Matie 16

Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn, ke ji anvɛmɛ̀n-frɛ́n-ci tɔ̀n kɛ̀ kàn

(Nyɛ́n nyan Markɛ̀n 8:11-13; mán Lükɛ̀n 12:54-56 wrú lɔ mɛ̀n)

1Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn sɔnba Zhezü ɛtɛ̀sɛ̀n ô kɛ̀ krɔn nɛ̀n antanwrɔn. Yɔ dɔ́ nɛ̀n, nɛ̀n hán anvɛmɛ̀n-frɛ́n-ci tɔ̀n nɛ̀n tán yɔ, yɔ kàn, ô kè yé tán le n'ɛkɔrɛsrɔn dú Ɔwɔ yri và. 2Tɛ́n Zhezü mrɛ́n yɔ ɔmùan le: “Ɛnbri bore mùan mɛ̀n, nyɛ dɔ̀ le: ‘Ɛyri ke le bi, ɔmuhi anhobɩ́ srɔ anwɔnsɛ́n nɔn.’ 3Kɩ ɔsɔ̀wrɔ̀ fùtàn, nyɛ dɔ̀ le: ‘Ɛnyɔncì lɔ ɛnshi kɛ lɛ nàn, ɔmuhi anhobɩ́ murɛn nɔn.’ Nye nyri ɛci woroan-ci hɔ̀n léyi dú anhobɩ́ nɔn, tɛ́n nyɛ́n sɩ̀ ẅɛ̀n ɛnkruemɛ̀n, nyɛ́n nyrì ɛci hɔ̀n léyi kɛ wɔɛ́n anhobɩ́, hɩ dú ɛnvra ndɔ hɔ̀n lɔ mɛ̀n ci nɔn! 4Ɛnyɔncì-bɔ̀ léyi dú anwrɔn gbàngbàn kɩ ke sɩ́ di ɔmùan-zri Ɔwɔ tɛ̀sɛ̀n nɔn, ke ji anvɛmɛ̀n-frɛ́n-ci tɔ̀n, tɛ́n anvɛmɛ̀n-frɛ́n-ci zriɛmɛ́n ke sɩ̀ hán kɛ̀ tán yɔ, ke dú kɛ kè sɩ̀ dù Zhonasɛ̀n tɛn lɔ.” Zɛtɛn nɛ́n teze yɔ kɩ nɛ́n nán-hɔ̀n.

Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn, y'eci-fɔ́-ci

(Nyɛ́n nyan Markɛ̀n 8:14-21 wrú lɔ mɛ̀n)

5Ɛnvra léyi ɛsɛ̀nkɛn-bɔ̀ lɔ vɔ́n-shi nɛnbà cɛ mɛẅi nɔn, esùva yuru yɔ, ye sɩ̀ bɩ abùtùkumɛ́n. 6Zɛtɛn Zhezü kɛ dɔ́ yɔ le: “Nyɛ́n wá esùva, Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn, y'eci-fɔ́-ci tɛ̀sɛ̀n.” 7Ɛsɛ̀nkɛn-bɔ̀ lɔ kɛ dɔ́ y'edomɛ̀n le: “Nɛ dɔ́ ɔmu lɔ, ɔmuhi bɔ̀ sɩ̀ bɩ abùtùkumɛ́n nɔn.” 8Zhezü yá y'ankà-dɔ̀ lɔ kɩ ke yrɛ yɔ le: “Cɛci kruhú kɛ nyɛ dɔ́ ny'edomɛ̀n le: abùtùkumɛ́n léyi bɔ̀ sɩ̀ bɩɛ nɔn hɩ kruhú? Nyàn ɔmuhi ny'ankàẅì-bùtan cɛcɛ nɔn! 9Ɔmu tɛ̀kɩ nyɛ́n sɩ́ cɔ́ nyri hɛ́n? Ke sɩ́ bru nyɛ̀n, abùtùkumɛ́n ɛnrì léyi yɛ dɛ́ anwrɔn tɛ̀bru-kru-ɛnrì mán ɛci léyi wɔrɔ nɔn, ankɛ́ mùan léyi nyɛ́n bɩ nɛ́n? 10Kɩ ke sɩ́ bru nyɛ̀n, abùtùkumɛ́n ɔbɔɛ̀n léyi yɛ dɛ́ anwrɔn tɛ̀bru-kru-anzɔ̀ mán ɛci léyi wɔrɔ nɔn, ankɛ́ mùan léyi ye bɩ nɛ́n? 11Anhɔntan kɛ nyɛ́n sɩ́ nyriɛn le, kè sɩ̀ dù abùtùkumɛ́n ankà de mɛ́n dɔ́a ɛnvra léyi mɛ dɔ́ nyɛ̀n le: nyɛ́n wá esùva, Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ ankà kɛ tán ankàẅì, y'eci-fɔ́-ci tɛ̀sɛ̀n nɛ́n?”

