MITHEW 7
7
Adangeita Routreem
(Luk. 6:37-38,41-42)
1“Routreem no oh, natak chunga routreem no ranga. 2Rouram chu nangei na routreem ae thing hana nangei ta kom routreem ange. Akha chu nangei na vul thingna chang hona nangeita kom vullange. 3Hana namit makka tulu la no weta na-u-nanao mitta alota an thinga che? 4Chuna alo ta na-u-nanao mitta tulu la tikkae ta rillang che, namit makka tulu ta la no the na am leija? 5Ahra sangei oh masha ah namitta tulu ha la ta lea chu nangna na u-nanao mitta tulu ha hrabak ah riweta hou nea ang che.
6“Athieng pot ha ui ta pe no oh. Hana aman tam pot ha wokta denga hla no oh. Ejonga nangna deng taleh chu manina akae takka to wa therra hou ange.
Nie Oh, Jongo, Raiyo
(Luk. 11:9-13)
7“Nie ta lea chu nangeita pe ange; jong ta lea chu nangeita tuk pi ange; akha chu rei ta lea chu nangta innkal hongpi ange. 8Rouram chu atu jongpa anie mee na chu pha ae; atu mo ajong mee na chu tukkae akha chu eenkal nok mee ta chu hongpi ae. 9Nangei kar sunga asanao na budol nie weta alung pe mo weh? 10Ano lea ejonga amo na tuirik nie weta arul pe mo weh? 11Ejonga nang na hrano che hal nasanao ta napekjui ja ahra pek rang dang che ae chuna thangwam na pathieng na chu eja lella anie meeta ahra pe ang sha!
12Chuna sarukka nangei na mee ngei ta nangei kolla ae pi num hekta nangei na kom mani ta hata ae oh, rau ram chu nahina roukung hina akha chu rouma ril rouphu ngei na ril ae.
Achip Lam Akha Chu Apak Lam
(Luk. 13:24)
13“Nangei na achip lam hana lutto, roulam chu, sarmei kum lut ranga chu inn harlan lokkae, hana thing mee tam meh. 14Chuti weta ring rang lam ha chu a chip lam ae hana lut malmashi chu tam no ae.
Akung Akha Chu Ara
(Luk. 6:43-44)
15“Shingthei oh hrano rouphu rou maril ngei ha, mani ha na am na ah phao ange kelmo pun wurra, chuti weta asunga chu wontam rammui ae. 16Manita nadangpha ang chu mani ara hana, malmashi ngei na alingbom sunga angur lei no ae, anoleh alingbom sunga theichang ra meh? 17Chuhekta ahra akunga ahra theira ra ae, chuti weta hrano akunga hrano theira ra ae. 18Ahra akunga hra no theira ra no ae akha chu hrano akunga ahra theira ra no ae. 19Ahra theira ra no akung lim ta chu tan weta sarmei ah denga hou ae. 20Chuna saruka mani ara nujuija nangei na manita dang ange.
Kaina Nangta Ekom Dangnonge
(Luk. 13:25-27)
21“Keita arengpa, arengpa kokka chak am meelim ha wan rengram luttang no ae chuti weta wanram ma pathieng ahal ae mee na luttange. 22Atreemni rungnie ah leima tam malmashi ngeina keita rillange, Arengpa kani na naminga roumaril shuk no meh, akha chu naminga dejabol ta kom jul no meh akha chu leima tam angakpi kom ae unge? 23Hanachu keina athup am no lutta manita ril shuk kange, ‘keina nangei ta dang nonge hrano tullu lu ngei kakol hai thou wa thingo!’
Alung Chunga Inn Sha
(Luk. 6:47-49)
24“Chuna sarukka atu jongpa nangei kar sunga karou thei weta tullu lu malmashi chu alung chunga inn sha lungwar spa ae. 25Akha chu ru kalla surra tuijul hanga akha chu thirang ranga hanga inn na nam ma wa hal, chuti phao sunga tikne no ae, rouram chu alung chunga shak sou chu.
26“Chuti weta atu jongpa nangei kar sunga karou theiveta karil jui no malmashi chu waipin chunga inn sha lungmo spa ae. 27Ru surra hang juija akha chu tuijul hangjuija hana chu thirang na inn na nam juija inn ha chu tu wa junga alok akui atik shukkae. Hana atik chu eya atripi ang sha!”
Jisu Manea Yaitha
28Jisu na rilsu nutienga wairul riha na machupi takpi lim ta angak shukkae. 29Rouram chu amo na chupi takpi hi rouphun ocha ngei hekti no ae leima tam arat ane akha hekta chupi ae.
Markert nå:
MITHEW 7: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
