MATIUS 20
20
Tong kelunan éh kereja' tong pulah agun
1La'ah ha' Yésus kepéh, Tong kelunan éh pu'un lem nihau Ké' ngan Akeu' Pengeja'au réh, pu'un éh barei' ha' tapan tong kelunan éh pu'un pulah agun. Kelunan inah lakau ngivun-ngivun ke' néh tebai kelunan tuai kereja' tong pulah inah. 2Iah jajii' mena' gaji pekua' kemalai réh, inah éh jah rigit pirek tong siget dau réh kereja'. Boh éh nyohoo' réh kereja'. 3Avéé' musit pétéé' tai éh kepéh lakau tong jalan pebelih, sinah éh na'at kuraa' kelunan nekedéng awah bé' pu'un maneu' ineu'-ineu'. 4Boh éh pané ngan réh, ka' ha' néh, Jian keh tai kereja' tong pulah ké', ineu' gaji éh tekep da', omok ku' mena' éh ngan keh, ha' néh. 5Tai lah réh kereja'. Avéé' dau pejek, kenat péh dau kuba', tai éh lakau tebai kelunan tuai kereja' kepéh. 6Dau tahup tai éh kepéh tong jalan pebelih, iah na'at kuraa' kelunan to nekedéng sinah. Ka' ha' néh ngan réh, Ineu' neu' keh, ha' néh, 7Ha' réh mipa éh, Bé' pu'un ineu' neu' mé', bé' pu'un kelunan nyohoo' mé' jak, ha' réh. Ha' lakei' inah kepéh, Jian keh tai kereja' tong pulah ké', ha' néh.
8 #
Ima. 19:13, Ula. 24:15 Tovoo' dau merem kelunan éh pu'un pulah inah tebai pengeja'au éh mihin réh kereja' nah, ka' ha' néh ngan néh, Jian ke' tebai irah éh kereja' ri' mena' gaji réh. Mena' éh tenah ngan irah éh tuai kereja' metok awah ri', avéé' ngan irah éh tenebai ké' tenah nah, ha' néh. 9La'ah irah éh tuai kereja' dau tahup awah nah, iah mena' jah rigit pirek ngan réh. 10Hun irah éh bu'un-bu'un tenebai néh kereja' ri' pu'un tuai alaa' gaji réh, adang réh seruh irah omok alaa' éh pelapah pinaa' jin irah éh tuai metok awah nah. Bang bé' éh kenat, jah rigit pirek awah ke' éh nena' néh ngan réh. 11Pu'un réh alaa' rigit inah, merek réh, sa'at ha' réh maneu' lakei' éh tebai réh kereja' nah. 12Ka' ha' réh, Irah éh tenebai ko' jin murin mé' iteu' ri', metok awah réh kereja'. Améé' iteu' kereja' putung dau ngan tong pétéé' péh, bang éh nena' ko' ngan irah pekua' éh nena' ko' ngan améé' ke' éh, ha' réh.
13La'ah kelunan éh pu'un pulah nah pané ngan jah usah réh, ha' néh. O kéh, bé' akeu' ngebuyuk ke' uban hun ké' tebai ke' rai pu'un ku' jajii' mena' jah rigit pirek ngan ko', ha' néh. 14Jian ke' alaa' gaji ko', moléé' ke'. Kenin ké' tengéé' mena' gaji ngan iah éh kereja' jin murin, pekua' éh nena' ké' ngan ko', ha' néh. 15Kineu', bé' tekep ku' maneu' ineu'-ineu' éh keneloo' ké' palaa' éh anah ké' kei? Kineu', sa'at kenin ko' uban ké' mena' éh pinaa' ngan irah éh jah, ha' néh.
16 #
Mat. 19:30, Mrk. 10:31, Luk. 13:30 La'ah ha' Yésus, Irah éh saa' murin pu'un réh tai saa' tenah, ngan irah éh saa' tenah pu'un réh tai saa' murin kepéh, ha' néh.
Tong keteleu' koléé' Yésus bara' tong pematai néh
(Mrk. 10:32-34, Luk. 18:31-34)
17La'ah tovoo' Yésus lakau tai leboo' Yérusalem, Iah tebai irah bakéh néh éh jah poloo' duah usah nah, ke' néh pané ngan réh, 18ka' ha' néh, Jian keh mihau ha' Ké', hun iteu' itam juk tai leboo' Yérusalem, hun tam avéé' sitai pu'un réh mena' Anak Kelunan ngan irah pengeja'au imam, ngan irah guru éh nebaraa' tong sohoo' lem Surat Musa. Pu'un réh ngukum Iah matai, 19ngan mena' éh ngan kelunan éh tengéé' pohoo' ke' réh peja' éh ngan mipok éh ngan mematai éh tong kayeu' salib, bang tong keteleu' dau Tuhan pu'un pebetéé' éh murip kepéh, ha' néh.
