तहाँ धर्मेसी बॊलतस येसुसिन नाद ती बिढ़्र'आ गे टोड़ंग तरा कड़हाबाचस। अरा आस चालीस उल्‍ला अरा माख़ा उपास नंजस। इदही ख़ॊख़ा आस गे कीड़ा लग्‍गिया।
आ बेड़ा नू नाद बिढ़'आ गे येसुसी गुसन बरचा ती बाचा, “नीन धर्मेसी ख़द्दय होले इब़डा पखनन ब'आ का इबड़ा ओन्ना-मॊख़ना मनो क'ओ।” लिकिन येसुस आनाकिर्ताचस, “मला, एन्‍देरगेका नेम्हा पुथी नू लिख्रकी र'ई,

‘आलस ओन्ना-मॊख़ना ती लेका मल उज्‍जोस,
लिकीन धर्मेसी बई ती उरखका उर्मी कत्‍था ती उज्‍जदस।’”

तहाँ नाद आसिन नेम्‍हा नगरे येरुसलॆम नू कड़हाबाचा ती धर्मेसी मन्दिर ही अग्‍गी नू इजताचा, अरा बाचा, “नीन धर्मेसी ख़द्दय होले नीन डेग'आ चि'आ, नेम्हा पुथी नू गा लिख्रकी र'ई,

‘आस निंग्‍है पत्त नू तंग्‍है पैकारिन आनोस का आर निंगन ख़ापोर
अरा आर निंगन ख़ेक्खच ख़ेक्खा चॊद'ओर हो'ओर,
होले एन्ने अम्‍बो मना का निंग्‍है ख़ेड्डेन पखना अम्‍बो लग्‍गा।’”

येसुस अदिन बाचस, “मला एन्‍देरगेका नेम्हा पुथी नू एन्ने हूँ लिख्रकी र'ई, ‘नीन निंग्‍है धर्मे उर्बासिन अमके बिढ़'आ।’”
तहाँ नाद येसुसिन नगदे मेच्‍छा परता नू कड़हाबाचा अरा ख़ॆख़ेल ता सौंसे राजी गुट्ठिन अरा अब़डा ही महबन ऎदा, अरा आसिन बाचा, “नीन ख़ेडमूली खत्र'ओय ती एंगन ऒड़ लग्‍गोय होले इब़डा उर्मिन निंगा चि'ओन।” ख़ने येसुस अदिन बाचस, “अनय सैतान कगरार'अय कलय! एन्‍देरगेका नेम्हा पुथी नू लिख्रकी र'ई,

‘नीन निंग्‍है धर्मे उर्बासिन ऒड़ लक्‍के
अरा आसी लेका महबा ननके।’”

ख़ने नाद आसिन अम्‍बिया ती केरा अरा मेर्ख़ा पैकर बरचर ती आसिन तेतर-सुसर नंजर।


येसुस यॊहनसी धरतारकन मेंजस ख़ने आस गलिलेया जिला किर्रिम बिच्चियस। अरा आस नासरेत पद्दा आबोन अम्‍बियस ती कफरनहूम नगरे नू र'आ हेलरस, एकदा जबुलॊन अरा नेफतलिम जिला ही समुदर ही पिं‍डी नू र'ई। होले धर्मेसी कत्‍था तिंगू यसायास बाचकाचस आद अब़डा मानिम मंजा।

“जबुलॊन अरा नेफतलिम देस नू,
समुदर डहरे नू, यरदन ख़ाड़ ही पक्‍खे नू,
गलिलेया नू बग्‍गे नन-यहूदीर,
पाप ही ऊख़ा नू र'ऊ आलर
नाड़रना ही ओन्‍टा कोहाँ बिल्‍ली ऎरोर।
अरा खे'अना ही एलचना नू अरा ऊख़ा राजी नू र'ऊ आलर मइय्याँ
रिझ्रना ही बिल्‍ली बिल्‍चो।”

आ बेड़ा ती येसुस तेंगा कुद्दा हेलरस, “जियन किर्त'आ एन्‍देरगेका धर्मेस आलर ही उज्‍जना नू राजी नन्ना ही बेड़ा हेद्दे अंड़सकी र'ई।”


येसुस गलिलेया समुदर ही पिं‍डी नू कुद्दा लगियस ख़ने, आस सिमॊन नॆ पतरस बारदस अरा आसी भइय्योस अन्‍द्रेयस ऎंड़ भईरिन समुदर नू जल्‍ली हेबड़ना ईरयस, आर गा केवँटर रहचर। आस आरिन बाचस, “एंग्‍है गने बरा, नीम एकासे इंजोन धर'आ लगदर अन्नेम ऎन निमन सिखाब'ओन आलारिन एकासे एंग्‍है चेला मना गे ओन्‍द्रना र'ई।” लॆम आर तम्‍है नलखन अम्‍बरकी आसी गने चॊंख़्रर।
असले मुन्‍द केरस ती आस नन्ना ऎंड़ भ‍ईर जेबदयु तंग्‍दस याकॊब अरा आसी भइय्योस यॊहनसिन ईरियस। आर तम्‍बस जेबदयु गने डोंगा नू तम्‍है जल्‍लिन तुन'आ लगियर। येसुस आरिन मीख़ियस। ख़ने आर लॆम डोंगन अरा तम्‍बासिन अम्‍बरकी येसुस गने चॊंख़्रर।


येसुस गोट्टा गलिलेया नू कुद्दा कुद्दा आर ही गोड़हा एड़पा गुट्ठी नू सिखाब'आलियस अरा मेर्ख़ा राजी ही पत्त ता दौ कत्‍था तेंगा कुद्दा लगियस, अरा उर्मी आलर ही रोगे अरा पयहा गुट्ठिन उजग'आ लगियस। येसुसी पत्त ता कत्‍था गोट्टा सीरिया राजी नू बीड़्रा। आलर मिरगी, लकवा दरा कैनो मदहे बेमार ती लिंड्रका रोगियारिन अरा नाद धरचका आलारिन येसुस गुसन ओन्‍द्र'आ लगियर। अरा आस आरिन उजग'आ लगियस। गलिलेया जिला, देकापोली, येरुसलॆम, यूदेया जिला दरा यरदन ख़ाड़ ही आ पक्‍खे ती बरचका ओन्टा कोहाँ गोंहड़ा येसुसी ख़ॊख़ा गुड़ियारा।

Hør på मत्तायोस 4