12Zɛtɛn ɛsɛ̀nkɛn-bɔ̀ lɔ nyri ɔmu le, kè sɩ̀ dù abùtùkumɛ́n ci-fɔ́-ci ankà de Zhezü kɛ dɔ̀a nɔn, tɛ́n ankà-yé léyi Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì kɛ tán nɔn, hɩ ankà de nɛ dɔ̀ nɔn.

Piɛrɛ̀n kɛ dɔ̀ le Zhezü dú Ebɩdie-wrɔn

(Nyɛ́n nyan Markɛ̀n 8:27-30; mán Lükɛ̀n 9:18-21 wrú lɔ mɛ̀n)

13Zhezü hɔ́n ɛnhi wú léyi dú Sezare Filipɛ̀n anmàn tɛ̀sɛ̀n nɔn. Ne yrɛ n'ɛsɛ̀nkɛn-bɔ̀ le: “Ankà tán de anwrɔn kɛ dɔ́ ɔwrɔnẅì Ẅì wú nɛ́n?” 14Yɔ mrɛ́n ɔmùan le: “Anwrɔn ndɔ hɔ̀n kɛ dɔ̀ le è dú Zhan Batisì, ɛnjanbɔ̀ kɛ dɔ̀ le, è dú Eli, kɩ ndɔ hɔ̀n vru kɛ dɔ̀ le, è dú Zheremi, Ɔwɔ-mùanwú-ankà-dɔ́-wrɔn tɔ̀n nyàntɛn.” 15Kɩ Zhezü ke yrɛ yɔ le: “Kɛ̂ nyɛ tɛn, antɔn de nye bú mɛ̀n nyɛ hán nɛ́n?” 16Simɔn Piɛrɛ̀n mrɛ́n ɔmùan le: “È dú Ebɩdie-wrɔn, ƆWɔ kɔrɛkɔrɛ lɔ n'Ɛnẅì.” 17Zɛtɛn Zhezü kɛ dɔ́ nɛ̀n le: “È dú ɛnbɔrɛbruemɛ̀n, Simɔn, Zhan ẅì, ɔmuhi kè sɩ̀ dù ɔwrɔnẅì de kɛ̀ wà mɛ́n ankà annànwɔrɛ ndɔ lɔ anmùan mɛ̀n nɔn, tɛ́n Dade léyi dú ɛwú nɔn. 18Kɩ mɛ̀n, mɛ dɔ́ mɛ́n annànwɔrɛ mɛ̀n le, è dú obù kɩ obù, ndɔ lɔ wú, me le ku mɛ́n fɛcüè wɔn lɔ. Owù dùku mán kè sɩ̀ ẅɛ̀n ɛkɔrɛ̀srɔn n'ɛwú. 19Mɛ lɛ tán mɛ́n Anhobɩ́ Nɛ̀ncüì-dúyri safɛ̀ hɔ̀n lɔ: eci léyi ɛ lɛ mrɛ́n sɔhɔ́ ɛnhi wú nɔn, anhobɩ́ mán yɛ lɛ mrɛ́n sɔhɔ́; eci léyi e le bɩ́ ɛnhi wú nɔn anhobɩ́ mán ye le bɩ.” 20Zɛtɛn Zhezü wá kpankpan tán n'ɛsɛ̀nkɛn-bɔ̀ lɔ, ke bɩ́ dɔ́ ɔwrɔnẅì zriɛmɛ́n le nɛ̀n dú Ebɩdie-wrɔn lɔ.

