San Juan 8

Ijnko chojnichjin kónoxíxin kjuasin ijie̱

1A̱ndá chꞌin Jesús mé sákjui̱ ti ijna̱ Olivo. 2Ndá ti ó kóña̱o mé ikjan chꞌan ti ni̱nko, ndá kaín chojni kóchjinehe sin ti jehe chꞌan. Ndá kjuákꞌetja̱xi̱n chꞌan, la kjuankíxin kjuako chꞌan. 3Ndá ti sin tjako ley la ko ti sin fariseo mé kjui̱ka̱o sin ijnko chojnichjin tsíkónoxíxin chónta ókjé chojnindoa. Ndá kjuakꞌe sin tjan nko̱siñe 4la ndáche sin ti chꞌin Jesús:

―Maestro, ti tjan i mé kónoxíxin tjan kixin kjuasin tjan ijie̱, kixin chónta tjan ókjé chojnindoa. 5#Lv. 20:10; Dt. 22:22-24.*A̱ndá ti ley kjuajon Moisés mé tꞌe̱to̱an kixin ixro̱ tsꞌóñáxini ti chojnichjin xi̱kaha tjasin ijie̱. ¿A̱ndá jaha, nkechrua?

6Mé xi̱kaha ichro sin kixin tjinkaon sin kixin áchꞌe nduáhya chrókjuate̱he chꞌin Jesús, ndá chrókjuanchia sin ijie̱. Ndá chꞌin Jesús kꞌuisén chꞌan la kji̱nxi̱n chꞌan ndedo itja chꞌan ti nonte. 7Ndá na̱xa̱ tjanchankí sin, ndá chꞌin Jesús xrendoá chꞌan la ndáchro chꞌan:

―Ti nkojínra tjejora ntihi chontahyara ninkehó ijie̱, la sa̱o itéra ti ixro̱.

8Ndá xíkꞌisén chꞌan la ikjin chꞌan ti nonte. 9Ndá ti ó kuíhin sin ti nkehe ndáchro chꞌin Jesús, ndá kósuéhe̱ sin la nkojnko sin sákjuí sin, xránkíxixín ti sin a̱ntsí táda la hasta ti sin a̱ntsí ndasoá sákjuí.

Ndá jehó chꞌin Jesús la ko ti tjan a kuíto̱he. 10Ndá kꞌuínkatjen chꞌan la tsjehe chꞌan la i ninkexró kohya, ndá kjuanchankíhi chꞌan ti tjan a:

―¿Nkekjá ti sin kjuanchia ijie̱? ¿Á ninkexró kjuíntakjasótiahya ní?

11Ndá jehe tjan ndáchro tjan:

―Náhí, ninkexró.

Ndá chꞌin Jesús ndáchro:

―Kja̱xin janhan si̱ntakjasótiahya. Sátjia la í tjásinhña ijie̱.

Chꞌin Jesús mé ti xrohi tꞌinkaséñaxín chjasintajni

12 # Mt. 5:14; Jn. 9:5. *Ndá chꞌin Jesús xínixje̱he̱ ti sin tsíkóchjina, ndáchro:

―Janhan mé ti xrohi tꞌinkaséñaxín chjasintajni. Ti tsochrehéra ti janhan la tsꞌájira ti tꞌinkaséña la tsochontara ti kjuachón, la í tsꞌájihyara ti sítie.

13 # Jn. 5:31. *Ndá ti sin fariseo ndáchro:

―Jahuá tjechro̱nka nkexrín itjén, méxra̱ kaín ti nkehe chro̱nka la sínkíhya.

14Ndá kjuáte̱he chꞌin Jesús, ndáchro:

