MITHEW 24
24
Mokna Inn Hrit Ranga Jisu Na Rir Rou
(Mak. 13:1-2; Luk. 21:5-6)
1Jisu na mokna inn houphurra arui ngei na amo ta inn hana rouram ma amo ta kok phao ae. 2Amona sange, “Oh weh,” “Keina nangei ta rilla am minge nangei an juija leima hra ah ri ange chuti weta, alung akha phao amunt hina houphur rang nonge, nalim pahi tick ange.”
Aol Ana Akha Chu Awut Arel
(Mak. 13:3-13; Luk. 21:7-19)
3Olives mulbung ah Jisu na onga am leija arui ngei na makolla mani thei chakka phao, “Manina sai, na shimlei hina shu ang tienga akha chu najung ang tieng apha hi kanina alo ta dangne ang meh akha chu ehekti shuk kang mo kanita rilpi oh.”
4Jisu na sange, “Atu akha na kom nangei ta hungpher no shu oh, akha chu natak na natak ta theija singa am mo.” 5Mee eja na kaminga rou rillange, hana mani na rillange, ‘Kei hi Messiya inge!’ hana mani na mee eja ta hungpher ange. 6Nangei na ral rasha theipha ange chuti hal kom nangei lung ephao ol no oh. Nalimpa shuk halkom, ha ngei hana atreem na ah no weh. 7Ram akha lea akha shul hak kange, hana rengram akha na akha ta ral ae ange lingnu nukka bu tang jutang ange amunt chang honna. 8Nalimpa hi masha ah nao don ngei ol hekti ange.
9“Hana nangei ta mant weta athit ranga meekut chunga pe ange kasharukka mee ngeina nangei ta anda ange. 10Malmashi eja na mani ngoiring hla hou ange; mani akha lea kha jur hlakkange akha chu akha na akha ta anda ange. 11Hana dieklou rouphu eja muh shukka mee eja ta mani na hungpher ange. 12Hajong hrano eja na thanga thingjuija chu malmashi ngei lungshit hlak manga jung ange. 13Chutiweta atreem nie pha ket ta dong thei ah am mee amo ta chu sanpi pha ange. 14Rengram ah ahra rou hi jat chong honna mee lungir chang rang simlei ahul tunga sui ange akha chu apha hana atreem ni chang-ange.
Ehektamei Atri Alao
(Mak. 13:14-23; Luk. 21:20-24)
15Thiempu Daniel ta rilpi phur, “nangei na ehekta atri pi akha ripha ange athieng amunt na ngirra am ha.” 16Jihudiah ram shunga am mee ngei na mullon na tanna thing su-oh. 17Inn chunga kalla am amo na ko tumma jung weh ta ma inn shunga am pot kom lakrang apha am mang no weh. 18Loulaiya am amo na kom pun-ni lak lea rang apha am mang no weh. 19Nao ronna am saming zir ngei akha chu nutuiya am nupinu ngei ha -a-ol yaisi pi ae. 20Chungthieng kolla ratta niyo akha chu nangna sabat rungnie anole phalbi timma ah shukno rang! 21Rouram chu hana jui apha ah aol ana chu shimlei hei thou wa awoni pha ket ta am no shonge hana hajong ha woiha lea ah kom shuk kang no weh. 22Chutiweta Chungthieng na mahalla rungnie masing bongpiso ae, hita amona ae phur nole atu akhako ringang no weh. Chuti hal mahalshi meengei sarukka Chungthieng na rungni ha bong pi ange.
23“Hana, atujong akha na rillange, ‘Anno Messiya ha hina am so weh!’ ano lea ko na am so weh!’ hajong ha nangna amota ngoiring no oh. 24Rouram chu dieklou Messiya lea thiempu ngei mel muh shuk kange manina Chungthieng ahal sha mee ngei ta ejong ngai lea chu angakpi tullu lu weta hungphear ange. 25“Hajong apha tungma tienga keina nangei kolla rilla am minge.”
26“Anolea ejonga mee ngei na rillange, anno amo hi ramruka am meh!’ thingno oh hana anolea mani na hitta rillange, “anno amo ha bi ah am meh!” na ha ngoiring no oh. 27Rouram chu meesanao pa na hucham palak hekta mawar na nashutieng hei thou natak tieng phao war hekta yung ange.
