Populære bibelvers fra Jesaja 61

Del

Herren GUDS ande er over meg, for HERREN har salva meg. Han har sendt meg for å forkynna ein god bodskap for hjelpelause, for å forbinda dei som har eit knust hjarte, ropa ut fridom for dei som er i fangenskap, og frigjering for dei som er bundne, for å ropa ut eit nådens år frå HERREN og ein hemnens dag frå vår Gud, for å trøysta alle som sørgjer, og gje dei sørgjande i Sion turban i staden for oske, gledeolje i staden for sorg, lovsongsdrakt i staden for motlaus ånd. Dei skal kallast Rettferds eiketre som HERREN har planta for å syna sin herlegdom.

Før hadde de dobbel skam og vanære. No skal dei jubla over sin del. Difor skal dei ha dobbel arv i landet, evig glede skal dei få.

Eg gleder meg i HERREN, mi sjel jublar over min Gud. For han har kledd meg i frelsesklede og sveipt meg i rettferds kappe lik ein brudgom som set på seg presteleg turban, lik ei brur som pyntar seg med smykke.

Dei skal byggja opp att gamle ruinar og gjenreisa det som før låg audt, dei skal byggja opp att ruinbyane som låg aude frå slekt til slekt.

For som jorda lèt spirene veksa, som ein hage lèt frøa gro, så skal Herren GUD la rettferd og lovsong spira fram for alle folkeslag.

Men de skal kallast HERRENS prestar. Tenarar for vår Gud, skal de heita. De skal eta av rikdomen til folka og overta deira prakt.

For eg er HERREN, som elskar rett og hatar ran og urett. I truskap gjev eg dei løn og gjer ei evig pakt med dei.