―Janhuán tjétjo̱nka̱ra nkexrín itjén, la kjónté ijnko nkehe chaxín xrja̱nká kixin nona nketí kꞌuinkaxian la ko nona nketí sátsjia. A̱ndá jahara noahñara nketí kꞌuinkaxian la ko noahñara nketí sátsjia. 15Jahara la éxi chojni chjasintajni ó tjánchíára ijie̱. A̱ndá janhan la tekahya ijie̱ ninkexró. 16Kjánchó ti chrókjui̱ntakito̱áxián iji̱é chojni la ndoá chrókjui̱tꞌa kixin jehya janhuán si̱tꞌa tíha. Tꞌaná, ti nkexro ichrꞌán ti janhan kꞌuinka, mé tjéki̱a̱n chꞌan, la tjinki̱tsa chꞌan nta̱kito̱axián iji̱é chojni. 17#Dt. 19:15.*A̱ndá ti ley kuèntára mé ndáchro kixin ti tso̱noxín yaá sin tsochronka á chaxín xi̱kaha tsíkóhen, ndá chrókuitekaon chojni. 18Ndá janhan mé tjéxrja̱nka nkexrín itjén janhan la ko kja̱xin Tꞌaná, ti nkexro ichrꞌán ti janhan kꞌuinka, mé jehe chꞌan kja̱xin chꞌan chronka chꞌan nkexrín itjén janhan ―ichro chꞌin Jesús.

19Ndá kjuanchankíhi sin chꞌan:

―¿Xá nketí itjen ti Itꞌá?

Ndá kjuáte̱he chꞌin Jesús, ndáchro:

―Jahara la chonhñara ti janhan la ko kja̱xin chonhñara ti Tꞌaná. Ti chrókóchoxínra ti janhan la kja̱xin chrókóchoxínra ti Tꞌaná.

20Mé xi̱kaha ichro chꞌin Jesús ti kjuako chꞌan ti ni̱nko chjina ti itjen ti nkehe xrejóya ti chichaon tjajon sin. Kjánchó ninkexró tséhya sin ti jehe chꞌan kixin na̱xa̱ kjuixrakájña ti hora tsotsé sin chꞌan.

“Xitjahya tsjasánra ti sátsjia janhan”

21Ndá ínaá ndáchro chꞌin Jesús:

―Ó sátsjia janhan la jahara tsjéyára ti janhan, kjánchó ti ó itsꞌenra ndá na̱xa̱ tsochontara ijie̱ la xitjahya tsjasánra ti sátsjia janhan.

22Ndá ti sin judío mé ikjo kícho sin, ndáchro sin:

―¿Á tsꞌóñá chꞌan a̱sén chꞌan kixin xi̱kaha ndáchro chꞌan kixin xrokjuahya sátsji̱ni ti tsjakꞌe chꞌan ní?

23Ndá ndáchro chꞌin Jesús:

―Jahara la nonte ntihi kꞌuaxrjeníxinra. A̱ndá janhan la nka̱jní kꞌuaxrjeníxian. Jahara la kuènté chjasintajni. A̱ndá janhan la jehya kuènté chjasintajni. 24Mé xi̱kaha tjo̱nka̱ra kixin ti ó itsꞌenra la na̱xa̱ tsochontara ijie̱ kixin ti tsitekákonhñara ti janhan, ti nkexro xráxín itjen, ndá ti ijie̱ chontara tsꞌénxi̱nra.

25Ndá kjuanchankí sin ndáchro sin:

―¿Xá nkexro ti jaha?

Ndá kjuáte̱he chꞌin Jesús, ndáchro:

―Ti xránkíxixín la ó tjo̱nka̱ra nkexro ti janhan. 26Itsjé nkehe chróndáxrja̱n la chrókjui̱ntakito̱áxián ti ijie̱ chontara. Kjánchó ti nkexro ichrꞌán ti janhan kꞌuinka la kaín ti nkehe chronka chꞌan la chaxín ndoá. A̱ndá jehó ti nkehe kui̱ha̱n chrónka chꞌan mé ti nkehe ndátjan ti sin chjasintajni.

27Kjánchó jehe sin mé kienxínhña sin kixin nixja chꞌan kuènté ti Itꞌé chꞌan itjen nkaya nka̱jní. 28Ndá ndáchro chꞌin Jesús:

―Ti ó tsja̱ya̱ sin ti Xje̱en Díos kꞌóna chojni, ndá tso̱nohara kixin janhan mé ti nkexro xráxín itjen. La tso̱nohara kixin ti ixra̱ tjétꞌa̱ la jehya ixra̱ kuénta̱na. Jehó ti nkehe kjuako Tꞌaná mé tjétjàkua janhan. 29Ti nkexro ichrꞌán ti janhan kꞌuinka mé tjéki̱a̱n. Tꞌaná la titoéhya ti janhan kixin nkochríxín nta̱xiteyá ti nkehe tóxríhi̱n chꞌan.

