Mt 6

Obòò afaṅ a asoe

1Boan okala na të mialëdë sosoo waan a mis më bod na bëyën mina. Ngë mibò të bò okala nala, miayi ki bi maan abë esya waan y'anë a yob. 2Ngë wabò afaṅ, obë lòṅ tòṅ, anë bod miṅyene balòṅ a mënda bikoan ai a mindzòṅ asu yë na bod bëtaman bò. Bëbëla, makad mina na, bëmbëlë ya maan maban. 3Mfa woe, ngë wabò afaṅ, të mbo-ngala woe ayëm e dzi mbo-nnomo woe abò, 4asu yë na afaṅ doe akanga a asoe. Esya woe ya ayen a asoe ayi yaan ai wa.

E kan wayean kogëlan (ngogëlan Tara waan)

Lk 11,2-4; Mk 11,25

5Eyòṅ ki miakogëlan, mibë bò anë bod miṅyene ya badiṅ tëbë a mënda-bikoan ai a maan mindzòṅ na bakogëlan, asu yë na bëyene a mis më bod. Bëbëla, makad mina, bëmbëlë ya maan maban. 6Mfa woe, eyòṅ wakogëlan, nyiigi a etun-nda dzoe#6,6Ngogëlan yayean ki bò adzo miṅyene., ofèd mbè woe, okogëlan ai esoa a asoe. Ndò hm, esoa ya ayen a asoe, ayi yaan ai wa. 7Eyòṅ miakogëlan, mibë lòb a mënyu anë bëhaiden; mbò batsog na a abui nkòbò ngò ngogëlan dzaban yayi wogëban. 8Të miafulan ai bò; amu esya waan ayëm e dzi miayaṅan ai dzò osusua yë na miasili sili nyè. 9Na ngò hm mikogëlan#6,9Ngogëlan «Tara waan» ya Mès enë na::

A Tara waan y'onë a yob, dzoe doe afubëgan,

10Ayòṅ doe azaag, ṅyian woe obòban, akyaè ya yob, nala fë a si

11Vaa bia ana e bidi bian biayaṅan ai biè.

12Ovaaga bia bivus bian, anë biavaè e ba bavus abë bia

13Të wakë ai bia a mëbobëla, okodëge bia a mbë dzam.

14Amu ngë miadzu bod bivus biaban, esoa y'a yob nyè ayi mina dzu. 15Ngë miandzëki dzu bod, esya waan ayi ki mina dzu bivus bian.

Eki bidi

16Eyòṅ miaki bidi, të miabò mëlunga anë bod miṅyene; bakad mana tsende mësu maban na bod bëyëm na baki bidi. Makad mina bëbëla na bëmbëlë ya maan maban. 17Mfa woe, eyòṅ waki bidi, wòbògò mbòn a nlo, osob asu doe#6,17Yesus adzo na mod onë fë dzam bò nyangâ., 18asu yë na të wayene a bod, hë abë esoa ya anë a asoe, na waki bidi. Esoa ya ayen a asoe ayi yaan ai wa.

Okoan akuma doe a yob

Lk 11,34-36. 12,21-33. 16,13

19Të miakoan akuma a si-ndon, mfa bibibian ai miëngëlë biandaman biè, ai mfa miṅwuwub miabug, midzibi. 20Koan akuma a yob, mfa tò bibibian tò miëngëlë biandaman ki, miṅwuwub tègè bug na badzib. 21Amu e hom akuma anë wa, eyë fë nnëm onë wa ete.

Dis anë mfyè nyòl

22Alamba nyòl ndò anë dis. Eyòṅ dis anë mvoè, nyòl dzoe esë yayi tòbò a mfyè. 23Ngë dis anë wa abe, nyòl esë yayi tòbò a dibi. Ndò hm, ngë mfyè ya onë abë wa onë dibi, dibi te lëmbo fog fe?

Zamba ban Mamona

24Mod asësye bëti bëbè. Amu ngë abò të siṅ mbòg, adiṅi e nyò mbòg, ayi lad ai mbòg, angabyandi e nyò mbòg. Miasëki dzam sye ai Zamba ai Mamona#6,24«Mamona», «Mammon» a nkòbò ebrea, atyan na: Akuma. Mbol bod bëngabë ndòg akuma eyëgan, Mamona angatyan na: «Mbë akuma», akuma ya ladzugulu wa nnëm, Satan..

Dze ben miasaṅan ai dzò?

25Asu te madzo ai mina na, të miasaṅan asu enyiṅ dzaan ai e dzom miayi di ngë anyu, ngë ki asu nyòl dzaan na dze miayi bòd. Enyiṅ yalod bidi a? Nyòl yalod mbòd a? 26Fòmbëgan anòn ya yob: Labè ki, lakoe ki bidi, lakoan ki a mëngunda, hë da esya waan ya yob atòṅ dò. Miasë mfi alodo dò a? 27Za mbòg ya abë mina, hë asu yë na asaṅan abui, anë dzam woṅ ntye woe anë ekudëga wò? 28Mfa mbòd, dze miasaṅan? Bëbëgan sam ya mëfub, anë yanaṅ. Yasye ki, yatiṅ ki biyie. 29Makad mina na tò Salomon, a duma die ete, angabë ki abòdò fò anë sam dzidzia ya ete. 30Ndò hm, ngë Zamba angamana bòdò bilòg ya mëfub ya binë ana, okidi bëwoa a ndoan, ngamëna ai mina, a e bod minë tègè ai abui ṅyëbë ba? 31Të hm miasaṅan, midzo na, bindi dze ngë ki na binyu dze ana? Ngë ki na, bimbòd dze ana? 32Bëhaiden mbò badzëṅ e mam mësë mala. Amu esoa ya yob ayëm na miayaṅan ai mò. 33Tarigan hm dzëṅ edzoe Zamba ai sosoo woe, eyòṅ te e mam mësë ma mayi sò baaban a yob. 34Të miasaṅan asu amos ya okidi, amu amos ya okidi wayi saṅan ai oben. Amos osë obëlë ndzug woe.

Markert nå:

Mt 6: NTE12

Marker

Del

Kopier