San Mateo 1
1
Jesucristo's 'ya'ŋucu-neŋeta'm
(Lc. 3.23-38)
1Yʌ' totojaye's chamneŋeca'ŋba te' Jesucristo's 'ya'ŋucuta'm. Ñe'cʌte' te' Davijtis wyinboya, y te' Abraha'ŋis wyinboya. 2Abraha'ŋis 'yune Isaac, y te' Isaajquis 'yune Jacob, y te' Jacojpis 'yuneta'm Judá, y 'yatzi y pyotzota'm. 3Te' Juda's 'yuneta'm Fares y Zara, Tamarcʌsipʌ, y te' Farejsis 'yune Esrom, y te' Esro'mis 'yune Aram. 4Te' Ara'mis 'yune Aminadab, y te' Aminadajpis 'yune Naasón, y te' Naaso'ŋis 'yune Salmón. 5Te' Salmo'ŋis 'yune Booz, Rahabcʌsipʌ, y te' Boojsis 'yune Obed, Rutcʌsipʌ, y te' Obejtis 'yune Isaí. 6Te' Isai'is 'yune te' rey David, y te' rey Davijtis 'yune Salomón, te' Uriajsis inʌc yomocʌsipʌ.
7Te' Salomo'ŋis 'yune Roboam, y te' Roboa'mis 'yune Abías, y te' Abiajsis 'yune Asa. 8Te' Asa's 'yune Josafat, y te' Josafajtis 'yune Joram, y te' Jora'mis 'yune Uzías. 9Te' Uziajsis 'yune Jotam, y te' Jota'mis 'yune Acaz, y te' Acajsis 'yune Ezequías. 10Te' Ezequiajsis 'yune Manasés, y te' Manasejsis 'yune Amón, y te' Amo'ŋis 'yune Josías. 11Te' Josiajsis 'yuneta'm Jeconías y pyotzota'm, ñʌmaŋyatʌju'c presošej Israel-pʌnda'm te' Babilonia-najsojmo. 12Y jʌsa'ca teyma' ijtyaju'c, pʌ'naju Salatiel, Jeconiajsis 'yune, y te' Salatie'lis 'yune Zorobabel. 13Te' Zorobabe'lis 'yune Abiud, y te' Abiujtis 'yune Eliaquim, y te' Eliaqui'mis 'yune Azor. 14Te' Azo'ris 'yune Sadoc, y te' Sadojquis 'yune Aquim, y te' Aqui'mis 'yune Eliud. 15Te' Eliujtis 'yune Eleazar, y te' Eleaza'ris 'yune Matán, y te' Mata'ŋis 'yune Jacob. 16Te' Jacojpis 'yune José, te' Maria's jyayaj. Y Maria's yajpʌ'naju Jesús, ñʌjayajpapʌ Cristo.
17Te'šej jeque macmactascu'y neŋe'a'ŋucu cʌtʌjcu desde te' Abrahán hasta te' David. Y desde te' David hasta que ñʌmaŋyatʌju'c Israel-pʌnda'm te' Babilonia-najsojmo cʌtʌjque'tu macmactascu'y neŋe'a'ŋucu. Y desde que ñʌmaŋyatʌju'c te' Babilonia'ojmo hasta te' Cristo macmactascu'y neŋe'a'ŋucu'a cʌtʌjque'tu.
Pʌ'naju Jesucristo
(Lc. 2.1-7)
18Y maŋba'cmaj pyʌ'naju te' Jesucristo, yʌ'šejte' tujcu: María, te' Jesujsis ñanaj, 'yemprendatzʌjcu Joseji'ŋ. Y antesquemaj tumʌtzʌquiajpa minu chejcʌyu te' Espíritu Santopit. 19Y te' José, te' jyayaj, como oyepʌ pʌnde' inʌc, jašunʌ cha'ajcuy chi'ʌ te' María. Sunu chactʌ'ʌ nu'mdij. 20Y yʌ'šej nʌ quipsu'c Jose'is, yajquenu wyin ʌwyo'mo tʌ Ngomi Diojsis 'yangelejsis, y ñʌjayu: José, Davijtis wyinboya, uy cotza'ay wa'mis nʌtʌjcʌyu ndʌjcaŋʌ te' María ñempe tzejcʌwya'a, porque te' 'yune maŋba ijtuwʌ Espíritu Santo'ste'ñe'. 21Maŋba ya'ijtu te' 'yune, y maŋbamis ŋgotjayu ñʌy JESUS, porque ñe'cʌ's maŋba yajcotzojcu te' pyʌnda'm quiowa'ojmoc. 22Cʌtʌjcu yʌ'šejta'mbʌ tiyʌ wa'y tyujcu chamušej tʌ Ngomi Diojsis te' tza'maŋwa'oyepit, nʌmu'c:
23Musʌ que mu'šapʌ yomo maŋba chejcʌyu,
Y maŋba ijtu jyaya-une,
Y maŋba quiotjayaju ñʌy, Emanuel.
Te' ñʌy sunbate' ñʌmu: Tʌji'ŋ ijtu Dios. 24Y sa'u te' José ʌŋumʌy. Y maŋu chʌjcu 'yaŋgui'mušej tʌ Ngomi Diojsis 'yangelejsis. Y ñʌtʌjcʌyu tyʌjcaŋʌ te' María. 25Y jatyumʌ'ʌŋya hasta que pʌ'naju te' winbʌ jyaya-une. Y quiotjayu ñʌy JESUS.
Markert nå:
San Mateo 1: ZCNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Nuevo Testamento en Zoque Copainalá © Sociedad Bíblica de México, A.C. 1967.