30Mé xi̱kaha ndáchro chꞌan ndá nchónhña chojni kuitekaon ti jehe chꞌan.

Ti sin xje̱en Díos la ko ti sin tjasin ijie̱

31Ndá nixje̱he̱ chꞌin Jesús ti sin judío kuitekaon ti jehe chꞌan, ndáchro chꞌan:

―Ti tsi̱to̱éhyara ti nkehe kjuákohára ndá chaxín tsꞌónara chojni kuénta̱na 32la ko tsjatso̱anra ti nkehe chaxín ndoá, la ti nkehe chaxín ndoá mé tsjinki̱tsa kixin ti Jínahña la í tsꞌe̱tue̱nhña ti jahara.

33 # Mt. 3:9; Lc. 3:8. *Ndá kjuáte̱he ti sin judío, ndáchro:

―Jeheni mé kꞌuaxrjeníxini Abraham, la kohya nkexro kꞌue̱tue̱hen ti jeheni. ¿Nkekuènté ndáchrua kixin tso̱kohya nkexro tsꞌe̱tue̱hen ti jeheni?

34Ndá ndáchro chꞌin Jesús:

―Ijnko nkehe chaxín tso̱tjo̱nkara kixin ti nkexro tjasin ijie̱ mé xrokjuahya tsíto̱he sin iji̱é sin kixin ti ijie̱ mé tꞌe̱tue̱hen ti jehe sin. 35Ijnko chojni kꞌuíná sichꞌexín ixra̱, la nkochríxínhña tsjakꞌe ti ndo̱e ti nkexro kꞌuèna. A̱ndá ti xje̱en ti nkexro la mé nkochríxín tsito̱he ntiha. 36La ti Xje̱en Díos tso̱tjáhara kjuachaxin ndá chaxín tsochontara ti kjuachaxin, la í tsochontahyara ijie̱. 37Ó nona kixin jahara tsíkꞌaxrjeníxinra Abraham, kjánchó tjinkáonra chrókꞌoñára ti janhan kixin titekákonhñara ti nkehe tjéxrja̱nka. 38Janhan xrja̱nká ti nkehe kjuako Tꞌaná. A̱ndá jahara tjejonchexiteyára ti nkehe kuihínra chrónka itꞌára.

39A̱ndá jehe sin kjuáte̱he sin ndáchro sin:

―Itꞌéni mé Abraham.

A̱ndá ndáchro chꞌin Jesús:

―Ti jahara chrókóchaxín xje̱en Abraham, la chrókjuáko̱xinra éxi kjua̱ko̱xi̱n chꞌan. 40Janhan tjéxrja̱nka ti itan chaxín kui̱ha̱n chrónka Díos, la kjónté tjinkáonra chrókꞌoñára ti janhan. A̱ndá Abraham la xi̱kahña kjuíchꞌe. 41A̱ndá jahara la tjinkáonra si̱chꞌera éxi kjuíchꞌe ti itꞌára.

Ndá kjuáte̱he sin ndáchro sin:

―Jeheni la jehya kꞌónamáni. Náhí. Chóntani nkoko̱a Itꞌéni, mé Díos tíha.

42Ndá ndáchro chꞌin Jesús:

―Ti chrókóchaxín Díos Itꞌára la chrótjue̱héra ti janhan, kixin janhan kja̱xin kꞌuaxrjeníxian Díos la kꞌuinkaxian ti itjen chꞌan. Jehya jehí kꞌuinka. Náhí. Díos mé ichrꞌána kꞌuinka. 43¿Nkekuènté kixin tiénxinhñara ti nkehe tjo̱nka̱ra? ¿Nkekuènté tjinkákonhñara chrókuihínra ti nkehe xrja̱nká? 44Jahara mé xje̱en ti Jínahña, la tjinkáonra si̱nchexiteyára ti nkehe tjinkaon. Ti Jínahña mé ndesi xránkíxixín la kjuaya la kꞌuénixjahya nkehe jína la ko xráxín chꞌia kixin xi̱kaha tja̱ko̱xi̱n nkexrín tjenka̱yáxin. Ti Jínahña mé ijnko nkexro imá chꞌia la ko itꞌé kaín ti kjuachꞌia. 45A̱ndá janhan tjétjo̱nka̱ra nkehe chaxín ndoá, ndá titekákonhñara. 46¿Á nkojinra nohara nke ijie̱ kjuásian janhan ní? Kixin janhan la jehó nkehe chaxín ndoá ndáxrja̱n, ¿ndá nkekuènté titekákonhñara? 47Ti sin tinkáchónki Díos mé tjinkaon sin chrókuihin sin itén Díos. A̱ndá jahara la titekákonhñara Díos, méxra̱ tjinkákonhñara chrókuihínra itén chꞌan ―ichro chꞌin Jesús.

