެވެ. އޭނާ ރޮމުން ގުދުވެ އެތަނުގެ އެތެރެ ބަލާލިއެވެ. 12އެވަގުތު އޭނާއަށް ފެނުނީ އީސާގެފާނުގެ ހަށިކޮޅު ވެޑުވިފައި ވީ ތަނުގެ ބޯލާކޮޅާއި ފައިލާކޮޅުގައި ހުދު ހެދުމެއްގައި ތިއްބެވި ދެ މަލާއިކަތުން ތިއްބަވަނިކޮށެވެ. 13އެމަލާއިކަތުން އޭނާ ކުރެން އެއްސެވެ. ”⁠ކަމަނާ ތިޔަ ރޮނީ ކީއްވެ؟⁠“

އޭނާ ބުންޏެވެ. ”⁠އެމީހުން އަހަރެންގެ ސާހިބާގެ ހަށިކޮޅު ގެންގޮއްސި. އަދި އެމީހުން އެކަލޭގެފާނު ގެންދިޔަ ތަނެއް ވެސް މަށަކަށް ނޭނގެ.⁠“

14ދެން އޭނާ ފަހަތަށް އެނބުރި ބަލާލިއިރު އޭނާގެ ފުރަގަހުގައި މީހަކު ހުއްޓެވެ. އެއީ އީސާގެފާނެވެ. ނަމަވެސް އޭނާއަކަށް އެއީ އެކަލޭގެފާނު ކަމެއް ނޭނގުނެވެ. 15އީސާގެފާނު އޭނާ ކުރެން އެއްސެވިއެވެ. ”⁠ކަމަނާ ތިޔަ ރޮނީ ކީއްވެ؟ ކަލޭ ތި ހޯދަނީ ކާކު؟⁠“

އޭނާ ހީކުރީ އެއީ އެބަގީޗާ ބަލަހައްޓާ މީހާ ކަމަށެވެ. އެހެންވެ އޭނާ އެމީހާއަށް ބުންޏެވެ. ”⁠ބޭބޭ، ބޭބެ، އެކަލޭގެފާނުގެ ހަށިކޮޅު ތަނަކަށް ލީނަމަ ބުނެބަލަ. އަހަރެން ގޮސް އެކަލޭގެފާނުގެ ހަށިކޮޅު އެތަނަކުން ގެންނާނަން.⁠“

16އީސާގެފާނު ވިދާޅުވިއެވެ. ”⁠މަރިޔަމް!⁠“

އޭނާ އެކަލޭގެފާނާއި ދިމާއަށް އެނބުރި ޢިބްރާނީ ބަހުން ގޮވާލިއެވެ. ”⁠ރައްބޫނި!⁠“ މިބަހުގެ މާނައަކީ އެދުރުކަލޭގެފާނު އެވެ.

17”⁠އަހަރެން ހިފަހައްޓަން ނޫޅޭ!⁠“ އީސާގެފާނު ވިދާޅުވިއެވެ. ”⁠އަދިއެއް އަހަރެން ބައްޕާފުޅުގެ އަރިހަކަށް ނުދަން. ކަލޭ ގޮސް އަހަރެންގެ އަޚުން ހޯދާ! ގޮސް އެމީހުން ގާތު ބުނޭ، އަހަރެން މިދަނީ އަހަރެންނާއި ކަލޭމެންގެ ބައްޕާފުޅު، އަދި އަހަންނާއި ކަލޭމެންގެ ވެސް ކަލާނގެ އަރިހަށޭ.⁠“

18މަރިޔަމް މަގްދަލޭނާ ގޮސް އަސްޙާބީން ހޯދައި އެމީހުން ގާތު ބުންޏެވެ. ”⁠އަހަރެން މާތްސާހިބާ ދެކެފިން!⁠“ ދެން އެކަލޭގެފާނު ދެއްވި ޚަބަރުފުޅު އޭނާ އެމީހުންނަށް ދިނެވެ.

އީސާގެފާނުގެ އަސްޙާބީންނަށް އެކަލޭގެފާނު ފެނުނު

19އެއީ އެ އާދީއްތަ ދުވަހުގެ ހަވީރު އީސާގެފާނުގެ އަސްޙާބީން އެއްތަންވެ ދޮރުލައްޕައިގެން ތިއްބެވެ. އެއީ ބަނީއިސްރާއީލުންގެ ވެރިން ދެކެ ބިރުންނެވެ. ދެން އީސާގެފާނު ވަޑައިގެން އެމީހުންގެ މެދަށް ހުއްޓިވަޑައިގެން ވިދާޅުވިއެވެ. ”⁠އައްސަލާމް އަލައިކުމް!⁠“

