LUK 17
17
Pak
(Mit. 18:6-7,21-22; Mak. 9:42)
1Jisu na arui ngei ta ril, Malmashi ngei hi pakka tul rang suino wa ahlem am mange, chuti weta eja ah ati pi mo nu pakka tulpi amo ha! 2Hijong asiante pak tullu ma pak ta pi ang saruk chu mataranga chu ahonga chakkari lung ren weta tuipi sunga denga houpa na hella hra tekkange. 3Chuna natullu lu ha min na an no! “Ejonga na u-nanao akha na pak tullu lu lea chu trongshi rillo, han ejonga amo na lung hlong lea chu ngakpi oh. 4Ejonga amo na nahani akha ah woi sari pak tullu nakolla ae lea chu amona alung hlonga woisari nakolla lea weta ko ngakpi oh ril lea chu amo ta ngakpi oh.”
Ngoiring Na
5Arui ngei na Jisu kolla ril, “kani ngoiring hi rat pi oh.”
6Arengpu na ril, “Ejonga nangna antam muchi thapte nangoiring am lea chu nang na kabarang kung ta nangna nathei chakka atro tolla phoi weta tuipi sunga phun mo naril jui ange.”
Suuk Ngei Tunluh
7“Ejong nangei kar sunga akha na kor don na lou hui thing anoleh kelmo rungpi se weta ramma thou mahong juija nangna mabu bakka am lei ja ranga barro ta ril che? 8Nata ril no ae! Hana hutta makolla naril chu, kabu bak ranga su so ae chuna napun nani sem sa ah keita tun hlou ae pi oh. Kabak lei sunga kabak su nutienga nataranga bu hran na am mange? 9Kor hana matullu ae sarukka naril jui sarukka nangna amo ta ariem minge ta rilla che? 10Chuna sarukka nangei kolla pek trongsan lim pa ha ae su wa, ‘Ani chu matik chano kor, ani hi ae phung shuk tullu chak ae so ae ta nangei na rillo.’ ”
Jisu Na Spa Asom Ta Dampi Na
11Jisu Jerushalem malampi tienga mathing juija amo na Samaria lea Galily apanga thinge. 12Mathing na husunga ae atipi ah untsha rai na asom spa ta aram lah hai thou wa ngirra am ripha. 13Hana mani na hita aou shukkae, “Arengpu Jisu! Kani ta ringrei ngei pi oh!” 14Jisu na mani ta rija ril, “Nangei takka thing weta thiempu ngei ta an pi oh.”
Mani thingna lam ma mani ha dam so ae. 15Mani kar sunga akha na matak ma an juija damso ae. Amo na lea weta Chungthieng ta ariem sanrolla domso. 16Matak mathei chakka Jisu kae kunga bokka mokveta amota ariemma domso. Amo ha Samaritan malmashi ae. 17Jisu na ril, “Spa asom no meh dam pha ha chu, hoija am meh aku ahre chu? 18Alo sarukka ramdang sanao akha hina chak lea weta Chungthieng ta ariem minge ta ril meh? 19Chuna Jisu na makolla ril, “Thou jou oh; nangoiring jarra nang na dam pha so che.”
Rengram Jung Ranga
(Mit. 24:23-28,37-41)
20Pharisis ahre na Jisu kolla Chungthieng rengram hi etikka jung ang meh ta sai. Masang phur chu, “Chungthieng rengram chu ri chek-chekta jung ang no ae. 21Atu akha na rillang no ae, ‘Anno, hina amso weh!’ ah nolea, ‘hiso ae!’ roulam chu Chungthieng rengram chu nakolla am so ae.”
22Hana Jisu na arui ngeita ril, “Meesanao pana jung ang rungnie ha nangei na rinum chau halkom rine no rungnie ha phao ange. 23Nangei ta mee ngeina hita rillange, ‘Anno hako am so ae!’ ano lea, ‘hina am so ae!’ Chuti weta hana anthing rang shukka thingno oh. 24Wochamplakna wan na mawar juija adang amunt tienga mawar pha nea hekta meesanaopa rungnie kom chu hekti ange. 25Chuti weta masha ah aol ana eja pha ah awoni ah nangei mee ngei na kom nangta ngei num mang no ae. 26Meesanaopa rungnie ah chu Noah apha hek ti ange. 27Malmashi limpa na bakka inn na akha chu namei apa taichang lhakka Noah na kung sunga lut nie rungni phao wa tui lokka mani thit ha. 28Hana jui ja chu Lot apha hekta. Malmashi limpa na bakka inn na pot lei ah jurra inn sha ah am mange. 29Lot na Sodom hou wa mathing waitakka wan tieng hai thou wa sarmei na ru sur hekta junga mani limta that so. 30Meesanaopa na rungnie hakom hi hek ta ripha ange.
31Nani rungnie hana chu atu mo akha na inn chunga am halkom tumma jungveta mapot la jung no shu oh; hahekta loupokka am mee na kom ma inn na lea ah an no shu oh. 32Lot namei nu ta angei thei oh! 33Atujong na maringchang tarang hal mee chu amang pha ange. Hana tujongna maringchang tarang hal no lea chu jaihra pha ange. 34Keina nangei kolla rilla am minge nani rungnie ah chu kot chunga malmashi anie na jalla am sunga akha ta ruija thing ange akha ta na hou phur ange. 35Namei anie na sangsu wa am mange akha tana ruija thing ange akha tana hou phur ange.” 36(Loupokka malmashi anie na tullu lu ah amange akha tana ruija thing ange hana akha tana houphur ange.)
37Arui ngei na makolla sai, “Hoija meh Arengpu?”
Jisu na sang, “Hoiya amunt na hal athi sa ngei am na amunt na longkija kom pulla am mange.”
Markert nå:
LUK 17: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
