Génesis 1
1
1Ñim Lo'onatac 'Enauacna, co'ollaq cheta'ague da ỹo'otna, nache ỹo'ot na piguem qataq ana 'alhua. 2Qaq ana 'alhua saxanaqca co'ollaxa ca laỹamqa', nda'a't da auaxai maye ỹataqta qaỹoqchiguingui qataq napalñi, qaq so Saqcha'a La'añaxac Ñim Lo'onatac 'Enauacna coleetapeguelec na 'etaxat. 3Nache Ñim Lo'onatac 'Enauacna 'enapeco':
¡Huo'o ca yo'oqchiguiñi!
Nache ipacchigui da yo'oqchiguiñi. 4Qaq Ñim Lo'onatac 'Enauacna co'ollaq ila'a da 'onaxaic na yo'oqchiguiñi, nache iỹoteeguesop na napalaxa, 5nache na yo'oqchiguiñi le'enaxat naqa'en «na'a'q», qaq na napalaxa le'enaxat «pe». Qaq nvi' so pe, ime qataq anac so yo'oxoñi, qaq 'era da 'eetec so la'auaxanec na'a'q.
6Huaña nache Ñim Lo'onatac 'Enauacna, 'enapeco':
Huo'o ca pa'asheguem na'atchiguiñi npaxatta'aguet na 'etaxat, da yaqto' dos naua lpa'axaco. 7Nache Ñim Lo'onatac 'Enauacna ỹo'ot so pa'asheguem na'atchiguiñi maye iỹoracache na 'etaxat, nache huo'o na pa'atasheguem 'etaxat qataq huo'o na npa'atañi, 8nache se'eso pa'asheguem na'atchiguiñi le'enaxat naqa'en «piguem.» Qaq nvi' so pe, ime qataq anac so yo'oxoñi, qaq 'era da 'eetec so na'a'q dos.
9Nache Ñim Lo'onatac 'Enauacna 'enapeco':
Na npa'atañi 'etaxat huo'o ca laponqa', yaqto' huo'o ca lqaxaỹaxa.
Qaq 'era da 'eetec. 10Nache Ñim Lo'onatac 'Enauacna na lqaxaỹaxa le'enaxat naqa'en da «'alhua», qaq na laponqa' na 'etaxat le'enaxat naqa'en «auaxai.»
Qaq Ñimaye ila'a da 'enauac ỹaỹamaqchiguiñi. 11Nache Ñim Lo'onatac 'Enauacna 'enapeco':
Ñaxaalec 'enauac ana 'alhua ana ỹotta'a't huouepi, qataq ana huouepi maye huo'o ana ala, qataq ana qo'oipaqpi maye ỹotta'a't ana alapi.
Qaq 'era da 'eetec. 12Huaña nache na 'alhua ñaxaalec ana ỹotta'a't huouepi, qataq ana huouepi maye huo'o ana ala, qataq ana qo'oipaqpi maye huo'o ana ala. Nache Ñim Lo'onatac 'Enauacna ila'a da ỹaỹamaqchiguiñi. 13Qaq nvi' so pe, ime qataq anac so yo'oxoñi, qaq 'era da 'eetec so na'a'q tres.
14Nache Ñim Lo'onatac 'Enauacna, 'enapeco':
Huo'o aca 'eroiguipi na pa'asheguem na'atchiguiñi, nache ỹaqauga naqa'en na'a'q qataq pe, qataq ỹa'a'n naua laloxoqui' da nqoche'n naua na'axa'te qataq naua vi'iye. 15Qaq 'eroigui anamayepi na pa'asheguem maye na'atchiguiñi da yaqto' icoỹarelec ana 'alhua.
