MARK 14
14
Acho sa pi Jisu Keshun
(Mat 26.1-5; Luk 22.1,2; Jhn 11.45-53)
1 #
Bvü 12.1-27
Shukeya kho nu Azimi nkechi mesa pi kemishu kho tsüna gho keten ghanan keni keben wi keqhaikedi ntsathu nu Ayenkesansithu na kuthila Jisu ghanya nu pi shü thsüale kesalina alen bha. 2Mathu na khi, “Anyithu na nkivvü thsüle kesalina akho sa keben jüwi ithu na hati sayishü.”
Bethani wi Adeli pi Jisu Kenyen
(Mat 26.6-13; Jhn 12.1-8)
3 #
Luk 7.37-38
Jisu na Bethani wi agükedsa-kinaawa Simon jjen wi ben. Jisu na dsajjü keben wi nza kesü na nard deli ma men kedhu ntsa pi alabaster hikhu pongti chisen dughola pakhhi nu meyisha pi ma li wi chicü. 4Anyi ciwi kebenthu na mathu leben minuya nu khokho wi khi, “Mangkesa na adeli pi hati dedi ben nu? 5Adeli ha pi akutimen meza kecheng miwi jeü ya nu apisa tsü pi ketha-u cüya mehai le!” Isanu mathu na nzawa tsü ssi kitagha. 6Isala Jisu na khi, “Ma ya tsüti sa thsülo! Nthu mangkesa na ma kivvüben nu? Ma ighena pala kemehai jiketsü sachidha. 7#Aye 15.11 Nthu na keshüthang la ketha-u gweghe benden, nu nthu na khathansha wi mathu kiqachi mvu khe saya mehai. Isala nthu na keshüthangla hi gweghe ben nben. 8Ma saya kemehai qei wina sachidha, ma npi wina hi pi kevhü ghena kidenya thsüle adeli pi igwo nyen cüdha. 9Hi khili atsentsa nthu kizaden, ayyi khiewi Ajühkemehaiwa ha pi khiwa khe ma ighena kulikechi cüki ha pi khiben.”
Judah na Jisu Matsa Cüle Cenkeya
(Mat 26.14-16; Luk 22.3-6)
10Tsaseng wi Iskariot Judah sansikeyathu Taghakeni jawi kesü tsüna Jisu ghan pi keqhaikedi ntsathu cüale bvüa. 11Mathu na Judah jüh kekhi tsü za pi anongheya nu apisa pi ma cüle khishichia. Tsalina Judah na Jisu ghan pi mathu cüale kesa matsü kemehai tsü ghang.
Jisu Ma Sansikeyathu gweghe Shhukeya Kho Tsse dsa
(Mat 26.17-25; Luk 22.7-14,21-23; Jhn 13.21-30)
12Azimi nkechi mesa pi kemishu Kho tsathang atuwa wi Shhukeya kho tsse ghena khaghaneni zza kepathi ghanan wi sansikeyathu na Jisu wi gho ma keü, “No ikhang yala khiewa wa nghena Shhukeya kho tsse tsü kidenya thsü mvuben nu?” 13Tsaseng wi Jisu na hati khi nu ma sansikeyathu meshu keni kesun pi wa thsü, “Nshinyi anyunutiwa wi tsü walo, ciwi anyi kesü atssü lakhü pvü keten nshinyi metuya ben na. Ma nie wa 14ma ajjen khiewa du khe wala ajjen pvüwa wi keüla, ‘Kesansiwa na khiben, hi sansikeyathu gweghe Shhukeya kho tsse dsa keten benwa tsüna khiewa nu?’ 15Isathu, ma ajjenshha tangwa wi keshondhi keti kemehai kesü tsütson pi nshinyi ccüca ben na ciwi ikhang ghena kiden-kesha yalo.”
16Sansikeya keni na anyunutiwa wi tsü wa nan Jisu na manyi kiza ketheng tsüti tsüdila muya, nu manyi Shhukeya kho tsse tsü kidenya.
17Minulen wi Jisu na sansikeyathu Taghakeni ssinu gho. 18#Zak 41.9 Mathu na miz miwi dsajjü keben wi Jisu na khi, “Hi atsentsa nthu kizaden, nthu meshu kesü na hi matsa cüben — hi gweghe dsa kebenwa.”
19Sansikeyathu na ahathana nu meshu kesüsü na ma wi keü, “No ntsakhiwa hi khi nben she?”
20Jisu na luneng, “Tsüna no Taghakeni jawi kesü hi gweghe akhu kesü wi amesa dsa kebenwa tsü. 21Anyi Tsawa tsüna Ntsawajüh wi ma ghena khi ketheng ti shüaben, isala Anyi Tsawa matsa cü ketenwa tsü khatila qhethiketen saten nu! Anyi tsüwa ghena tsü pvügha nkeghowa la mehai kesa le!”
