Exodo 7
7
1Nagtaram an Kagurangnan, “Gigibohon takang garo Dios sa atubang kan hade, asin an tugang mong si Aaron an magigin propeta mo. 2Isabi mo ki Aaron an gabos na ipinagboot ko saimo dangan siya na an masabi sa hade na tugotan an mga Israelita na humale sa saiyang daga. 3Alagad papatagason ko an puso kan hade tanganing maski dakul na makangingirhat na bagay an gibohon ko sa Egipto, dai siya madangog saimo. 4Dangan uunaton ko an sakong kamot tanganing padusahan nin makuri an bilog na Egipto asin hahaleon ko duman an mga Israelita na sakong banwaan. 5Sa paaging iyan mamimidbid kan Egipto na ako an Kagurangnan kun padusahan ko na sinda asin iluwas ko na sa saindang daga an mga Israelita.” 6Ginibo ni Moises asin ni Aaron an gabos na ipinagboot sainda nin Kagurangnan. 7Otsenta an edad ni Moises, asin otsenta y tres si Aaron kan makipag-olay sinda sa hade.
An Sugkod ni Aaron
8Nagtaram an Kagurangnan ki Moises asin ki Aaron, 9“Kun an hade magpagibo saindo nin ngangalasan bilang patotoo na sinugo ko kamo, sabihan mo si Aaron na itapok an saiyang sugkod sa atubang kan hade asin magigin halas an sugkod.” 10Kaya nagduman sinda sa hade dangan ginibo an ipinagboot nin Kagurangnan; itinapok ni Aaron an saiyang sugkod sa atubangan kan hade asin kan saiyang mga opisyal, asin nagin halas an sugkod. 11Dangan ipinaapod kan hade an mga tawong madodonong asin an mga salamangkero kan Egipto, na huli kan saindang tagong kadonongan naarog ninda an ginibo ni Aaron. 12Itinapok kan lambang saro sainda an saiyang sugkod asin nagin halas man an mga ini. Alagad hinalon kan sugkod ni Aaron an mga sugkod ninda. 13Maski siring, padagos na nagmatagas an hade, asin habong magdangog ki Moises dangan ki Aaron sosog sa itinaram nin Kagurangnan.
Nag-abot an mga Kapahamakan sa Egipto
Nagin Dugo an Tubig
14Dangan nagtaram an Kagurangnan ki Moises, “Matagas an puso kan hade asin habo niyang pahaleon an mga tawo. 15Kaya sa aga, makipaghilingan ka sa hade pagduman niya sa Salog nin Nilo. Darahon mo an sugkod na nagin halas asin halaton mo siya sa pangpang kan salog. 16Dangan sabihan mo an hade, ‘An Kagurangnan, an Dios kan mga Hebreyo, nagsugo sako tanganing sabihan ka na tugotan mong humale an saiyang banwaan tanganing magsamba saiya sa kalangtadan. Alagad sagkod ngunyan habo kang magtugot. 17Kaya ini an itinaram nin Kagurangnan tanganing maaraman mo kun siisay siya huli sa gigibohon niya. Hilinga, papakulon ko kan sugkod na ini an Salog nin Nilo asin an tubig magigin dugo. 18Magkakagaradan an mga sira asin mabata an salog, kaya an mga Egipcio dai makakainom kan tubig kaini.’”
19Nagtaram an Kagurangnan ki Moises, “Sabihan mo si Aaron na kuahon an saiyang sugkod asin unaton an saiyang kamot sa tangod kan katubigan kan Egipto, sa ibabaw kan saindang mga salog, kanal asin sapa. An tubig magigin dugo; magkakaigwa nin dugo sa bilog na daga sagkod sa mga tapayan asin batya.”
20Ginibo ni Moises asin ni Aaron an ipinagboot nin Kagurangnan. Sa atubang kan hade dangan kan saiyang mga opisyal, itinaas ni Aaron an saiyang sugkod saka pinakol an tubig kan Nilo, kaya an bilog na salog nagin dugo. 21Nagkagaradan an mga sira; buminata an salog mala ta an mga Egipcio dai nakainom kan tubig kaini. Nagkaigwa nin dugo sa bilog na daga nin Egipto. 22Alagad sa paagi kan saindang tagong kadonongan ginibo man kan mga salamangkero kan hade an ginibo ni Aaron kaya orog na nagmatagas an hade saka habong magdangog ki Moises asin ki Aaron sosog sa itinaram nin Kagurangnan. 23Binayaan niya sinda dangan nagpuli sa saiyang palasyo na garo mayong nangyari. 24Nagkaralot sa pangpang kan Salog nin Nilo an gabos na Egipcio tanganing may makuang tubig, huli ta dai ninda naiinom an tubig kan Salog nin Nilo.
25Pitong aldaw an uminagi pakatapos na pakolon nin Kagurangnan an salog.
Nu geselecteerd:
Exodo 7: MBBBIK92
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Marahay na Bareta Biblia © Philippine Bible Society, 1992.
