METIU 3
3
Jo:n Baptismo Binckc Lutad Luyir
(Mark 1.1-8; Lu:k 3.1-18; Jo:n 1.19-28)
1Odo longckvdv:do Baptismo binc Jo:nbv, gvla Judiangkc yumra:do lugo:bito, 2“Mc:dvrra mcngkutsutoka, kapila:nc taycng amo:dc anindanka:bong.” 3Kapila:nc sc bv sc:kok agomcm agom lungorla lunc tani: Isaia:bv lutaganc,
“yumrangolo jc:la du:nc tani:kolok agomdc scmpc:
Ru:tumkc lambcm mopu:toka,
Bvk lambckvdv:dcm yvg cmmotoka.”
4Cdc Jo:nbv u:tgure:lok amvdcm gcdagai, okokkc bvk vgv:do suktam asvg atakko yc:sutagai; odokkc bvk donamdc kosoni: takomclang yumra:lok tangudai. 5Odo bvkkolo:pc Jerusalemdokkc odokkc Judia:dok appv: dokkc odokkc Jordan anindok dungo:ycgong appv:dokkc gva:to, 6Odokkc bulu bvkkolo Jordan a:ncdo av avkc pa:bkvdv:dcm lude:yamsuge:la baptismongcm la:to.
7Ckvdaggom bv ka:namc Parisi:kvdv: dokkcla: Sadduki: kvdv:dokkc bojcrungko baptismo langkapc gvdo, bv bulum luto, “Nolu airu:pc aima:nc tabv ope:yc! Sc:ko nolum a:pcnc bottcru:nc aglvngdokkc duggcdopc lutadno:ton? 8Mc:dvrra mcngkutsunamlok asinang gckampc gctoka, 9Odokkc nolu av avyv asinbo mc:suyoka, ‘Abrahambv ngoluk abbo dung;’ Kapila:nc ngo nolum lubidung, Ru:ncpvncbv sc vlvngkvdv:sokkcm Abrahamkcpc ommangcm lenmola:dag. 10Su:paksinci vsvng appvrkvdv:do vgv:dcm tvgabla lc:tung; ainc a:yc e:ma:nc vsvng appv:dcm cdcmpidag tc:tapdo odokkc vmvlo cra:lvgla rompakdo. 11‘Ngo nolum asin mc:dvrra mclatsukunam lcgangc baptismongcm bidung, cmpige:la sc:kobv ngok lcdupc gvmvndu:nc ngomyam tornam kaya:dag, sc:kokc panoti:ycm ngo jo:pci ainckomang; Bv nolum Angunnc Yalodokki odokkc vmvkokki baptismongcm biyc. 12Bvk kappunanc cpodc Bvk alakdo dung, odokkc Bv Bvk a:m yvkko lottadcm mopu:yc odokkc Bvk geu a:mkvdv:dcm kumsu:lo yarkumsuyc, cmpige:la amyangkvdv:dcm Bv cdvlosin momitla:ma:nam vmvlo romyc.’
Jisukc Baptismo
13Odo Jisubv Galildokkc gvla Jordanpc Jo:nkolo:pc gvto, bvkkokki baptismo la:pc cmna. 14Ckvdaggom Jo:nbv Bvm lutumto, scmpc lula, “Ngo nokkokki baptismo la:pcnammc, odokkc no ngokkolo:pc gvdolang?” 15Ckvdaggom Jisubv bvm lubito, “Scmpc su:pak imopo:tok; kapila:nc cdcmpc appvng dormo agercm ipvtgvpvtpcnamc.” Odo bv cdcmpc imoto. 16Odokkc Jisumc baptismo bitoncm, Bv asidokkc oddung daroptoku, odokkc ka:toka, taycngamo:tok yabgokvdv:dc moge:kang odokkc Ru:ncpvnckc Yalodc pckv pcttangkoncmpc dc:yi:dopc Bv ka:to odokkc Bvk avkc tayc:do dcnggabdopc ka:to; 17odokkc ka:tok, taycngamo:tokkc gomugko, scmpc lukang, “Sc ngok airu:pc aipc mc:nam Awwo, sckkolo ngo airu:pc mc:tv:sudoji.
Markert nå:
METIU 3: MISIBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
