MARK 8
8
Jisu na Anyi Hazar Mejü Ghanjakecü
(Mat 15.32-39)
1Tsaseng wi anyitenti kesü na gho saghuya. Anyithu na kedsakejjü nmila kesa wi Jisu na ma sansikeyathu cichi nu mathu kiza, 2“Hi anyi hathu ghena leben güccüben, kepaghenanye mathu ghanan kecheng hi gweghe bendha nu mathu khili kedsakejjü mangla nmiladha. 3Keujüla hi mathu ya ndsa njjüla kesun pi ajjen wi wha thsü lethu mathu na alenca wi picathi shüaben, kepaghenanye mathu pahan na alen kesie wina ghoben.”
4Ma sansikeyathu na ma wi khineng, “He wi ayyikeshü wi thowa na anyi hathu tsüdi ghanjaya kemehai kedsakejjü muyaben nu?”
5Jisu na mathu wi keü, “Nthu amesa be khaju ben nu?” Mathu na “Abe tagü ben le,” khineng.
6Ma anyithu na ayyi wi donkiyalo khichi. Tsaseng wi ma amesa be tagü tsü khuya, Anyiza wi kesawegü khie nu pakhhiya, nu pi anyithu gishü cülo kesa pi ma sansikeyathu cü. Sansikeyathu na tsü pi anyitenti tsü gishü cüa. 7Mathu na anga kizzakiki la keu ben. Jisu na tsü ghena kesawegü khiechi nu sansikeyathu na tsü la pi anyithu gishü cülo kiza. 8-9Anyi tsüdila dsa pi anonkwen ntsa saya— ciwi anyi hazar mejü-u na ben. Tsaseng wi sansikeyathu na kedsatu ashijü tagü saghuya. Jisu na anyithu kesun pi bvü thsü, 10meyi ma sansikeyathu gweghe ahun kesü wi duya nu Dalmanutha yyi wi wa.
Farisithu na Amankesa Kekhie
(Mat 16.1-4)
11 #
Mat 12.38; Luk 11.16 Farisithu pahan na gho Jisu ssinu ajüh keccücanli. Mathu na ma ghan nan le kesalina tang wi amankesa kesü sachilo khie. 12#Mat 12.39; Luk 11.29 Isala Jisu na misikhhali ghadhi chi nu khi, “Mangkesa na khija-ghashenen nyi ha amankesa ketan ghang ten nu? Hi atsentsa nthu kizaden, amankesa pi khija-ghashenen nyi ha ccüca nben le!” 13Ma mathu teshi nu ahun kesü wi du neng nu aghajü khhakawa wi wa.
Farisithu nu Herod Zimi
(Mat 16.5-12)
14Sansikeyathu na amesa kedsa qo pvüya mali nu mathu na ahun non wi amesa be kesütan ben.
15 #
Luk 12.1
Jisu na mathu kitsanchi, “Meghe-metsa yalo, Farisithu nu Herod zimi ghena kiden-kesha yalo!” 16Sansikeyathu na mathu jawi hati keccünengli wa, “Ikhang amesa nkemi ghena ma hati khiben le!”
17Jisu na mathu mangwa khiben khe tsü chüya nu mathu wi keü, “Nthu mangkesa na amesa nkemi jjügi tsü khiben nu? Nthu khilila chü meya nyelela meshen meya kwe? Nthu leben na jeng ntsa sadha kwe? 18#Jer 5.21; Ezk 12.2; Mrk 4.12 Nthu anyon pvü tenthu nmu kwe? Nthu akhuna pvü tenthu nza kwe? Nu nthu meshenshi meya kwe, 19hi anyi hazar manga ghena amesa be manga pakhhi pi gishü kecü tsü? Nthu na kedsatu ashijü khaju saghuya nu? Mathu na “Ashijü taghakeni le,” khinengchi. 20Jisu na keü, “Nu hi anyi hazar mejü ghena amesa be tagü pakhhi pi gishü kecü tsü, nthu na kedsatu ashijü khaju saghuya nu?” Mathu na “Ashijü tagü le,” khinengchi. 21Ma mathu wi keü, “Nthu na khilila tsü chüshi meya kwe?”
