MITHEW 10
10
Arui Asom Anita
(Mak. 3:13-19; Luk. 6:12-16)
1Amona marui asom ani ta kok weta hrano muihla ta julla hou nea rang akha chu rai eja ta dam pi nea rang jaitha pe ae. 2Ahalsha rui asom ani hina kokna, masha ah Saimon Pitar ta kok, akha chu Andrew manao; Zabedi sanao Jacob akha chu manao Johon. 3Philip akha chu Bartholomew; Thomas akhu chu Mithew sal hraipa, Alphaeus sanao Jacob akha chu Thaddaeus, 4Kananna Saimon akha chu Judas Iskarot Jisu ta jur pa.
Jisuna Asom Anita Hla Na
(Mak. 6:7-13; Luk. 9:1-6)
5Na asom ani hita Jisu na chupi ah hla ae manita. “Gentle (meejaty) ngei am na thingno oh anoleh Samaritans ngei hulokka kom lut no oh. 6Chuti weta Israel ngei inn sunga amangsa kelmo ngei ta lella jongo. 7Akha chu nathing juija hita rou rillo, thangwan rengram hi neiso ae. 8Ana (Rai) ngeita dampi oh, athi sa ta kom ringthoupi oh, Raichi ngei ta kom hra pi oh, dijabol takom julla hou oh, ariemsalla pha sou chu ariemshalla nangkom pe oh. 9Nangei sumhao sunga sona, rupa, akha chu sumsan kom choi no oh. 10Akha chu nalam taranga linglut ani anoleh huirang anoleh molbuk choino oh rouram chu tullu lu mee tarang abak pha ange.
11Hana husunga akha chu hulokka nangei na ejonga lut juija atuna ae nea ang mo ti ha hrabakta jongo. Akha chu nangei na shukka thing malim ma amunt hana am mo. 12Nangei na inn sunga lut juija ariemma riemtuk pe oh. 13Chuna inn sung hana ejonga manae yaitha cha lea chu nangei kolla adai ha inn sung chunga am shu oh. Ejonga mani inn sungna matik chanoleh nangei adai ha nangei kolla lea shu oh. 14Akha chu ejonga atujong akha na nangei ta ariem ma wokpi no anoleh rou ngeipi noleh inn sung akha chu hulok hana nangei sukjuija nangei kaepha ah vokphul ha thaphur oh. 15Keina nangei kolla adiek rou rillinge atreem na routreem chu hajong hulok ngei ha Sodom akha chu Gomara na tieng hella sha tek kange.
Aol Ana Phaorang
(Mak. 13:9-13; Luk. 21:12-17)
16Rammui ngei karra kelmonao hla hekta keina hla singe chuna sarukka arul hekta lung singo, akha chu wurhu hekta nalung nemmo. 17Malmashi ngei ta sing theiyo, manina nangei ta ulien changei kut chunga pe weta synagoge sunga rui lut weta nangei ta hoino hrano rou rillange. 18Hana chakno wa ka sarukka ram sunga reng ngei hana ram ronna am Governors ngei akha chu jat adang ngei kolla saro ei pi ange. 19Chuti weta mani na nangei ta hup pa mant juija ejongpa rou rillang mota ati no oh hana juija nangta ejong rou rillang mo rouha pe ange. 20Rouram chu rou ha nangei ril ah no weh chu-na pathieng muihla athieng na rille sa ae.
21“Ulenao kar sunga kom ma ata na manao ta akha chu mapa na asanao ta athit ranga jur hlak kange akha chu unga ngei na kom mapa ngei ta an num no wa athit rang phao ae ange. 22Ka sarukka malmashi ngei na nangta anda ange, chuti weta atreem ni rungni phao sunga ratta dongthei ngei ta chu sanpi ange. 23Chuna nangta amunt akha ah sun rella ae juija ram a danga tanna thingo, keina adiek rou nakolla rillinge, meesanao pana jung matienga nangei na Israel hulok tunga rol nea ang no chau.
24“Arui na ma ocha chunga am no ae, hana asuuk na amitpu chunga am no ae. 25Arui na ma ocha hekta akha chu asuukna amitpu hekta kai hal kom, ejonga inn amit puta manina Belzebul kok lea chu mani inn sunga am ngei ta chu eja hrano ming kok kang sa!
Atu Ta Ati Angsha
(Luk. 12:2-7)
26Chuti halkom manita ati no oh, rouram chu ril shuk kanglou athup rou ephao am no ae hana dang ang lou rou thuppa si ephao am no ae. 27Chuna keina nangei kolla janthiem ma karil rou ha nisuon na rillo, hana nakurra nathei rou ha inn chunga kalweta au shukko. 28Pum ta that nea ngeita eko ati no oh manina muihla ta chu that nea no ae hella natit ang chu pum akha chu muihla ta that weh ta sarmei kum ma yunna hou nea amo ta ting ati oh. 29Vashak awa anita ana paisa taranga jur no wa mo? akha chu Pathieng ahal ano wa chu mani karra akha phao nakom alei chunga tul no ae. 30Akha chu nalu wa tousam phao masing tella shi ae. 31Chuna saruka ekom ati no oh, nangei chu vashak ta hella aman tam meh.
Khrista Ta Ngaino Ah Rilshuk Na
(Luk. 12:8-9)
32“Atu jong akha na malmashi ngei maikunga keita ariem ma ngaipile chu keina kom thangwan ram ma pathieng kolla ariem ma ngaipi ange. 33Chuti weta atujong akha na malmashi ngei maikunga keita ngeinum no mee ha thangwan na pathieng mai kunga ah keina kom ngei ang no ae.
Adai Ano Ae Chamsei Ae
(Luk. 12:51-53; 14:26-27)
34Alei ram ma kajunghi adai pe junge ta hal no oh, kajung hi adai pejung nonge chuti weta chamsai pe yung inge. 35Kajungna rou ram chu: Asanaopa na mapa ta anda rang, asanao nu na manu ta anda rang, amau na mani ta anda rang ae. 36Hana ehekta ma anda mee ha ma inn sunga shuk kange.
37Atu jongpa na mapa manuta keita lella lungshi mee ha chu matik cha mee no ae hana atu jongpa manu mapa nakom asanao ta kei ta hella lungshi lea chu amo ha matik cha mee no ae. 38Akha chu atu yong akha na ma khross choi no weta kanutieng jui lea chu amo ha matik cha mee no ae. 39Atu motieng akha na aring rang jong lea chu amo ha mang ange, akha chu atu motieng akha na ka sarukka aring chang mang pi lea chu amo ha aring pha ange.
Ae Mant
(Mak. 9:41)
40“Amona nangta ariemma langpi chu keita lang sa ae. Akha chu amo na keita ariem ma lang mee ha keita hla pata lasil la ae. 41Atujong akha na Chungthieng rou maril akha minga lasil lea chu Chungthieng rouphu hana lomman ha pha ange. Akha chu amo na dramochel akha ta dramochel mee ae ta la sil lea chu amo kom dramochel hana lomman pha ange. 42Hana asin te ngei kar sunga akha ta atu jong akha na karui ae ta siktui heisin akha te pe lea chu keina nangei kolla adiek rou ril linge ae mant ha sui no ah pha ange.
Markert nå:
MITHEW 10: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
