Populære bibelvers fra ယူဝ်းႁၢၼ်ႇ 15

Del

ၵဝ်​ပဵၼ်​ၶိူဝ်း​မၢၵ်ႇ​ၸပိတ်ႈ​ဢေႃႈ။ သူ​ပဵၼ်​ၵိင်ႇ​မၼ်း​ၶႃႊ​မၼ်း​ဢေႃႈ။ ၽူႈ​လႂ်​သေ​ဢမ်ႇ​ဝႃႈ၊ ၵေႃႉ​ဢၼ်​တႄႇ​ယူႇ​ၵႃႈ​ၼႂ်း​ၵဝ်​လႄႈ​ၵဝ်​ၵေႃႈ​တႄႇ​ယူႇ​ၵႃႈ​ၼႂ်း​မၼ်း​ၼၼ်ႉ ၵေႃႉ​ၼၼ်ႉ​ၸၢင်ႈ​မၢၵ်ႇ​မၢၵ်ႇ​မၼ်း​ၼမ်​ၼႃႇ​ဢေႃႈ။ ပေႃး​သူ​ၽၢတ်ႇ​ယၢၼ်​ၵၼ်​တင်း​ၵဝ်​ၸိုင် သူ​ဢမ်ႇ​တၢတ်ႈ​ၼိူင်ႇ​လႆႈ​သေ​ၸိူဝ်ႉ​သေ​ပိူင်။

တႄႇ​ယူႇ​ၵႃႈ​ၼႂ်း​ၵဝ်​တႃႉ။ ၵဝ်​ၵေႃႈ​တၵ်း​တႄႇ​ယူႇ​ၵႃႈ​ၼႂ်း​သူ​ဢေႃႈ။ ၸိူဝ်ႉ​ၼင်ႇ​ဢၼ်​ပေႃး​ၵိင်ႇ​မၢၵ်ႇ​ၸပိတ်ႈ​ဢမ်ႇ​တႄႇ​ယူႇ​ၵႃႈ​ၼႂ်း​တူၼ်ႈ​မၼ်း​ၸိုင်၊ မၼ်း​ဢမ်ႇ​မၢၵ်ႇ​မၢၵ်ႇ​မၼ်း​လႆႈ​ၼၼ်ႉ၊ ပေႃး​သူ​ဢမ်ႇ​တႄႇ​ယူႇ​ၵႃႈ​ၼႂ်း​ၵဝ်​ၸိုင်၊ သူ​ဢမ်ႇ​မၢၵ်ႇ​မၢၵ်ႇ​လႆႈ။

ပေႃး​သူ​တႄႇ​ယူႇ​ၵႃႈ​ၼႂ်း​ၵဝ်​လႄႈ၊ ၵႂၢမ်း​ၵဝ်​ၼႆႉ​တႄႇ​ယူႇ​ၵႃႈ​ၼႂ်း​သူ​ၸိုင် ယွၼ်း​ၵႃႈ​ဢၼ်​သူ​ၶႂ်ႈ​ယွၼ်း တင်း​သဵင်ႈ​တင်း​လူင်​ၼၼ်ႉ​လႄႈ တၵ်း​လႆႈ​ဢေႃႈ။

သူ​လိူၵ်ႈ​ၵဵပ်း​ဢဝ်​ၵဝ်​ဢမ်ႇ​ၸႂ်ႈ။ ၵဝ်​လိူၵ်ႈ​ၵဵပ်း​ဢဝ်​သူ​လႄႈ ၶၢၼ်း​သူ​ဝႆႉ​ႁႂ်ႈ​သူ​လႆႈ​ၵႂႃႇ​လႄႈ​မၢၵ်ႇ​မၢၵ်ႇ ႁႂ်ႈ​မၢၵ်ႇ​သူ​ၸိူဝ်း​ၼၼ်ႉ​လႆႈ​မၼ်ႈ​ၶိူင်ႇ ႁႂ်ႈ​သူ​လႆႈ​ဢိင်​ပိုင်ႈ​ၼႃႇ​မႃႉ​ၸိုဝ်ႈ​သဵင်​ၵဝ်​သေ​လႄႈ လႆႈ​ၵႃႈ​ဢၼ်​ယွၼ်း​တီႈ​ပေႃႈ​ၸဝ်ႈ​တင်း​သဵင်ႈ​တင်း​လူင်​ၼၼ်ႉ​ဢေႃႈ။

