Эклц 13
13
Абрам Лот хойр салҗана
1Египетәс Абрам гергтәһән, цуг эдл-ахутаһан Негев орв. Лот бас теднлә йовна. 2Абрам ода олн малта, цаһан мөңгтә, алтта болв. 3Негевәс Бет-Эльд күртлән тер йовад йовв. Тенд Бет-Эль болн Ай хоорнд урднь терүнә шатр бәәлә. 4Тер һазрт Абрам экләд йовхдан бәрц бәрлһнә бәәр кесмн. Абрам тенд Деед Эзнә нер дуудла.
5Абрамла хамдан йовсн Лот бас олн үүрмг болн бод малта, бәрсн шатрмудта бәәҗ. 6Тер һазр тедниг хамднь багтаҗ, эс теҗәҗ чадад бәәв. Яһад гихлә зөөрнь дегд ик болад, хамдан бәәҗ чадлго бәәв. 7Абрамин малчнр болн Лотын малчнр хоорнд цүүгән болв. (Тиигхд тер һазрт кананахн болн перизмүд бүүрлҗәсн бәәҗ.)
8Тегәд Абрам Лотд иигҗ келнә:
– Чи ман хойрин хоорнд, чини малчнр мини малчнрин хоорнд цүүгән бичә болтха. Яһад гихлә бидн төрл-садн улсвидн. 9Эн һазриг чи цугтаһинь үзҗәнч? Нанас сал. Кемр чи зүн үзг тал йовхла, би барун үзг тал эргнәв, кемр чи барун үзг тал йовхла, би зүн үзг тал эргәд йовнав.
10Йордана тегш һазр Цоар күртл, Деед Эзнә сад#13:10 Деед Эзнә сад, эс гихлә Эденә сад. мет, Египетин һазр мет сәәнәр услгдҗахиг Лот үзнә. (Эннь Деед Эзн Содомиг болн Гомораг күүчхәс урд тиим бәәлә.) 11Лот бийдән Йордана цуг тегш һазр шүүҗ авад дорд үзг хәләһәд йовна. Тиигҗ тедн нег-негнәсн салцхав. 12Абрам Канан һазрт бүүрләд бәәв. Лот болхла, Содомас хол биш шатрмудан бәрәд, тегш һазрт бәәх балһсдын дунд бүүрлв. 13Содомин әмтн хар саната бәәҗ, Деед Эзнә өмнәс йир ик килнц һарһҗаҗ.
14Лотыг салсна хөөн Деед Эзн Абрамд келнә:
– Эн бәәх ормасн эргндән хәләлч: ар үзг болн өмн үзг тал, дорд болн деед үзг тал хәлә. 15Чини үзҗәх цуг һазриг Би чамд болн чини хөөт үйнрт мөңкинд өгнәв. 16Чини хөөт үйнриг һазрин шора мет тооһарнь икдүлнәв. Тегәд кемр кен негнь шора тоолҗ чадх болхла, чини хөөт үйнр бас тоолгдад бәәх. 17Чи босад, эн һазрар утднь, өргнднь йовад үз. Яһад гихлә Би энүг чамд өгнәв.
18Абрам шатрмудан ормаснь көндәһәд, Хевронас хол биш бәәсн Мамрен алдр хар моддын хаҗуд бүүрлхәр һарад йовна. Тендән Абрам Деед Эзнд бәрц бәрдг бәәр кенә.
Markert nå:
Эклц 13: ХКО_ӘБ
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Институт перевода Библии, 2002-2023
