IRPHUTNA 8
8
Tuilian irkai
1Khanchu Pathianin Nova le irkuanga thilhringhai ramsa le sahai, bokvâka irvâk murdihai kha irnghilhai maka, Pathianin irnêng chunga phâivua an zâptira, tui lianpa kha a’rkai thiai tâka, 2tui inthûk tak hnârhai le vân tukver khom a’rkhâra om kha, rotho irvân ata a chan tâk sikin, tuilian khom a’rkaia. 3Khanchu sûn sôm irzakhat le sûn sôm ringa a kâi zoiin chu tui a tôm ok tâka, 4khanchu irkuang kha a tha sarina sûn sôm hleisari nî tena chu, Ararat tânga irkuang a’rngam thei tâk a ni. 5Khan tui chu a tha sômna tena chu a hong tôm tâk sikin, a tha sômna sûn khat nî tena chu tâng sîp irzumhai an lang thei ta.
6Khan sûn sômminli a hek tena chu hiang hi a hong nia, Nova’n irkuang inkhâr a isiam kha an honga, 7vaâk inkhat an suaktira, irnênga tui a kang zoi mâka chu a vuang irvêl maia, 8khan tui a tôm le tômloi inhriatna hrangin vasu an suaktir nôka, 9khannisianlân vasute khan chuangna hrang ite a la hmu no sikin, irkuang tiang ngêt a hong kîr nôka, tui a la om pe sikin. Khanchu Nova’n a kut leh a hon pûra a chela irkuang sûnga a hruai lût nôka. 10Khan sûn sari dang a nghâk nôka, vasu kha irkuang ata an vuangtir nôka, 11vasu chu a vuangin khohloi tiang chu a hong kîr nôka; khan irngai ro, a hmûra khan Oliv hna tharte a hong sê khap pea, khanchu Nova’n tui a tôm tah ti an hriat thei ta. 12Khan sûn sari dang a nghâk zoiin chu vasu an vuangtir nôka, a kuang hong kîr nôk pe ta maka. 13Khan Nova kha kum 601 a ni kum, tha khat sûn khat nî tena chu irnênga tui a kang tâk sikin, Nova’n irkuang irkhûna puan a paia, a thîr vêla tui chu kangin rammual a’rlang ving ta. 14Khan tha hnina le sûn sôminhni sûn sari ni tena chu ite tui hmu hrang om viat ta maka.
15Khanchu Pathianin Nova kha, 16“Irkuang ata suak ta ro, nang le ni dôngma, ni nâihai le an dôngmahai khom hmunkhatin suak roi. 17Taksa nei murdi le thilhring ni iompuihai khom, sahai, ramsahai irnênga bokvâka fehai le vâhai khom hmunkhatin hruai suakhai vingin lân, irnênga hin nâilete nei intamin, irchi tamtak neia an hong pung theina hrangin,” tiin a hrila. 18Khanchu Nova kha a dôngma le a nâihai le a moinuhai an rêngin an suaka, 19sa tinrêng le thilhring murdi vahai irkuang ata an mâni irchi om dân ang takin an suak ta.
Nova’n Pathian kuang irbôlna an hlan
20Khan Nova’n Rengpa ta hrangin irbôlna maichâm a siama; khan sa irthiang murdi le vâ irthiang murdi laia mi a lâka; maichâma khan hâlirvôm irbôlna thil an hlana. 21Khan Rengpa’n, kha rimhoi kha an hriata, Rengpa’n a lungrîlin, “Irnêng chung hi chu mihriam sikin khuasâl ta no ninga, mihriam lungrîl ngaituana hi an chînte ata an sual sikin, atûna ki isoisak ang hin chu thilhring murdihai khom hi soisakhai ta no ning. 22Irnêng om sûng chu bu’nrît le bu âtin, kholum le khodâi, phalbi le kholum, sûn le zânhai, khom boi no ni,” a tia.
Markert nå:
IRPHUTNA 8: HRACLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