မႅတ်ႈ​တႃႇ​ဢၼ်​ယဵင်ႈ​ၶႅၼ်း​ယႂ်ႇ​သေ​မႅတ်ႈ​တႃႇ တၢင်း​ဢၼ်​ၵူၼ်း​လႆႈ​ၸုၼ်ႉ ဢသၢၵ်ႈ​တူဝ်​ၸဝ်ႈ​ၵဝ်ႇ ပုၼ်ႈ​တၢင်​တူဝ်​ၵေႃႉ​သေႈ​တူဝ်​ၸဝ်ႈ​ၵဝ်ႇ​တင်း​လၢႆ​ၼၼ်ႉ ဢမ်ႇ​မီး​တီႈ​ၽူႈ​လႂ်​သေ​ၵေႃႉ​သေ​ၵူၼ်း။

ဢၼ်​ပဵၼ်​ၵိင်ႇ​ပဵၼ်​ၶႃႊ​တီႈ​ၵဝ်​ဢၼ်​ဢမ်ႇ​မၢၵ်ႇ​မၢၵ်ႇ​မၼ်း​ၵႃႈ​မီး​တင်း​သဵင်ႈ​တင်း​လူင်​ၼၼ်ႉ​ၸိုင်၊ မၼ်း​ၸဝ်ႈ​ၽၼ်း​ပႅတ်ႈ​ဢေႃႈ။ ဢၼ်​ပဵၼ်​ၵိင်ႇ​ပဵၼ်​ၶႃႊ ဢၼ်​မၢၵ်ႇ​မၢၵ်ႇ​မၼ်း​ၵႃႈ​မီး​တင်း​သဵင်ႈ​တင်း​လူင်​ၼၼ်ႉ​ၸိုင် မၼ်း​ၸဝ်ႈ​မႄး​ၽဵဝ်ႈ​ႁႂ်ႈ​မူတ်း​သႂ် ႁႂ်ႈ​ယဵင်ႈ​ၶႅၼ်း​လႆႈ​မၢၵ်ႇ​မၢၵ်ႇ​ထႅင်ႈ​ဢေႃႈ။

ဢၼ်​ၵဝ်​ပိင်း​ၺၢပ်ႈ​ၸမ်ႉ၊ ၸိူဝ်ႉ​ၼင်ႇ​ဢၼ်​ၵဝ်​ႁၵ်ႉ​သူ​ၼၼ်ႉ သူ​ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ​ႁၵ်ႉ​ၵၼ်​တႃႉ။

မုၼ်​ၽုင်း​ၸဝ်ႈ​ပေႃႈ​ၵဝ် ထၢင်ႇ​သႃး​မႃး​ၵွပ်ႈ​ပိူဝ်ႈ​ဢၼ်​သူ​မၢၵ်ႇ​မၢၵ်ႇ​ၼမ်​ၼႃႇ​ၼၼ်ႉ​လႄႈ၊ သူ​ၵေႃႈ​တၵ်း​ပဵၼ်​တပႄး​ၵဝ်​ဢေႃႈ။

ၵဝ်​ပဵၼ်​ၶိူဝ်း​မၢၵ်ႇ​ၸပိတ်ႈ​ဢၼ်​ၸိုဝ်ႈ​ဢၼ်​ၸႂ်ႈ​ဢေႃႈ။ ၸဝ်ႈ​ပေႃႈ​ၵဝ်​ၼၼ်ႉ​ၵေႃႈ ပဵၼ်​ၵေႃႉ​ဢၼ်​ပႂ်ႉ​သူၼ်​ဢူးယဵၼ်ႇ​ဢေႃႈ။

