MAK 8
8
Mee Lising Inly Ta Jisuna Bakpina
(Mit. 15:32-39)
1Apha hana wairul rijana rachonna abakrang ephao am no leija Jisu na arui ngeita ma am na ah koka rilleh. 2Keina mani makhai ta ringrei singe rouram chu mani hi kei hitta rungnie inthum am ha ah mani hi abakrang ephao am no ae. 3Ejonga keina mani ta awon tam ma lea pi lea chu lampi ah mani ha waipha tukkange, ti chu mani ahre chu aram lah hai thou phao ae.
4Hana marui ngeina sange, “Mani hija taranga ram rukhina budol amte hina awon hopne ang meh?”
5“Budol chu eja am ma chau?” Jisu na sai arui ngeina sange “Sari.”
6Wairul rija ta alei chunga ongranga amona rilleh. Hana budol sari choi weta wan tienga hai ah nie weta budol ha ther sunutienga marui ngei ta masatekka amatienga am ngeita sam ranga pe ah, hata marui ngeina sampi so ae. 7Hana manikolla tuiriek asiente ahre amhakom; arengpu na nie weta marui ngei kolla sam ranga rou ril so. 8Mani na awon hoppa bak sutakka aliem anoi aning ha marui ngei na hom juija tai sari shukkae. 9Hana baktol ngei ha apa lasing inly ae chuna manita hla so weh. 10Apha hana makka Jisu na marui ngei hitta kung sunga lutweta Dalmanutha ramtienga thingso.
Pharisi Ngeina Anealah Ae Ranga Sai
(Mit. 16:1-4)
11Pharisi ahre ngeina phao weta Jisu kolla wa weta rou vuk thou so weh mani na amota mant num ae chunga angai mee akha ae ta dang ranga mamta muh oh ta rillea. 12Arengpu na alung thukka halla surpi holla manita rilleh atun takka nangei na anealah jong hi eje rang meh? Routakka nangei kolla keina rilnum minge rou ram chu atun tak chu nangei na anealah pe ang nonge.
13Hana arengpu na houphur weta kung chung weta tuipi ralhatienga lalla thingso ae.
Herod Lea Pharisi Chol
(Mit. 16:5-12)
14Arui ngei ha budol choi ang makhappa budol akha chak manikolla am meh, kung sung hana. 15“Thei singa am mo” Jisu na manit hin nea Pharisi ngei achol akha chu Herod hina achol ha hrabakta singthei ah an no.
16Arui ngei kar sunga akha lea akha mani thei chakka halhlakka, na rou ril hi ani na budol choi no sarukka range.
17Chuna Jisu na mani halhlak rou ha dangpha ah mani ta rillea ejerang budol am no sarukka lung olla chau? Atun phao sunga nangei na rino dangthei no song chau? nangei lung eja hirra chau? 18Nangei mit am ma, am ma rine no chau, hana nangei kur am am ma thei no chau? hana nangei na angei thei no chau? 19Keina budol ranga ta mee lasing ranga ta kabakpi nangei na aliem hakom tai eja hom sa? mani na sange, “Asom ani.”
20Hana keina lasing inly taranga budol sari kasampi na, tai eja limma nangei na hom ma chau? “mani na sange, tai sari.”
21Arengpu na manita rilleh, “Atun phao sunga nangei na dangno song chau?”
Bethsaida Ah Mitcho Apa Akha Ta Damna
22Bethsaida ah mani phao juija hana malmashi ngeina Jisu kolla mitcho apa ta tham pi ranga mokkae. 23Jisu na mitchopa kut choi weta husung hai thou wa ruija thingso. Hana Jisu na apa hina amit ta chil shak weta machunga makut shi weta hita rilleh Jisu na, “Ejongpa akha ripha che?”
24Amona Chungtienga anweta rilleh, “Malmashi ngeita keina ri pha inge; chuti weta mani ha thingkungei hekta linga am meh.”
25Woiha pakom Jisu na apa hana mitta akut shi ae atun pa chu mamit ha eheilimpa hrabak ta rine so ae. 26Jisu na ma inn lam ma hla weta rourilleh, “Husunga lut no oh.”
Jisuta Khrista Ae Ta Pitar Rilsukna
(Mit. 16:13-20; Luk. 9:18-21)
27Jisu na arui ngei hitta Kaisaria Philipi ram tienga mani thieng juija lampi ah mani kolla Jisu na sai, “Mee ngei na keita atu ae ta ril meh?”
28Mani na sange, “Ahre na chu Johon Baptias; adang na ril chu Elija; hana rouphupa ae ta kom rilhlakkae.”
29“Jisuna mani ta rillea “Nangei na chu keita atu ata rilla chau?” Pitar na sange, “Khrista ha nang ae.”
30Jisu na marou sarukka atu kolla ril no ranga mani ta rou akal rilleh.
Jisu Na Maol Manat Rang Akha Chu Mathit Rang Rouril
(Mit. 16:21-28; Luk. 9:22-27)
31Amona manita chupi takpi thouso, “Meesanao paha aol dong ang ehekta am meh, ulien changei na julla hla ange, thiempu ngeina, akha chu rouphun chupi takpi ngei nakom hana arengpu ta that weta rungnie inthum sunie ah woiha lea ah ringthou ange.” 32Amo na nahi manita thienga rilpi sho ae, hana pa chu Pitar amota lam panga kai ah thing weta ranga rillea. 33Chuti weta Jisuna marui ngei ta nutienga haileh weta Pitar ta trongshi ah rilleh, “Kanungtieng lea oh, saitan!” amona rilleh, “Nangna Chungthieng nahal ha Chungthieng kol hai thou no weh, chuti weta mee ning hai thou sha ae.”
34Hana Jisuna arui ngei lea wairol rija hitta kokweta rilleh, “Ejonga atu jongpana kanutieng jui num lea chu matak na matakta ngai num no su oh, hana ma khross ha chuti weta kanutieng jui su oh. 35Rouram chu ringchang sanpi pha num atu jongpa na hata mang ange, chuti weta atu jongpa maring changta ahra rou taranga mangpi lea chu mamuihla sanpi pha ange. 36Mee akha na simlei lim chang weta mamuihla chu sanpi pha no lea, e-chu mataranga ahra meh? 37Anoleh mee akhana mamuihla ha sil hlak ranga e-chu pe jou meh? 38Atu jongpa na kataranga ajak tukleh chu hana meenamei ta lalthinga atunpa pok hina pak na dolla karou hina sarukka keita ajak peleh chu keina athieng wanrui ngei hitta kapa hina ahung ajai hitta jungjuija amo kom ajak tukkange.”
Markert nå:
MAK 8: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
