MATIUS 17
17
Tong Yésus paléu layan da'in
(Mrk. 9:2-13, Luk. 9:28-36)
1Nem dau la'o inah Yésus mihin Péterus ngan rawah éh pepadéé', Yakub ngan Yohanes tai jah tokong éh bau. 2Tovoo' réh na'at éh sinah, Paléu layan da'in Yésus, mening éh barei' maten dau, ngan pakai néh mebéng ngilap. 3Boh réh teleu' bakéh néh na'at Musa ngan Elia pu'un pané ngan Yésus. 4Boh Péterus pané ngan Yésus, ka' ha' néh, O Tuhan, jian uban tam pu'un siteu', kineu' Ke', keloo' ke' mé' maneu' teleu' lamin pai siteu', jah anah ko', jah anah Musa, ngan jah anah Elia, ha' néh.
5 #
2 Ptr. 1:17-18
#Kej. 22:2, Ula. 18:15, Msm. 2:7, Yes. 42:1, Mat. 3:17, 12:18, Mrk. 1:11, Luk. 3:22 Tovoo' néh pané kenat pu'un jah avun éh mening lihep tong réh, ngan pu'un jah ha' éh nenéng réh jin avun inah, ka' ha' néh, Iteu' éh Anak Ké' éh kemurung Ké', payoo' mu'un kenin Ké' tong Néh, jian keh menéng ha' Néh. Kenat ha' jin lem avun inah.
6Hun irah bakéh Néh menéng ha' inah, medai mu'un-mu'un réh, kuba' réh tong tana'. 7Boh Yésus tai tavin réh ke' néh mapai ojoo' néh tong réh, ha' néh ngan réh, Mai keh medai, betéé' keh, ha' néh. 8Boh réh betéé' ngan bé' pu'un séé'-séé' lah ta'an réh sinah, bang Yésus nah awah to sinah ta'an réh.
9Hun réh rahoo' tokong Yésus pané ngan réh kepéh, ka' ha' néh, Mai keh bara' éh ta'an keh ri' da' avéé' Anak Kelunan betéé' kepéh jin patai, ha' néh.
10 #
Mal. 4:5
Boh irah bakéh néh neteng éh, Kineu' irah guru éh nebaraa' tong sohoo' lem Surat Musa bara' Elia juk tuai tenah, ha' réh.
11Ha' Yésus mipa réh, Adang Elia tuai tenah ke' néh petenup kekat jalan. 12#Mat. 11:14 Bang inah Akeu' bara' ngan keh, Pu'un Elia lepah avéé' tenéh, bang bé' réh jam éh, irah maneu' éh kivu kenin réh tengéé'. Barei' inah kepéh irah juk maneu' Anak Kelunan, ha' néh.
13Boh irah bakéh néh nesen Iah pu'un bara' tong Yohanes Batis.
Tong Yésus mega' balei' jin jah anak
(Mrk. 9:14-29, Luk. 9:37-43a)
14La'o Yésus ngan irah bakéh néh moléé' tavin irah pinaa' kepéh, tuai jah kelunan tavin Yésus ngan ngejekuu' lep néh tong jumen Néh. 15Ka' ha' néh ngan Yésus, O lakei' ja'au, pika anak ké', ngelayau iah tayen kuba' riet usah néh ngan ngebura' ujun néh. Jelua' koléé' iah kuba' lem luten, ngan jelua' koléé' lem baa'. 16Pu'un ku' mihin éh tavin bakéh ko' bang bé' réh omok mega' éh, ha' néh.
17Ha' Yésus mipa éh O ka'ah kelunan éh bé' ngelan ngan tawang! Kuraa' kelebéé la'ah Akeu mokoo' ngan keh? Kuraa' kelebéé la'ah Akeu' kebit kenin ngan keh? Jian keh mihin anak inah siteu', ha néh. 18Boh Yésus nyohoo' balei' nah pega' ngan pu'un éh tioo pega' jin anak inah, pelapah anak inah ma'o jin kesakit néh.
19Boh irah bakéh Yésus tuai tengéé' ke' réh neteng Yésus, ha' réh, Uban ineu' ke' améé' bé' pu'un penyukat mega' balei' nah, ha' réh.
20 #
Mat. 21:21, Mrk. 11:23 Ha' Yésus ngan réh, Uban keh kurang pengelan tong Allah. Akeu' bara' mu'un ngan keh, hun keh ngelan, na' péh pengelan keh si'ik awah barei' tulin buaa' kayeu' sesawi nah, omok keh bara' ngan tokong iteu', Piso ke' jin siteu', adang néh pu'un piso. Hun keh ngelan omok keh maneu' ineu'-ineu'. 21Bang tong balei' éh barei' balei' inah, bé' éh omok pega' bang neu' kelunan sebayang ngan kelaset awah, boh éh omok pega', ha' néh.
Tong Yésus bara' kepéh tong pematai néh
(Mrk. 9:30-32, Luk. 9:43b-45)
22Hun irah bakéh Yésus pu'un pemung kepéh tong tana' Galilia, ka' ha' Yésus ngan réh, Hun iteu' danii' mu'un jaka' kelunan juk mena' Anak Kelunan ngan irah éh maneu' éh, 23adang réh pu'un mematai éh, bang tong keteleu' dau, Tuhan pu'un pebetéé' éh kepéh jin patai néh, ha' néh.
Besau kenin irah bakéh néh menéng ha' néh kenat.
Tong sukai éh tekep nena' tong umaa' Allah
24 #
Kel. 30:13, 38:26 Hun Yésus ngan irah bakéh néh avéé' tong Kapernaum, kelunan éh alaa' sukai tuai tavin Péterus. Ka' ha' réh ngan néh, Kineu' guru ko', pu'un éh mena' sin barei' éh nena' uleu' Yahudi ke' réh petenup ineu'-ineu' éh juk penakai lu' tong Umaa' Allah, ha' réh.
25Ha' Péterus mipa réh, Oo' pu'un éh mena' éh, ha' néh.
Hun Péterus tai lem lamin boh Yésus neteng éh, ha' néh, Kineu' Simon, séé' éh tekep mena' sukai ngan irah raja' tong tana', kineu', irah éh tuai jin tana' éh jah, ha' néh.
26Ha' Péterus mipa éh, Tekep irah éh tuai jin tana' éh jah mena' éh, ha' néh.
La'ah ha' Yésus ngan néh, Hun néh kenat bé' tusah irah éh pohoo' tong tana' inah mena' éh. 27Bang dai lu' ngesa'at kenin irah, jian ke' tai baa' banget ngelesai. Seluang éh kuman lesai ko', inah ko' alaa', hun ko' na'at lem ujun néh pu'un sin lem ujun néh. Jian ke' alaa' sin inah ngan mena' éh ngan réh, inah sukup palaa' bayan sukai toh, ha' Yésus ngan Péterus.
Markert nå:
MATIUS 17: PNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
