MATIUS 4
4
Tong Tuhan Yésus tenupat, Sitan
(Mrk. 1:12-13, Luk. 4:1-13)
1 #
Ibr. 2:18, 4:15 Pu'un Sahéé' Ni'ai mihin Yésus tai ahang tana' dokoo' Sitan tupat éh. 2La'au' lah éh kelaset avéé' pat poloo' dau pat poloo' merem kelebéé', la'au' lah éh. 3Boh Sitan tuai bara' ngan néh, ka' ha' néh, Hun Ko' Anak Allah mu'un, ko' ngepaléu kekat bateu' iteu' malui roti, ha' néh.
4 #
Ula. 8:3
Ha' Yésus mipa éh, Ka' ha' lem surat Allah, Bé' éh neu' roti awah kelunan omok murip, bang réh omok murip neu' kekat ha' éh benara' Allah, ha' Yésus ngan néh.
5La'o inah Sitan mihin Yésus tai leboo' Yérusalem ke' néh mihin éh tai beluvung Umaa' Allah, 6#Msm. 91:11-12 ka' ha' Sitan ngan néh, Hun Ko' Anak Allah mu'un, jian ke' ngeliwang kera' ketai, uban pu'un jah ha' lem surat Allah éh bara' ka',
Allah juk nyohoo' meliket Néh mihau Ke',
meliket juk nyagem Ke' palaa' ojoo' néh,
dokoo' gem Ko' bé' suhat neu' bateu', ha' Sitan nah.
7 #
Ula. 6:16
Boh Yésus mipa éh kepéh, ka' ha' néh, Pu'un ha' lem surat Allah bara' ka', Mai ke' tupat Tuhan Allah éh kenelan ko', ha' néh.
8La'o inah kepéh Sitan mihin Yésus tai berusu' éh bau ke' néh tojoo' kekat arong tana' ngan kekat arong kejian éh tong tana' ngan néh. 9Ha' Sitan ngan néh kepéh, Kekat penyukat ngan pengaren iteu' akeu' mena' éh ngan Ko' hun Ko' ngejekuu' lep Ko' ngan seva' akeu', ha' néh.
10 #
Ula. 6:13
La'ah ha' Yésus mipa éh, Kelap ke' Sitan, uban ka' ha' Tuhan lem surat néh, Tekep ke' seva' Tuhan Allah éh kenelan ko' ngan kivu sohoo' nah awah, ha' néh.
11Boh Sitan piso jin Yésus ngan meliket Tuhan tioo tai petubo Yésus.
Tong kereja' Yésus tong tana' Galilia
(Mrk. 1:14-15, Luk. 4:14-15)
12 #
Mat. 14:3, Mrk. 6:17, Luk. 3:19-20 Hun Yésus menéng rengah Yohanes Batis kamit réh ngan pu'un dalem lamin tutup, piso éh tai tana' Galilia kepéh. 13#Yoh. 2:12 La'ah bé' Iah mokoo' tong leboo' Nasaret bang Iah mokoo' tong leboo' Kapernaum, jah leboo' éh déhéé' baa' Banget Galilia éh tong tana' tutuh tana' Sebulon ngan tana' Naptali. 14Pu'un éh kenat ke' néh pesukup kekat ha' éh benara' nabi Yesaya ngan kelunan sahau. Ka' ha' Yesaya nah,
15Tana' Sebulon ngan tana' Naptali,
éh déhéé' baa' Banget
saa' dipa baa' Yordan,
inah éh Galilia éh tana' jalan kelunan éh tengéé' pohoo' jin irah Yahudi.
16 #
Yes. 9:1-2
Kelunan éh mokoo' tong merem
omok éh na'at rema peséng.
Kelunan éh mokoo' tong jalan éh mihin réh matai,
omok rema inah nawa tong réh, ha' néh.
17Jin la'o Yésus tai leboo' Kapernaum, inah éh bu'un néh maneu' kereja' néh éh nebaraa' kelunan. Ka' ha' néh, Piso keh jin penyala' keh, uban jaka' Allah Pengeja'au lepah danii', ha' néh.
Tong Yésus tebai pat kelunan kivu éh
(Mrk. 1:16-20, Luk. 5:1-11)
18La'ah, Yésus lakau déhéé' baa' Banget Galilia, inah Iah na'at duah kelunan ngejala'. Rawah inah pepadéé', inah éh Simon, keruwah ngaran néh, Péterus, ngan padéé' néh Anderias. 19Ka' ha' Yésus ngan roh, Jian koh kivu Akeu', Akeu' nebaraa' koh tong jalan koh omok pitah kelunan éh tawang ngan mihin réh tavin Akeu', barei' kawah jam pitah seluang nah, ha' néh. 20Pelapah rawah modoo' jala' roh ke' roh kivu Yésus.
21Lakau Yésus kepéh, inah Iah na'at duah kelunan éh jah kepéh éh pepadéé', Yakub rawah Yohanes éh anak Sabedeus. Rawah pu'un dalem alut petenup jala' roh pemung ngan tamen roh Sabedis. Yésus tebai rawah inah kepéh kivu éh. 22Pelapah rawah modoo' alut roh ngan pokoo' tamen roh ke' roh kivu Yésus.
Tong Yésus nebaraa' kelunan ngan peka'o irah éh sakit
(Luk. 6:17-19)
23 #
Mat. 9:35, Mrk. 1:39 La'ah Yésus lakau tutuh tana' Galilia ke' néh nebaraa' réh dalem kekat lamin sebayang Yahudi. Pu'un éh bara' Rengah Jian tong Allah éh pengeja'au, ngan pu'un éh peka'o réh jin kekat arong kesakit ngan pengelemoo' usah réh. 24La'ah rengah néh inah avéé' pah tipo tana' Siria, pu'un réh mihin kekat kelunan éh sakit tavin éh, irah éh pu'un pinaa' arong kesakit, ngan irah éh nasek balei', ngan irah éh tuleu' ngan irah éh matai keluhat péh, pu'un éh peka'o réh béé. 25La'ah pinaa' kelunan kivu éh, irah jin Galilia ngan Dekapolis ngan Yérusalem ngan Yudea, pemung ngan irah jin saa' dipa baa' Yordan.
Markert nå:
MATIUS 4: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