Zhezü kɛ dɔ́ n'owù mán n'owúemɛ̀n-dù-frɔ́ ankà

(Nyɛ́n nyan Markɛ̀n 8:31—9:1; mán Lükɛ̀n 9:22-27 wrú lɔ mɛ̀n)

21Bukru hi vra lɔ, Zhezü kɛ dɔ́ n'ɛsɛ̀nkɛn-bɔ̀ ankà kpetemɛ̀n kɩ nɛ dɔ̀ le: “Ke ji le mɛ̀n hɔ́n Zherüzalɛmɛ̀n kɩ mɛ lɛ kán ɛgbàn bobrebe, ɛcüìcüì-bɔ̀, Ɔwɔ-cice-bɔ̀ mán Ɔwɔ-nyànmàn-sùva-wá-bɔ̀ tamɛ̀n. Ye le di mɛ̀n owúemɛ̀n kɩ ɛbi-anhɔ̀n granmɛ̀n, me le dú owúemɛ̀n mɛ̀n frɔ́.” 22Zɛtɛn Piɛrɛ̀n bi nɛ̀n ɔhɔnán kɩ ke di nɛ̀n ebrè: “Ɔwɔ kɛ ẅɛ̀n sɔhɔ́, kɩ nɛ dɔ́ yi le: Ɛẅɛnwrɔn! Hɔ̂, eci ndɔ lɔ ke sɩ̀ hán mɛ́n!” 23Tɛ́n Zhezü crɛ̀ kɩ kɛ dɔ́ Piɛrɛ̀n le: “Sɔ́n hɔ̀n ɛmɛẅi esù she m'ɛtɛ̀sɛ̀n, Anwa-wrɔn! È dú eci léyi dabra dɛ́ mɛ̀n ɛnlevri wanziɛ nɔn, ɔmuhi è sɩ̀ ẅɛ̀n Ɔwɔ ankà-tro nɔn, tɛ́n anwrɔnẅì ankà-tro de ɛ ẅɛ̀n nɔn.”

24Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Ke dú kɛ ɔwrɔn ke ji kɛ và cɔ́ mɛ̀n hô, nɛ́n bɩ́ vru tro n'edomɛ̀n ankà, nɛ̀n shri n'ɛgbànkàn nɛ̀n bɩ, ô nɛ̀n kɛ́n mɛ̀n ɛsɛ̀n. 25Ɔmuhi ɔwrɔn léyi ke ji ke bɩ́ n'ɛwúvà lɔ kè die nɔn, kɛ lɛ zrɛ́n nɛ̀n; tɛ́n ɔwrɔn léyi kɛ lɛ zrɛ́n n'ɛwúvà lɔ m'ɛkruhú nɔn, ke le bɩ́ nɛ̀n kè die. 26Vɔ̀nshɛ́ tán de ke le dú tán ɔwrɔn léyi ke ji kɛ̀ ẅɛn ɛnhibù mumù lɔ fɛn, ke dú kɛ nɛ zrɛ́n n'ɛwúvà lɔ nɛ́n? Ecitan de nɛ lɛ tán, ô nɛ̀n wɔ́ n'ɛwúvà lɔ nɛ́n? 27Annànwɔrɛ mɛ̀n, ɔwrɔnẅì Ẅì kɛ lɛ vá nɛ́n Zi ci-zrɔ lɔ mɛ̀n, nɛ́n mán Ɔwɔ-kùyüre-bɔ̀ mɛhi, kɩ zɛtɛn, ne le ci ɔwrɔn wrɔn ɛmrɛ̀n, n'eci léyi nɛ̀n hán nɔn yi wú. 28Mɛ dɔ́ nyɛ̀n annànwɔrɛ mɛ̀n le: anwrɔn hɔ̀n léyi dú ɛnu lɔ nɔn, ɛnjanbɔ̀ ke sɩ̀ wù, ke dú kɛ yɔ sɩ̀ kàn ɔwrɔnẅì Ẅì kɛ̀ và kɛ̀ hán ɛnnɛ̀ncüì hɔ́.”

Markert nå:

Matie 16: ƐAA03

Marker

Del

Kopier