Tong pengenyat tinen Yakub rawah Yohanes
(Mrk. 10:35-45)
20La'o inah tuai tinen Yakub rawah Yohanes éh anak Sabedeus, mihin rawah anak néh tavin Yésus. Pu'un éh ngejekuu' lep néh tong jumen Yésus ke' néh menyat éh kivu pekua' barei' sohoo' néh.
21Ka' ha' Yésus ngan redo inah, Ineu' sohoo' ko' neu' Ké', ha' néh.
Ha' redo inah mipa éh, Akeu' nyohoo' ke' hun Ko' tuai Raja' jian Ke' kejeraa' rawah anak ké' iteu' mokoo' ngan Ko', jah éh saa' na'au' Ko', jah éh saa' kabéng Ko', ha' néh.
22Ha' Yésus ngan néh kepéh, ka'au' ulak pané awah bé' ke' jam seruh, bé' ke' jam tong éh pengenyat ko' kenat. Kineu' koh, omok koh ngeretep pemung ngan ké' dalem pengeketa Ké', ha' néh.
Ha' rawah mipa éh, Omok mo dat, ha' roh.
23Ha' Yésus kepéh, Mu'un kawah omok pemung ngan ké' dalem pengeketa Ké', bang bé' Ku' omok bara' séé' éh tekep mokoo' saa' na'au' ngan saa' kabéng Ké' kenat, uban Tamen ké' éh lepah ngevéléé' irah éh tekep mokoo' kenat, ha' néh.
24Hun irah bakéh néh éh jah, éh jah poloo' usah nah, jam rawah menyat Tuhan kejeraa' roh mokoo' kenat, merek réh ngan roh. 25Boh Yésus tebai kekat réh béé tavin éh, ka' ha' néh ngan réh, Ka'ah jam irah éh pengeja'au pu'un penyukat bau irah éh lem nihau réh, ngan pu'un réh mihau réh ngan bau kenin. 26#Luk. 22:25-26 Bang bé' tekep éh pu'un kenat belah ka'ah iteu'. Séé'-séé' jin belah keh éh seruh juk ja'au, tekep éh ngerera' ngan mihau ka'ah barei' kelunan sohoo' awah. 27#Mat. 23:11, Mrk. 9:35, Luk. 22:26 Séé'-séé' jin belah keh éh keloo' tenah kenajung réh, tekep éh ngerera' ngan kivu sohoo' keh barei' kelunan ripen awah. 28Tekep keh maneu' kenat uban Anak Kelunan, bé' tuai dokoo' irah ngajung ngan ngeja'au éh, bang Iah tuai dokoo' Néh omok nolong kelunan ngan dokoo' Néh mena' urip Néh purip kelunan pinaa', ha' néh.
Tong Yésus peka'o duah kelunan peseu'
(Mrk. 10:46-52, Luk. 18:35-43)
29La'ah tovoo' Yésus lakau jin leboo' Yerikho, pinaa' kelunan kivu éh lakau nah. 30La'ah pu'un duah usah kelunan éh peseu' mokoo' déhéé' jalan irah pinaa' lapah nah, rawah menéng ha' réh bara' Yésus juk lapah sinah. Tioo rawah tebai éh ngan ja'au-ja'au ha', ka' ha' roh, O Anak Daud, ko' pika amo, ha' roh.
31La'ah irah pinaa' nah meta' roh, bé' buhaa' roh kahut. Bang bé' rawah kelem, jaa'-jaa' néh roh ja'au ha' kepéh, ka' ha' roh, O Anak Daud, ko' pika amo, ha' roh.
32Boh Yésus mokoo' ke' néh tebai roh, ka' ha' néh, Ineu' sohoo' koh neu' Ké', ha' néh.
33Ha' rawah mipa éh, O lakei' ja'au, jian ke' maneu' mo omok na'at, ha' roh.
34Yésus pika roh, iah mapai ojoo' néh tong maten roh, rawah tioo omok na'at, pelapah roh kivu Yésus.
Markert nå:
MATIUS 20: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
