LUK 19
19
Jisu Lea Zakajas
1Jisu na Jerikho wa lutta hu lalla thingso. 2Hana aming na Zakajas ti chungtekti khasana hrai achongpu akha am meh. 3Amo na Jisu ta ri ranga julla rol ae chuti weta ripha nea no ae wairul riha karra roulam chu amo ha adung nem sarukka. 4Chuna sarukka amona wairul riha ngei maitienga tanna thing weta Jisu wak rang lampitienga theipong kunga Jisu ta ri rang kalso. 5Jisu na amunt hana pha ah wak juija achungtienga ann weta Zakajas ta ril. “Harra tumma jungo, roulam chu awoni kei na inn na tung ange.”
6Zakajas na harra tumma jungveta amota chekta ariem lam tukka amota rui lutso. 7Hana am malmashi ri makhai na hita rouril hlak thou so, “Na Jisu hi pakchel inn sunga mee awin changa tunge!”
8Zakajas na ngir thou weta ril, “Arengpa! Ka am kadon lim hi ajaija hui weta sara ringrei ngei ta pe ange akha chu atujong akha kolla muthui phur ha lah phur lea kei na saruk innly shukka lea pi ange.”
9Jisu na makolla ril, “Awoni hai thou na inn sunga samla ringchang tungso ae chuna sarukka na spa hi kom Abraham hina thou jung atu ate ae. 10Meesanou pa na junghi amang sha ngei ta sanpi ranga jong junge.”
Talen Panteem
(Mit. 25:14-30)
11Manina rou hi ngeija amleija Jisu na manita panteem akha kom ril, roulam chu arengpu na Jerushalem nei ja wa so ae, hana mani na Chungthieng rengram harra ri ang so ae ta hal. 12Chuna amona na ril, “Apha akha ah meena ajak atri spa akha ammeh, amona ram adanga reng chang rang sarukka matheng jui ah hana maleh ang jui ah. 13Mathing ma hai ta, amo na masuuk asom ta kokveta mani limpa ta sona chandi asom, asom peveta ka lea malim ma hina nangei na achong rang hotna oh. 14Chuna mani ram sunga mee ngei na areng mahal phur pa ta kanina di nonge amona kanita runga am hi di nonge chuna mani na rouron mee hal weta amnutienga ma am na ah hla so.
15“Areng hana maram ma maleh juija masuuk limpa ha makolla woiha chakka phou ha rang rou pe ah akha chu mani na eja phao wa sum tam pi jou mo weta kom dangnum ma. 16Masha akor hana wa weta ril, ‘Arengpa napek sunga keina asom pha singe.’ 17Amona ril, ‘leima hra so ae,’ ‘nanghi ahra kor kae, nangna asien te tullu ma ngoiring ang am mee ae chuna keina nangta ram asom ma mitpu changpi ange.’ 18Anie suna pa korna waveta ril, ‘Arengpu,’ napek sunga keina ranga hella pha singe.’ 19Napa ta chu amo na ril. ‘Nangna rengram ranga ah mitpu chango.’
20“Adang kor hana waveta ril, ‘Arengpa, hina am so ae keita napek sum; keina lumant sunga soun na thuppa si inge. 21Roulam chu keina nangta atri inge nanungchan ha nang chu nawor lou muchi kom tuk che ae hana natalau kom nang chu sar che ae.’ 22Makolla chu amona ril, ‘hrano kor nang! Naril rou mak hana nangta kei na neinunt pe ange! Nangna danga am che ae kata lau kon sar ae hana muchi worno kom luk akae ta. 23Hra so ae, chu lea chu nang na bank sunga shi ngei no che hana shi lea chu kaleh juija sum hana amant ahel keina pha ong no meh.’