Apvüwa Ssinu Kemishu
(Mat 26.26-30; Luk 22.14-20; 1 Kor 11.23-25)
22Mathu na dsajjü keben wi Jisu na amesa be kesü khuya nu keseng kekhie sachi, tsü pakhhiya, nu tsü pi ma sansikeyathu cü. Ma khi, “Ha pi dsayalo, hawa ha igwo.” 23Tsaseng wi ma ahyi kesü la khuya, Anyiza wi keseng kekhie sachi, nu tsü pi mathu cü; nu mathu tsüdila tsü jjüya. 24#Bvü 24.8; Jer 31.31-34 Jisu na khi, “Hawa ha ijjü, anyi kejon ghena keji kechiwa tsü, ijjü wi Anyiza cenkethenjüh sa keyawa tsü. 25Hi atsentsa nthu kizaden, hi Anyiza Kadiyyi wi kisengtssü ketheüwa ha kejjü tsathang npi kecu chu hi kisengtssü ha jjü neng nbendha.”
26Tsaseng wi mathu akhwi kesü satheng nu Oliv Yikha wi wa.
Pitor na Jisu Nchüle Khiaketen Kekhi
(Mat 26.31-35; Luk 22.31-34; Jhn 13.36-38)
27 #
Zek 13.7
Jisu na mathu wi khi, “Nthu tsüdila hi teshi nu bvüaben, kepaghenanye Ntsawajüh kekhi na, ‘Hi anenikehiewa pathi nu khaghaneni tsüdila bvüzigheaben.’ 28#Mat 28.16 Isala hi hangneng-keshagha seng wi nthu tuwi na Galilee wi waben.” 29Pitor na ma wi khi, “Mathu tsüdi no teshi lela hi tsü no teshi nben le.”
30Jisu na Pitor wi kiza neng, “Hi atsentsa no kizaden, shita awegü keni tughu npi kekhou wi no kecheng tughu hi nchüle khiaben.” 31Pitor na mataghang khineng, “Hi khiela tsüti khi nben, hi no gweghe lela shüaben.” Sansikeyathu kepa la tsüdi tsü makesü khia.
Jisu na Gethsemane Wi Kekhie
(Mat 26.36-46; Luk 22.39-46)
32Mathu na apen kesü Gethsemane wi tsü ghoya, nu Jisu na ma sansikeyathu wi khi, “Hi wa kekhie sa keben jü he wi donki ben lalo.” 33Ma Pitor, James, nu Johan ma kecheng ssinu ma gweghe wa. Leben ketizen kesa nu agüccü ntsa kesa na ma miwi ghoa, 34nu ma mathu wi khi, “Ileben gükeccü di ntsawa sa pi hi shüa keten ti sawadha. He wi ben nu hi hie ben lalo.”
35Ma tsü miwi keu whala ayyi wi qancadu nu saya mehaithu ketizen kesa tsüwa tsü pi ma ghü thsülo kesa kekhie sa. 36Ma khie, “Aba! IBa, no saya mehai lethu hi wi ketizen kesa hyiwa ha khuya cülo, isala hi kenen nye le, no kenen ti sayalo.”
37Ma kheneng gho nan sansikeyathu ma kecheng na jen keben muya. Ma Pitor Simon wi kiza, “Simon, no jenben kwe? No amighe kekihhe kesü jü ketanla hi hie meya kwe?” 38Nu ma mathu wi khi, “Nthu kemechu wi ndule kesalina kiden-kesha nu kekhie saki benlo. Aghamu wi sa mvuthi ben, isala asajjü wi tsü nchaladha.”
39Ma kheneng whala kishi kekhi ti khi nu kekhie sa. 40Tsaseng wi ma kheneng gho nan sansikeyathu na jen keben muya; mathu na anyon nküchala benla. Nu mathu na mangla khi pi ma keluneng yen nchüla.
41Ma kecheng tughuwa kheneng kegho wi ma mathu wi kiza, “Nthu khili kecu cca jenben kwe? Cendha! Matsü na ghodha le! Ghangchilo, Anyi Tsawa tsü khili ghan pi kesami nyithu kwen wi chia tendha. 42Shaghalo, ikhang wha na. Ghangchilo, anyi hi matsa cü ketenwa tsüna he wi tendha!”
Jisu Ghankeya
(Mat 26.47-56; Luk 22.47-53; Jhn 18.3-12)
43Jisu na ajühkhitu keben wi sansikeyathu Taghakeni jawi kesü Judah tsüna gho. Ma anyitenti kesü na njünnu nu achanghonthu sen keten keqhaikedi ntsa, Ayenkesansi, nu keshenpfüthu wina kesun kechi ssinu gho. 44Judah na azensu kesü sa pi mathu cü nu khitheng; “Hi wa anyi kesü kimang chithu tsüna nthu ghanya mvu kebenwa tsüna, ma ghan sen nu bvülo.”