20ދެން އީސާގެފާނު އެކަލޭގެފާނުގެ އަތްތިލަފުޅުގަޔާއި އަރިކަށިފުޅުގައިހުރި ޒަޚަމުތަކުގެ ނިޝާން އެމީހުންނަށް ދެއްކެވިއެވެ. އެމީހުންނަށް މާތްސާހިބާ ފެނުމުން އުފަލުން ފުރުނެވެ. 21ދެން އެކަލޭގެފާނު އަނެއްކާވެސް އެމީހުންނަށް ވިދާޅުވިއެވެ. ”⁠އައްސަލާމް އަލައިކުމް! އަހަރެން ކަލޭމެން މިފޮނުވަނީ ބައްޕާފުޅު އަހަރެން ވެސް ފޮނުއްވި ފަދައިން!⁠“ 22މިހެން ވިދާޅުވުމަށް ފަހު އެކަލޭގެފާނު އެމީހުންގަޔަށް ފުމެލައްވާފައި ވިދާޅުވިއެވެ. ”⁠މާތްރަސްކަލާނގެ މާތްރޫޙުފުޅު ލިބިގަނޭ. 23ކަލޭމެން މީހެއްގެ ފާފައަށް މަޢާފު ކޮށްފިނަމަ އެމީހެއްގެ ފާފަ ފޮހެވޭނެ. ކަލޭމެން މީހެއްގެ ފާފައަށް ކަލޭމެން މަޢާފު ނުދީފިނަމަ އެ ފާފަ އޮންނާނީ ނުފޮހެވި.⁠“

އަސްޙާބީއެއް ކަމަށްވާ ތޯމާސްއަށް އީސާގެފާނު ފެނުން

24އަސްޙާބީންގެ ތެރެއިން ވަނަމަކަށް ”⁠ދީދިމޫހު⁠“ އޭ ކިޔޭ ތޯމާސް އީސާގެފާނު ވަޑައިގެންނެވިއިރު އެތާނކު ނެތެވެ. 25އަސްޙާބީން އޭނާ ގާތު ބުންޏެވެ. ”⁠އަހަރެމެން މާތްސާހިބާ ދެކެފިން.⁠“

ނަމަވެސް އޭނާ ބުންޏެވެ. ”⁠އަހަރެން އެކަލޭގެފާނުގެ އަތްޕުޅުގައި މޮހޮރު ޖެހުނު ޒަޚަމްތައް ދެކެ އެތަނުގައި އަތްލާ އެކަލޭގެފާނު އަރިކަށިފުޅުގައިހުރި ޒަޚަމުގައި އަތްނުލަނީސް އަހަރެން ތިޔަކަމެއް ގަބޫލެއް ނުކުރާނަން.⁠“

26ހަފުތާއެއްގެ ފަހުން އަނެއްކާވެސް އަސްޙާބީންތައް އެތެރޭގައި އެއްތަންވެ ތިއްބެވެ. އޭރު ތޯމާސް ވެސް އެމީހުންނާ އެކުގައި ހުއްޓެވެ. ދޮރުތައް ހުރީ ތަޅުލާފައެވެ. އެކަމަކު އީސާގެފާނު ވަޑައިގެން އެމީހުންގެ މެދަށް ހުއްޓިވަޑައިގެންފައި ވިދާޅުވިއެވެ. ”⁠އައްސަލާމް އަލައިކުމް!⁠“ 27ދެން އީސާގެފާނު ތޯމާސްއަށް ވިދާޅުވިއެވެ. ”⁠އަހަރެންގެ އަތުގައި އަތްލާ ބަލާބަލަ. މަގޭ އަރިކަށީގައި ވާ ޒަޚަމުތަކުގެ ނިޝާންތަކުގައި އަތްލަބަލަ. ޝައްކު ކުރުން ދޫކޮށްލާ. ގަބޫލުކޮށް އީމާންވޭ!⁠“

28ތޯމާސް ބުންޏެވެ. ”⁠މާތްރަސްކަލާނގެ! މަގޭ މާތްސާހިބާ!⁠“

29ދެން އީސާގެފާނު ވިދާޅުވިއެވެ. ”⁠ކަލޭ ތިޔަ އީމާންވީ ކަލޭގެ ލޮލުން މި ކަންތައްތައް ދެކެފައި. މީގެ އެއްވެސް ކަމެއް ނުދެކި އީމާންވެ ގަބޫލު ކުރާނެ މީހުންގެ މައްޗަށް މާބޮޑަށް ރަޙުމަތް ލެއްވިގެންވޭ.⁠“

30އަސްޙާބީންގެ ކުރިމަތީގައި އީސާގެފާނު ވަނީ ވަރަށް ގިނަ މާނަ ފުން މުޢުޖިޒާތްތަކެއް ދައްކަވާފައެވެ. އެ ހުރިހާ ކަންތަކެއް މި ފޮތުގައި ލިޔެވިފައެއް ނުވެއެވެ. 31ނަމަވެސް މިފޮތުގައި ލިޔެވިގެން މިވާ ކަންތައްތައް ލިޔެވިފައި އެވަނީ އެކަމުގެ ސަބަބުން ކަލޭމެން ވެސް އީސާގެފާނަކީ މާތްރަސްކަލާނގެ ޚާއްސަ ކުރައްވާ ފޮނުއްވި ފަރާތްކަން ގަބޫލު ކުރާނެ ގޮތް ވުމަށެވެ. އަދި އަލްމަސީޙު އަކީ މާތްރަސްކަލާނގެ ދަރިކަލުންކަން ގަބޫލު ކުރުމަށް ވެސް އެހީވުމަށްޓަކައެވެ. އެއީ އެކަލޭގެފާނު ގަބޫލު ކޮށް އީމާންވުމުގެ ސަބަބުން ކަލޭމެންނަށް ވެސް އާ ދިރިހުރުމެއް ލިބޭނެތީއެވެ.

Markert nå:

ޔޫޙަންނާ 20: ކމ

Marker

Del

Kopier