ၵေႃႉ​ဢၼ်​ဢမ်ႇ​တႄႇ​ယူႇ​ၵႃႈ​ၼႂ်း​ၵဝ်​ၼႆႉ​ၼၼ်ႉ လႆႈ​ၶၢမ်ႇ​တၢင်း​ဢၼ်​ထိမ်ႈ​ဢွၵ်ႇ​ပႅတ်ႈ​ၸိူဝ်ႉ​ၼင်ႇ​ၵိင်ႇ​ၼင်ႇ​ၶႃႊ​ၼၼ်ႉ​လႄႈ ႁဵဝ်ႇ​ႁႅင်ႈ​ၵႂႃႇ​ဢေႃႈ။ ၵိင်ႇ​ၶႃႊ​ၸိူဝ်ႉ​ၼင်ႇ​ၼၼ်​ၼၼ်ႉ​ၸိုင် ၵူၼ်း​ၵဵပ်း​သိမ်း​ဢဝ်​သႂ်ႇ​ၵႃႈ​ၼႂ်း​ၽႆး​လႄႈ လႆႈ​ၶၢမ်ႇ​တၢင်း​ဢၼ်​ၽႆး​မႆႈ​ဢေႃႈ။

ၼင်ႇ​ႁိုဝ်​လွင်ႈ​တၢင်း​ဢၼ်​သိူဝ်း​ပျေႃႇ​ၵဝ်​ၼႆႉ တၵ်း​မီး​ယူႇ​ၵႃႈ​ၼႂ်း​သူ​လႄႈ​သင်၊ ၼင်ႇ​ႁိုဝ်​လွင်ႈ​တၢင်း​ဢၼ်​သိူဝ်း​ပျေႃႇ​သူ​ၼၼ်ႉ​တၵ်း​ၸေး​ၸုမ်ႇ​လႄႈ​သင်၊ ၵဝ်​ႁေႃး​လၢတ်ႈ​ၵႂၢမ်း​ၼႆႉ​တီႈ​သူ​ဢေႃႈ။

ၸိူဝ်ႉ​ၼင်ႇ​ဢၼ်​ၵဝ်​ပႂ်ႉ​ၸွမ်း​ပိင်း​ၺၢပ်ႈ​ၸဝ်ႈ​ပေႃႈ​ၵဝ်​တင်း​လၢႆ​လႄႈ တႄႇ​ယူႇ​ၵႃႈ​ၼႂ်း​တၢင်း​ႁၵ်ႉ​မႅတ်ႈ​တႃႇ​မၼ်း​ၸဝ်ႈ​ယူႇ​ၼၼ်ႉ၊ ပေႃး​သူ​ပႂ်ႉ​ၸွမ်း​ပိင်း​ၺၢပ်ႈ​ၵဝ်​တင်း​လၢႆ​ၸိုင်၊ သူ​တၵ်း​တႄႇ​ယူႇ​ၵႃႈ​ၼႂ်း​တၢင်း​ႁၵ်ႉ​မႅတ်ႈ​တႃႇ​ၵဝ်​ဢေႃႈ။

လွင်ႈ​ၼင်ႇ​ႁိုဝ် သူ​ၵေႃႉ​ၼိုင်ႈ​လႄႈ​ၵေႃႉ​ၼိုင်ႈ တၵ်း​ႁၵ်ႉ​ၵၼ်​ၸိုင်၊ ၵဝ်​ပၼ်​ပိင်း​ၺၢပ်ႈ​ၸိူဝ်း​ၼႆႉ တီႈ​သူ​ဢေႃႈ။

ပေႃး​သူ​သိူၵ်ႈ​သမ်ႇ​ၵၼ်​တင်း​လေႃးၵႃႉ​ၸိုင်၊ လေႃးၵႃႉ​ၼႆႉ​တၵ်း​ႁၵ်ႉ​သူ​ၸိူဝ်း​ဢၼ် သိူၵ်ႈ​သမ်ႇ​ၵၼ်​တင်း​မၼ်း​ၼၼ်ႉ​ဢေႃႈ။ ပိူဝ်ႈ​ဢၼ်​သူ​ဢမ်ႇ​သိူၵ်ႈ​သမ်ႇ​ၵၼ်​တင်း​လေႃးၵႃႉ၊ ပဵၼ်​ၵေႃႉ​ဢၼ်​ၵဝ်​လိူၵ်ႈ​ၵဵပ်း​ဢဝ်​ၵႃႈ​ၼႂ်း​လေႃးၵႃႉ​ၼႆႉ​လႄႈ လေႃးၵႃႉ​ၼႆႉ​ၸင်း​သူ​ဢေႃႈ။