45Judah na ghola cuya meyi ma Jisu wi wha nu khi, “Kesansiwa,” isanu ma kimangchi. 46Tsalina mathu na Jisu ghan pi bhenya. 47Isala ciwi ngan kebenthu meshu kesü na njünnu hanshi pi Keqhaikedi Kemisi maghawa khuna handhia. 48Isanu Jisu na mathu wi khi, “Nthu na hi pi kaghanfü nyi kesü ti sa nu njünnu nu achanghonthu sen nu hi ghanyale ghoben kwe? 49#Luk 19.47; 21.37 Hi atsathangla Kekinyijjen wi nthu sansi lela nthu na hi ghan meya. Isala Ntsawajüh tsüna sacen metsi le.”
50Tsaseng wi sansikeyathu tsüdila ma teshi nu bvüa. 51Kepvüza nyi kesü linenthsü ketan mphi ketenwa tsüna Jisu nieden. Mathu na ma ghanyale sa, 52isala ma ma thsü teshi theng nu kemessü bvüa.
Jisu na Ajühkekaghaten Tuwi kewa
(Mat 26.57-68; Luk 22.54-55,63-71; Jhn 18.13-14,19-24)
53Tsaseng wi Jisu ssinu Keqhaikedi Kemisiwa jjen wi keqhaikedi ntsathu, Ayenkesansithu, nu keshenpfüthu na saghu keben wi tsü wa. 54Pitor na temeja wina ma nie sen Keqhaikedi Kemisiwa jjen ccühha wi du. Ciwi ma aghikehiethu gweghe donki nu anni kihang ben. 55Keqhaikedi ntsathu nu ciwi kemehu mabenla Jisu pi shü thsüale kesalina mathu na ma kesami bha lela kesü la mu meya. 56Anyi kejonla milikemesa khi pi Jisu shun lela mathu jüh makesü sa meyala.
57Pahan na shagha hati milikemesa khi pi Jisu shun, 58#Jhn 2.19 “Ma hati kekhi ikhang zale, ‘Hi anyi na kesa Kekinyijjenwa ha yasa pi nu ghanan kecheng jü wi anyi na nkesawa tsü sacü benle.’ ” 59Mathu na tsüti khi lela mathu jüh makesü sa meya.
60Keqhaikedi Kemisiwa na mathu tsüdi tuwi na shagha nu Jisu keü, “Mathu na no kekimenni jüh hati pi no shun keben ha no luneng nten kwe?”
61Isala Jisu na ccen ben wa nu ajüh kesüla nkhi. Keqhaikedi Kemisiwa na kheneng ma wi keü, “No Messiya, Kemisi ntsa Anyiza Tsawa tsü kwe?”
62 #
Dan 7.13
Jisu na luneng, “Hi tsüle; nu nthu tsüdila Anyi Tsawa na kekhang ntsawa kwen ajewa donki nu tang wi akulukeshü miwi na gho keten muyaben!”
63Keqhaikedi kemisiwa na ma thsü mezüqhe nu khi, “Ithu na ha miwi chüza nsenla mehaidha! 64#Lev 24.16 Nthu na ma Anyiza kethenjüh kekhi zayadha. Nthu kemeshen tsü khati nu?”
Mathu tsüdila ma meshensa, nu ma pi keshü thsü-ule sa.
65Mathu pahan na Jisu meshuki, ma nyon qhanbhon nu ma kihhe nu “Thowa na no kihhe ben khe khi nanlo,” isa khi. Nu aghikehiethu na ma cen cü nu ma ssiya.
Pitor na Jisu Nchüle Kekhi
(Mat 26.69-75; Luk 22.56-62; Jhn 18.15-18,25-27)
66Pitor na accühha non wi keben wi Keqhaikedi Kemisiwa maghale ghala kesü na gho. 67Ma Pitor na anni kihang keben mukeya wi ma ghangti nu khi, “No la Nazareth nyiwa Jisu tsü gweghe keten nyi le.”
68Isala ma nyele khi nu luneng, “Hi nchü ... no mangwa khiben khe hi nchü.” Isanu ma akhemi wi shhua, tsümeyi awegü na khou shagha.
69Ghala maghalewa na ma muya nu ciwi ngan kebenthu wi “Ma la mathu jawi meshu kesü,” isa khi. 70Isala Pitor na ma nchüle khineng.
Matsü keu seng wi ciwi ngan kebenthu na kheneng Pitor wi khineng, “No la Galilee nyi ghena no mathu jawi meshu kesü sabenla metsi le!”
71Isala Pitor na khi, “Hi kishen nu atsentsa khiben, nyelethu Anyiza na hi meten cüben le! Hi nthu na khi kebenwa anyi ha nchü le!”
72Tsümeyi awegü na keni tughu khou shagha, nu Pitor na Jisu khati le ma kiza khe tsü meshenya, “Awegü keni tughu npi kekhou wi no kecheng tughu hi nchüle khiaben.” Ma ayyi wi qancadu magha nu qai wa.
Markert nå:
MARK 14: RENGNBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
