MITHEW 17
17
Jisu Melrung Hlongna
(Mak. 9:2-13; Luk. 9:28-36)
1Chuna rungnie naruk nutienga Jisu na amo hitta Pitar, Jacob akha chu Johon Jacob hita rui weta chungtek ti mulbung ah manithei chak kalso. 2Mani anna amlei ah maikunga Jisu na melrung hlonga mamai soun na semnie nu hekta warra, akha chu apun choi angouna demwar war so ae. 3Hana arui inthum na Moses, lea Elija na Jisu ta trong thoupi ah am ri so ae. 4Chuna Pitar na Jisu ta ril, “Rengpa hina ani am hi ehekta hra so ae, ejong nangna ngaipi ta lea chu keina tusang inthum sa num minge rengpa tarang akha, Moses tarang akha, hana Elija tarang akha.”
5Hata mani trong thou lei ja awar sumphai na manita hlumma sanrol akhana sumphai karra ril, “Nahi kasanaopa ae amota keina lungshi inge makolla keina ehekta pel sange nangei na maril ha thei oh.”
6Marui ngeina son rol hi thei pha juija mani na atri ah alei chunga amai bu ah tu so ae. 7Chuti weta Jisu na mani am na wa weta tongso, “Atri no oh!”, Amona ril, “thou jou oh.” 8Chuna manina Chungtinga anjuija mani na Jisu ah no wa atu akha phao ri pha no ae.
9Mani na molbung hai thou tumma, Jisu na mani ta chupi, “Atujong akha kolla awoni nangei ri ha ril shuk no oh, meesanaopa na athi haithou wa ringthou malim ma.”
10Chuna arui ngei na makolla sai ae, “Alo wa rouphun ocha ngeina chu Elija na masha ah phao ange ta rilla meh?”
11“Adiek takka Elija na Phao masha ae”, Jisu na sang, “Hana amona eheilim thourang rang ange.” 12Chuna keina nangei kolla rillinge Elija chu phao shu so ae mani na amota mel dang no ae chuna sarukka machunga mani dit aenum tullu lu phur ae. Chu hekta meesanaopa takom mani kut chunga aol ana pha ange.
13Hana arui ngei na lunghal thei ah na hi amo na Johan Baptias rou wa rilla am mee ta hal so ae.
Thimpalop Lut Apasanao Ta Dampi Na
(Mak. 9:14-29; Luk. 9:37-43)
14Mani na wairul rija am na nei ah wakjuija Jisu maikunga apa akha na huk hrun na ah ril ae. 15“Rengpa oh, ka sanao pata thangshit ngei pi oh, amo ha thikier don na ehekta olso ae amo hi tuisunga meisunga hata tul chakti ae. 16Keina narui ngei kolla rui phao inge chuti weta mani na amo ta dampi nea nijo weh.”
17Jisu na sange, “Oh ngoiring lou ngei oh akha chu lam diekno meerol ngei oh! Echan sotta keina nangei kolla am ha ang sa? Echan sotta keina nangei ta donga am mang sa? Apasanao ha ka am na ah ruija wa oh.” 18Jisu na thimpalop ta trongshi ril weta apasanao kolla hai thou shuk so. Hana apha amo ha dam so ae.
19Hana marui ngei na Jisu am na ah mani chak wa weta sai, “Alo wa kani na julla hou nea no wa meh?”
20Jisu na sange, “Rouram chu nangoi ring ha rat no sharukka ae, keina adiek rou rillinge. Ejonga nangoiringna antam muh thap te am ta lea chu, nangna na amulbung ta amunt hina thou hlonga hi na am mo ril che hal hlong ange nakolla neno ti am mang no ae.” 21Chuti halkom hijongpa lim hi bu hai ah niek a no wa chu shuk nea no ae.
Jisuna Mathittang Rouram Ma Rouril
(Mak. 9:30-32; Luk. 9:43-45)
22Marui ngei na Galily ah manilim na rachun wakjui ja Jisu na ril, “Meesanaopa ta meengei kut chunga pe ange. 23Mani na amota that ange akha chu rungnie nathum sunie ah amo ha ring thou ange” chuna arui ngeina aol na shi so.
Mokna Inn Thienga Pekkang Sum
24Kapharnahum ma Jisu akha chu arui ngeina tunga sum hrai anina Pitar am na phao weta sai, “Nangei ocha na innthieng sum pejou meh?” 25Amo na inn thieng lut juija Jisu na amota masha rilleh, Simon nangna chu ejongpa rilla che? simlei chunga Rengpa ngei na atujongpa kolla sum la meh? masanao ngei kolla mo ano lea tairam mee ngei kolla mo?
26Amona tairam mee ngei kolla ae ta sange chuna Jisu na makolla ril rouram chu huram mee ngei chu pekphung shuk no ae. 27Chuti halkom anina mani ta shungshi oida pi no ranga nangna tuipi ah thing weta kui jun thinga chuna masha na mant tuiriek ha abou nather juija sekal akha tuk kange, naha la weta mani ta pe thingo, kasaruk akha chu nasaruk ko tolla pe oh.
Markert nå:
MITHEW 17: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