28“Amunt chang honna athi ngei pum hloumu am na amunt na hloumu na bom mange.
Meesanaopa Jung Ang
(Mak. 13:24-27; Luk. 21:25-28)
29“Hajong aol ana nutienga chu ninu na kom thimma thing ange hlawar nu na kom mawar war ang no weh, hana arshi na thangwan hai thou tulla jung ange hana wanjai ja am lim hi na jaitha shalla am mange. 30Hana chu meesanaopa na wanram haithou mamel muh ange, hana aleiram ma am malmashi ngei na meesanaopa na shumphai chunga mahung majai tolla arat athei hitta jung rijuija trappa am mange. 31Shimlei ram aky ennly makka amo na wanrui hla ange trumpet tumma jung juija hana chu amo na mahalshi meelim ta shimlei ram atreem na phakat ta homma rachun pi ange.
Theichang Kung Hina Achurang
(Mak. 13:28-31; Luk. 21:29-33)
32“Nangei na theichang kung haithou chu oh. Abakka a don soun don nahangjuija asha apha nei so weh ta dang chou weh. 33Hina chu hekta na lim hi shukka nangei rijuija, apha hi nei ah wa so weh. 34Makno oh, ringa am lim pa hi thi hap so weh dangma tienga nalim hi shuk kange. 35Thang wan lea sim leiram chu mang ange chuti weta katrongsan chu etika ko amang am mang no weh.
Atu Akhana Kom Apha Akhachu Rungnie Dang No Weh
(Mak. 13:32-37; Luk. 17:26-30,34-36)
36“Atu akha na kom marungnie akha chu mapha dang no weh wanna wanrui na kom asanao pa na kom; pathieng amo chak na dange. 37Meesanaopa jung rang hi Noah apha ah shuk hekta shuk kange. 38Tuina len a hangma apha ah mee ngei na bakka enna Noah na kung shunga lut phao shunga nuhla pam hla ah am meh; 39chu phao shunga mee ngei na ephao halla shukno weh shukka am tui pilien na eheilim choi phao shunga. Chuna chu hek ta ae ange meesanaopa na jung ang hi. 40Hana jui apha ah loulai ah apa ani na tullu lu ah am mange akha ta na rui ja thing ange hana akha tana houphur range. 41Namei nu ani na shang shu wa am mange akha tana rui ja thing ange hana akha tana hou phur range.
42“Chuna sharukka apha chang honna shong jella am mo na Rengpu jung rang apha ha atu akha na dang no weh. 43Inn mitpu pa na aru pa na phao rang apha dang lea chu enhrang la ah am manga ae hana aru pa na etik kom ma inn akuipi tumpi nea ang no weh. 44Chuna sharukka apha chang honna tamasha ae ah am mo, rouram chu meesanaopa na jung rang apha ha dang no weh nang na amo ta hakka na am no lei ah shukka ngei ae.
Ngoiringai Lea Ngoiringlou Suuk
(Luk. 12:41-48)
45“Chu lea chu atu na ngoiringai akha chu ashing suuk mo weh? Amo ta amitpu na asuuk adang ngei ta apha cha ah bakpi enpi taranga makolla pe ah hou phur ae. 46Amitpu na inn na malea juija akor hana tullu lu ri juija eja ah ariem mang sha? 47Routak ka keina nangei ta rillinge, ‘Amitpu hana akor hatta manei madonlim kut shilna phur ange.’ 48Chutiweta ejonga hrano akor akha lea chu mathei chakka amo na hitta ril ange, ‘Apha shotta amitpu ha inn na lea ang no weh.’ 49Akha chu amo na atonpi kor ngei hata bakka enna, rui ba ah akha chu phitta reija thouso weh. 50Hana chu edang dang no wa madang no lei apha ah amitpu hana inna nahani akha chu lea so weh. 51Hana chu amitpu na atan, atan wat weta ahra sha matullu lim ha pha ange hana chu amo hi aha riella trappange.
Markert nå:
MITHEW 24: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