24“Chuna hana ngirra am malmashi ngei ta amo na ril, ‘makolla thou nangei na am sum ha la weta saruk asom hella ronna phou pa kolla pe oh.’ 25Chuti weta mani na makolla ril, ‘Arengpu, amo chu saruk asom pha sa so ae!’ 26‘Keina nangei ta rilla aminge’ ta amona sang, ‘ha chu atujong akha na ahre te am lea chu tam ma keina happange. Hana atu jong akha sup am am no kolla chu atom te ma am te ha kom keina lah ange makol hai thou wa. 27Atun chu, keita anda mee ngei hana keita mani arengpa changpi num no ngei ha hina makka mani ha ruija wa weta kamai kunga makka thatto!’ ”
Jerusalemma Jisu Thangshuk Maipak Na
(Mit. 21:1-11; Mak. 11:1-11; Jhn. 12:12-19)
28Jisu na nahi rilla rilla hata mani matienga am Jerushalem pha ranga thing. 29Olives mulla Bethany akha chu Bethphage neija malut juija Arengpu na marui anie ta mani matienga hla hakso. 30Hita rilla hla so: “Nangei maitienga am hu sunga thingo; hana nangei na hata lut juija nangei na kormoh sanao mee na chunglou akha ren na am tukkang chau ae. Rui ha hla weta hina ruija wa oh. 31Ejonga atujong akha na nangei ta alo sarukka ruija thinga chou meh sai lea chu kamit pu na darkar am meh ta rillo.”
32Manina hata mani thingjuija Jisu na mani kolla ril makhai ha tukhlakso. 33Kormoh sanao hana rui hla ah am leija amitpu na manita, “Ejeranga rui hla ah am ma chau?”
34“Arengpu na nahi darkar am meh,” ta manina sang. 35Kormoh sanao ha Jisu kolla ruija wa ah mani punchoi derchoi ha kormoh sanao chung pha pi weta Jisu ta ong pi so. 36Hata arengpu na ma wakjuija malmashi ngei na mani punchoi derchoi ngei lampi ha phaso.
37Jisu na Jerushalem neija wakjuija olive mul hai thou wa atung tuma junga manu tieng jui wairul riha na Chungthieng ta ariemma sansol shukka aou wa dom thou so roulam chu mani na ripha angakpi tullu eja hana sarukka. 38“Arengpu minga wa rengpa ta Chungthiengna jaihra pe shu oh! Wanram ma adai changsu oh, hana Chungthieng mahung majai chang su oh!”
39Wairul riha sunga Pharisis ahre na Jisu kolla ril, “Arengpu,” manina ril, “Narui ngei hi dai ranga rou pe pi oh!”
40Jisu na sang, “Nangei kolla rilla aminge keina ejonga manina daija am lea chu alungei na manithei chakka aou thou ange.”
Jerushalem Taranga Jisu Tap Na
41Jisu na Jerushalem hupi pha ah wakjui hana amona mari jui amona tap so. 42Amo na ril, “Ejonga nangna awonie hina adai darkar hi dangpha ta lea chu nu! Chuti weta nangna chu ripha nenijo che! 43Apha ha wa ange nangei ta anda mee ngei na ralpal harra, nangeita abak enn tungpi no ah, hana nak eheilim shuk, lut rang thing hap si oh weh. 44Chuna inn bang sunga am na mee ngei kom nang kom manina nea ange hana alung akha na alung akha chunga mani na hou phur ang no ae roulam chu nangta sanrang apha hana nangna dangpha nijo che!”
Jisu Mokna Inn Ah Thing Na
(Mit. 21:12-17; Mak. 11:15-19; Jhn. 2:13-22)
45Jisu na athieng inn sunga lutta asunga am pot jur ngei ta julla thou so. 46Manita hita rilleh, “Chungthieng rou na hita jiekka shi so ae, ‘ka inn hi niek ranga inn ae.’ Chuti weta nangei na aru thei ngei abu wul pi so chau!”
47Hana thou wa Jisu na rungnie chang honna alona chupi takpi so, chungtekti thiempu ngei, hana rou kung ocha hana malmashi lamkai ngeina amota that num ma waishi thou so. 48Chuti weta manina ejongpa lamma amota tullu lu ang sa dang nea no ae roulam chu malmashi lemna hrabakta ngei ah trongsan akha phao manina theibet num no ae.
Markert nå:
LUK 19: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
