Exodo 5
5
Si Moises asin si Aaron sa Atubang kan Hade nin Egipto
1Pakatapos, nagduman si Moises asin si Aaron sa hade nin Egipto asin nagsabi, “Nagtaram an Kagurangnan, an Dios kan Israel, ‘Tugoteng humale an sakong banwaan tanganing magpyesta sinda sa kalangtadan sa pag-omaw sako.’”
2“Siisay an Kagurangnan na iyan?” an hapot kan hade. “Tano ta pagdangogon ko siya asin pahaleon ko an mga Israelita? Dai ko midbid an Kagurangnan, asin dai ko nanggad tutugotan na humale an mga Israelita.”
3Nagsimbag si Moises asin si Aaron, “Nagpahiling samo an Dios kan mga Hebreyo. Tugote kaming lumakaw nin tolong aldaw pasiring sa kalangtadan tanganing mag-atang sa Kagurangnan na samong Dios. Kun dai mi magibo iyan, tibaad gadanon niya kami sa paagi nin gera o nin helang.”
4Alagad sinabihan kan hade si Moises asin si Aaron, “Tano ta papaontokon nindo an mga tawo sa pagtrabaho? Balik kamo sa saindong mga gibo! 5Mas dakul pa kamong mga Israelita ki sa mga Egipcio, asin ngunyan boot nindong mag-ontok sa pagtrabaho!”
6Kan aldaw man sanang idto, nagboot an hade sa mga Egipciong parapamahala asin sa mga kapatas na Israelita, 7“Ontokon an pagtao nin dagami sa mga tawo. Poon ngunyan sinda na an maghanap kan mga dagaming gagamiton ninda sa paggibo nin ladrilyo. 8Alagad piriton nindo sindang maggibo kan dating bilang nin ladrilyo; mayong kulang maski saro. Hinuhugakan sana sindang magtrabaho kaya nakikimaherak sindang tugotan ko na mag-atang sa saindang Dios! 9Dagdagi nindo an saindang trabaho tanganing mayo sinda nin oras sa pagdangog nin mga kaputikan.”
10Naglakaw an mga parapamahala saka an mga kapatas asin nagsabi sa mga Israelita, “Nagtaram an hade na dai na niya kamo tatawan nin dagami. 11Nagsabi siya na kamo na an maghanap asin magkua nin dagami alagad an bilang kan gigibohon nindong ladrilyo siring sa dati.” 12Kaya nalibot kan mga tawo an bilog na Egipto sa paghanap nin dagami. 13Aroaldaw pinipirit sinda kan mga parapamahala na maggibo nin ladrilyo, siring sa nahahaman ninda kan tinatawan pa sinda nin dagami. 14Kun minakulang an mga ladrilyong nahahaman kan mga tawo, kinukulogan kan mga Egipciong parapamahala an mga kapatas na Israelita. Minahapot sinda, “Tano ta kulang sa bilang an ginibo nindong ladrilyo ngunyan?”
15Huli kaini nagduman sa hade an mga kapatas asin nagreklamo, “Tano ta arog kaini an ginigibo mo samo? 16Dai na ngani kami tinatawan nin dagami, alagad pinapagibo pa nin ladrilyo, asin ngunyan hinahampak pa kami maski an mga sadiri mong tawohan an may sala.”
17Nagsimbag an hade, “Mga hugakon! Habo sana kamong magtrabaho kaya nakikimaherak kamong tugotan ko na mag-atang sa Kagurangnan. 18Hala, balik kamo sa trabaho! Dai kamo tatawan nin dagami, alagad parehong bilang nin ladrilyo an gigibohon nindo.” 19Nahiling kan mga kapatas an masakit nindang kamugtakan kan sabihan sinda na dai nanggad pagpakulangan an ladrilyong gigibohon ninda aroaldaw.
20Pakahale kan mga kapatas sa atubang kan hade, nasabat ninda si Moises asin si Aaron na naghahalat sainda. 21Sinabihan ninda an duwa, “Nahiling nin Kagurangnan an ginibo nindo asin huhukoman niya kamo! Huli sa saindo, naanggot sa samo an hade asin an saiyang mga opisyal. Tinawan nindo sinda nin dahelan na gadanon kami.”
Nagreklamo si Moises sa Kagurangnan
22Dangan namibi giraray si Moises, “O Kagurangnan, tadaw ta pinapasakitan mo an saimong banwaan? Tano ta sinugo mo pa ako digdi? 23Huli ta poon na magdolok ako sa hade asin magtaram sa ngaran mo, pinapasakitan na niya an mga tawo. Alagad dai mo man lamang sinda tinabangan.”
Nu geselecteerd:
Exodo 5: MBBBIK92
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Marahay na Bareta Biblia © Philippine Bible Society, 1992.
