Matiu 4
4
Na Setan A Valam Na Yesus
Maak 1:12-13; Luuk 4:1-13
1E mui a Vovau sina Piran a paamuian lisan na Yesus xe la xobingil talo na Setan i taa valame. 2E na Yesus a falfaal pana yaan sangafilu talafaat xurul e felagai. 3Na Setan aava saxa xena valamaana, a savat sina e kuus, “Tamo nano ve no Natuna Piran, xuus a mu faat o ri taa savat bret.” 4E na Yesus a suie, “A Xakalayan Taap a kuus: ‘A mataa i taa pife siak a gutan sena bret sang mon taasaxa i taa siaxe sena maana ferawaian aava savat ti la valana Piran.’” Vuputkai 8:3.
5E mui na Setan a lisane xo xe la bina taap, na Jerusalem, e fatigineie laa'ui paaliu xuluna tang lifu lotu e a kuus, 6“Tamo nano, no Natuna Piran, tapin fasivi nano xa senaso a Xakalayan Taap a kuus:
“‘Nane taa xuus a mu angelo sina pama
e nari, ri taa yaas nano xe laa'ui pana mari
talo a kaam i taa pife du sui a faat.’” Yanganan 91:11,12.
7Na Yesus a suie, “E vaxa a Xakalayan Taap a kuus: ‘Muta valam a Memai, a Piran siim.’” Vuputkai 6:16.
8E fulaa, na Setan xo a lisane xe laa'ui xuluna put modus e faxalite pana mu fatataganan la xavala e a roxoyan siri e a kuus, 9“Ne taa tavai nano pana maana mo aanabe' tamo no taa bukaak e nangusau.” 10E na Yesus a suie, “Faapalau sega, Setan! Senaso a Xakalayan Taap a kuus: ‘Nangus a Memai, a Piran siim e no taa sisiak sina mon.’” Vuputkai 6:13.
11E mui na Setan a ta'ulane e a mu angelo xo ri maa savat sina e ri xavange.
Na Yesus A Tangpat Pana Faisok Sina
Maak 1:14-15; Luuk 4:14-15
12Layaan na Yesus a langai o na Jon fo vipis, nane ulaa xe Galili. 13Nane ta'ulan na Nasaret e fe taagul pe Kapanam aava waan la itina raarum pe Sebulan e Naaptali. 14E malaanabe' a ferawaian si Aisaia savat la matavas. Nane kuus:
15“A mu rabuna ti pe la ro bina Sebulan e Naaptali, a bina la xasing ina salan aava sivi xe la laman e a bina la vangana Raarum Jordan, a ro bina aave re waan pe Galili e pave a toxan a rabuna xaves aava ri pife Juda- 16a mu rabuna aave xo ri fo taagul la suk e naboxo ri xalum a malang molava; e a malang fo savat xuluri aava ri taagul lapaana xaxaalua ina maatan.” Aisaia 9:1,2; 42:6-7.
17Ti la yaan aave na Yesus a tangpat pana kuusan fasavat a ferawaian sina Piran malaan, “Puk tapin nami xa xasena vilaana saat simi senaso a yaan ina savatan sina fatataganan sina Piran a faasilak.”
Na Yesus A Xel A Rabuna Talafaat Xena Usiaana
Maak 1:16-20; Luuk 5:1-11
18La fena sangasan sina la vangana Laman Galili nane xalum a ro fetinan, na Saimon aava ri xalie pa Pita nare Endru. Re taxa tapin fasivi a vana sire la taas senaso re fuuna faadinan. 19E na Yesus a kuus, “Me maa usiau e ne taa fapiti name pana pataasaana rabuna.” 20E fataapus re ta'ulan a vana sire e re usie.
21A falet famodak fulaa e xalum a xasa rofetinan fulaa, na Jems nare Jon xuvul pa tamare, na Sebedi. Rutul taxa waan xuluna xaati e rutul taxa faigotan a vana sirutul. E na Yesus a xel nare. 22E fataapus re ta'ulan a xaati e na tamare e re usie.
23Na Yesus a falet xolai pe Galili e nane fepitaa la maana lifu ina faxuvulan siri e kuusan fasavat a Lagasai Roxo sena fatataganan sina Piran. E a maana buk giisan aava fo sip a rabuna, nane vil faroxoie. 24A mu rabuna aave ri xuus fatexaas a xasanofuna pana e mui a mu rabuna xapiak pe Siria ri texaas sena e ri maa lisan a rabuna aava ri giis xe sina: nari pana maana buk giisan e pana maasaxan molava, nari aava vovau saat fo vao nari e nari aava ri gaga e nari aava mari o kari maat. E nane xo a vil faroxoi nari. 25A tang malila ti Galili, Jerusalem, Judia e ti la bina Dekaapolis sina mu rabuna aava ri pife Juda e ti la bina la xasa paxasing ina Raarum Jordan, nari xapiak ri usie.
Markert nå:
Matiu 4: TFSP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Wycliffe Bible Translators, Inc. All rights reserved.