Jisu na Bethsaida wi Anyon Nkemu sa pi Mehaikecü
22Mathu na Bethsaida wi ghoya, ciwi anyi pahan na anyon nkemu kesü ssinu Jisu wi gho nu ma anyi tsüwa kidhenchi cülo kesa khie. 23Jisu na anyon nkemuwa kwen zanya nu ssinu anyu na ameiwa shhu. Jisu na ma meceng meshhusha pi anyi tsüwa nyon wi chi nu ma kwen chang pi ma miwi chi nu keü, “No mangla mula nmu nu?”
24Anyi tsüwa na yaki ghang nu khi, “Anle, hi anyithu na kegoe keten muben, isala mathu mu pi achanton na alentsen keten ti le!”
25Jisu na kheneng ma kwen chang pi anyi tsüwa miwi chi. Khilitsü anyi tsüna mehaitsü ghangchi nan ma nyon na mehai nengya nu mehaitsü mushiya. 26Tsaseng wi Jisu na anyi tsüwa wi “Anyu tsüwa wi nwha neng lalo,” khi nu kesun pi kepathu gweghe ajjen wi wha thsüa.
Pitor Na Jisu Cüki Kekhishi
(Mat 16.13-20; Luk 9.18-21)
27Tsaseng wi Jisu nu ma sansikeyathu na Kaesarea Filippi kete anyuthu wi wa. Ma alenca wi mathu wi keü, “Anyithu na hi pi thowa le khiten khe hi kizalo.”
28 #
Mrk 6.14-15; Luk 9.7-8 Mathu na luneng, “Pahan na no Johan Baptizwa le khi; kepa na no Elijah le khi; nu kepathu na no atusenjüh-kechüthu kesü le khiden.”
29 #
Jhn 6.68-69
Ma mathu wi keü, “Isathu, nthu tsü hi pi thowa le saten nu?”
Pitor na luneng, “No Messiya le!”
30Tsaseng wi Jisu na mathu wi “Icüki pi thola nkiza lalo,” kiza ntsa sachi.
Jisu na Ma Ketizenkesa nu Keshü Cüki Kekhi
(Mat 16.21-28; Luk 9.22-27)
31Tsaseng wi Jisu na ma sansikeyathu sansi nu khi: “Anyi Tsawa na ketizen sa ntsa nu keshenpfüthu, keqhaikedi ntsathu, nu Ayenkesansithu na ma meya mvula saben. Ma pi shü thsüaben, isala ma ghanan kecheng seng wi hangneng-shagha ben.” 32Ma ha mehaitsü khi pi mathu kiza. Tsalina Pitor na ma ssi wa ma kha. 33Isala Jisu na kheneng wa ma sansikeyathu ghangchi, ma Pitor satekü nu khi, “He wina bvülo, Satan, kepaghenanye no kemeshen tsüna Anyiza wina nyela anyi wina kegho le!”
34 #
Mat 10.38; Luk 14.27 Tsaseng wi Jisu na anyitenti nu ma sansikeyathu ci pi ma wi chi nu mathu kiza, “Keujüla anyi kesü le kesü lela hi gweghe gha mvu lethu ma ketanla ma mali nu atsathangla ma kross pvüya nu hi nie n-ghathu yishü. 35#Mat 10.39; Luk 17.33; Jhn 12.25 Anyi thowa na ma kahang tepagha ten khe dediaben, isala thowa na ighena nu ajühkemehaiwa ghena ma kahangli khuchi ten khe tsü mu neng yaben. 36Kepaghenanye anyi kesü na ayyi keben tsüdi pi ma ji saya lela ma kahangli dedi lethu ma mangwa kekiyi muya ben nu? Mangla kekiyi nmi le! 37Ciwi mangla pi anyi kesü kahangli mithon saya nben. 38Keujüla anyi kesü le kesü lela ighena nu ajühkemehaiwa ghena keqheza nu kesami nyithu shüsha tuwi jüghe lethu Anyi Tsawa na tangnyilo kemethathu ssinu Abawa nyankethang sa kegho wi anyi tsüwa cüki la pi khi jüghe waben.”
Markert nå:
MARK 8: RENGNBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