Qaq 'era da 'eetec. 16Ime, nache Ñim Lo'onatac 'Enauacna ỹo'o't naua dos ncoỹaraxanaqte: Aso late'erai icoỹarelec naqa'en na'a'q, qaq aso qapio'ole icoỹarelec pe. Nataqa'en ỹo'ot ana huaqaañipi. 17Nache Ñimaye ỹano'oto soua ncoỹaraxanaqte na piguem, da icoỹarelec naqa'en ana 'alhua, 18qaq ỹo'o't yaqto' ilo'ogue na'a'q qataq pe, da yaqto' na yo'oqchiguiñi iỹoteeguesop na napalaxa. Nache Ñim Lo'onatac 'Enauacna ila'a da ỹaỹamaqchiguiñi. 19Qaq nvi' so pe, ime qataq anac so yo'oxoñi, qaq 'era da 'eetec so na'a'q cuatro.
20Ime, nache Ñim Lo'onatac 'Enauacna 'enapeco':
Ñaxatoigui qome na 'etaxat 'enauac na ỹotta'a't 'etaxat le'ec, qataq nataqa'en qome na maỹo maye ishet da huaỹotapeguelec ana 'alhua. 21Nache Ñim Lo'onatac 'Enauacna ỹo'ot na lta'araic nỹaqpi, 'enauac na ỹotta'a't shiguiỹacpi maye lañaxataxaqui qataq huetangui na 'etaxat, qataq 'enauac na ỹotta'a't maỹopi. Nache Ñim Lo'onatac 'Enauacna ila'a da ỹaỹamaqchiguiñi. 22Nache ỹanem da no'on la'aqtac na shiguiỹacpi maye lo'onatac, 'eeta':
Ỹataqta qalota qome na qaỹa'alqui qataq qanlaxachiichigui ana auaxai, qataq ỹataqta qalota qome na maỹo ana 'alhua.
23Qaq nvi' so pe, ime qataq anac so yo'oxoñi, qaq 'era da 'eetec so na'a'q cinco.
24Nache Ñim Lo'onatac 'Enauacna, 'enapeco':
Ñaxaalec qome ana 'alhua 'enauac na ỹotta'a't shiguiỹacpi: Nlopi qataq na huauecpi, qataq nam ỹotta'a't hualectapigui'pi.
Qaq 'era da 'eetec. 25Nache Ñimaye ỹo'ot 'enauac ne'ena shiguiỹacpi, nlopi qataq na huauecpi, qataq nam ỹotta'a't hualectapigui'pi. Nache Ñim Lo'onatac 'Enauacna ila'a da ỹaỹamaqchiguiñi.
26Ime, nache Ñimaye 'enapeco': Nagui so'otaq ca shiỹaxaua, 'eeta'ama qomi'. Qataq huo'o da 'enec da ilo'ogue na nỹaq, maỹo, shiguiỹacpi, nlopi qataq na huauecpi, qataq nam hualectapigui'pi.
27Nache Ñim Lo'onatac 'Enauacna ỹo'ot so shiỹaxaua,
ỹe'enaxatchigui da maiche lataxac Ñimaye,
ỹo'o't soua ỹale qataq aso 'alo.
28Ime, qaq ỹanema da no'on la'aqtac, 'eeta':
«Ỹataqta qalota qome ca qaỹa'alquipi,
qanlaxacheetelec ana 'alhua qataq qauloỹeegue,
nataqa'en qauloỹeegue na nỹaq qataq na maỹo
qataq 'enauac na shiguiỹacpi maye hualectapigui'.»
29Ime, nache Ñim Lo'onatac 'Enauacna, 'enapeco':
«Hua', nagui qami' sanema 'enauac ana huouepi maye huo'o ana ala maye ñaxattalec ana 'alhua, qataq ana qo'oipaqpi maye huo'o ana ala. Qaq 'enauac anamaye qollequiitac. 30Qaq na shiguiỹacpi, qataq na hualectapigui'pi, qataq na maỹopi, qalaq 'enauac namayepi da sanem na 'auaqpi da chectac.»
Qaq 'era da 'eetec. 31Qaq co'ollaq imat Ñimaye 'enauac na lo'onatacpi, nache ila'a da ỹataqta ỹaỹamaqchiguiñi. Qaq nvi' so pe, ime qataq anac so yo'oxoñi, qaq 'era da 'eetec so na'a'q seis.
Nu geselecteerd:
Génesis 1: LÑLE13
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