Cristo la xráxín itjen

48A̱ndá ti sin judío ndáche sin ti chꞌin Jesús:

―Chaxín ndoá ndáchroni kixin jaha mé ijnko chojni samaritano la ko chonta ijnko ncha̱kuén jínahña.

49Ndá kjuáte̱he chꞌin Jesús, ndáchro:

―Janhan la chontahya ninkehó ncha̱kuén jínahña. Ti ixra̱ itꞌa̱ la tjikosayáxian Tꞌaná. A̱ndá jahara mé chontehyara kjuasàya ti janhan. 50Janhan la tjéyáhya kjuasàya kuénta̱na ó, kjánchó itjen ijnko nkexro tjinkaon chrókjuikosáyehe chojni ti janhan, a̱ndá ti nkexro a mé tsjanchia ijie̱. 51Ijnko nkehe chaxín tjétjo̱nka̱ra kixin ti nkojín nkexro tsítekaon ti nkehe tjàkua la tsꞌenhña sin.

52Ndá kjuáte̱he ti sin judío ndáchro:

―Ijie ó noheni kixin chaxín chonta ijnko ncha̱kuén jínahña kixin Abraham la ko kaín ti sin kꞌuéchronka itén Díos ósé la ikꞌuén sin. A̱ndá jaha ndáchrua kixin ti tsitekaoni ti nkehe tjàkua, la í tsꞌenhñani. 53¿Xá imá tjetoan jaha ke ti itꞌéni Abraham ní? Jehe chꞌan la ikꞌuén chꞌan la ko kja̱xin ikꞌuén kaín ti sin kꞌuéchronka itén Díos ósé. ¿Xá nkexro ti jaha kixin xi̱kaha ichrua? ―ichro ti sin judío.

54Ndá kjuáte̱he chꞌin Jesús, ndáchro:

―Ti chrókjuikosáya̱ha̱ a̱sená ó la mé ninkehó sínkíhya tíha. A̱ndá Tꞌaná mé tjikosayéhe chꞌan ti janhan, la jahara ndáchrora kixin jehe chꞌan mé Díos kuèntára, 55kjánchó jahara chonhñara chꞌan. A̱ndá janhan la choxián chꞌan. Ti chróndáxrja̱n kixin chónhña chꞌan ndá chrókóyòna éxi jahara, chrókjui̱chꞌia. Kjánchó janhan la choxián Tꞌaná la ko nta̱xiteyá ti nkehe tꞌe̱to̱an chꞌan. 56Abraham, ti nkexro tsíkꞌaxrjeníxinra, la imá chrókóchéhe̱ chꞌan kixin chrókꞌuikon chꞌan ti ña̱o chrókꞌuinka janhan. Ndá ti ó kꞌuíkon chꞌan la imá kóchéhe̱ chꞌan.

57A̱ndá ti sin judío ndáche sin ti chꞌin Jesús:

―Jaha la na̱xa̱ chontahya cincuenta nánó, ¿ndá nkekuènté ndáchrua kixin ó kꞌuikuan ti chꞌin Abraham?

58Ndá kjuáte̱he chꞌin Jesús, ndáchro:

―Ijnko nkehe chaxín tso̱tjo̱nkara kixin ti na̱xa̱ kohya chꞌin Abraham mé xráxín itjén janhan.

59Ndá kónínkaon sin la kuákja sin ixro̱ chróchjéhe sin ti chꞌin Jesús, kjánchó kjuákꞌemá chꞌan la kꞌuaxrjexín chꞌan ti ni̱nko ntiha, la kꞌuatsínka chꞌan nko̱siñe ti tjejó sin la sákjuí chꞌan.

Markert nå:

San Juan 8: poeNTplus

Marker

Del

Kopier