2 MULIYANA 8
8
Mayta li ir busat siɗiya; labara vi cat ta Sunamitta
1Elise di tam cata ta nam hot sukŋa hay goora va'ta ala: Fokag kulo'o, tuɗagu, naku hiɗi ziyna vagu, tuɗag musag ziy hay liy ma nak mina, kay Ma-Vatɗina ka hin mayt nig gaa kay nagata, mayt na'ta ma ɗawni ir busat siɗiya noŋo. 2Cata fokay kulo'o, na' li ki sana vi Lawna di ta' nala, na' kaliya, na' hiɗi ziyna va' kaw, na' mus ir busat siɗiya hay nagata vi sa Filistina. 3Hay li ma busata siɗiyat vatawa, cata hin nagata vi sa Filistina, na' hotiya, na' kalay tiy vun mulla kay ziyna va'a hiɗi sinena va'a. 4Hay na'ta kayni, mulla ka kus yoboy hiɗi Gehazi ma sunda vi sana vi Lawna. Mulla ka di talam ala: Nan siɗawaŋu kay naŋ ma van labara kay slen ma ŋulona ma Elise lum kafna. 5Hay li ma nam ka vul labara tam mulla kay sukka ta Elise hota' hay sa ma mitina, cata ta Elise hot sukka hay goora va'ta co tiy vun mulla kay ziyna va'a hiɗi sinena va'a. Gehazi di'e: Yo! mulla, mulanna, ca na'ta damni, goora va' ma Elise hot sukka hayamna damni lay. 6Mulla job cata, na' vum labar goy kafe. Bugol kayni mulla vula' sa ma patay kepe, nam ka dum ala: Cat damni slena va' naŋ ma yawa'ti goy kafe, hiɗi sle ma fum hay sinena va' kafna, tun caw hay buur ma na' kal goyn pa ta-ta wulini.
Hazayel kulo kay mulda vi Siriya
7Elise kalay hay Damas. Ben-Hadad mulla vi Siriya ay moyo; nisi ka dum ala sana vi Lawn ka coy tani. 8Mulla di tam Hazayel ala: Garaŋ vulda hay ɓaŋu, tuɗaŋ kir sana vi Lawna; dumu kay nam ma job Lawn ala: Nan as kay yer goy kay moyna van lebo yerɗi su? 9Hazayel kalay ŋaf ir Elise, nam gar vulda hay ɓalamu, sle ma ŋaa'a suwa kaf hay Damas, nam yaw jakŋa ir hob yam lamgan dok-fiɗi. Hay li ma nam co'o, nam tuɗ tam Elise, ka dum ala: Goora vaŋ Ben-Hadad mulla vi Siriya ganay taŋu kay jobaŋ ala: Nam as yer goy kay moyna valam lebo yerɗi su? 10Elise hotom dita ala: Tuɗaŋu, naŋ ma dum ala nam ma yer goyo, may Ma-Vatɗin ɗekan ala nam ma mita. 11Sana vi Lawna cuk iram kir Hazayel ŋiresl', nam mus ta-ta, bugol kayni nam tun caw tiya. 12Hazayel di'e: Mulanna, naŋ tiy kay mige? Elise hot dit ala: Kay mige nan wi joota ta naŋ ma la' tam gurona vi Israyel; naŋ ma tun kut kuɗ hoyok-ziyna visi ma donona, sumuna visi sa joriyona naŋ ma cisi goyo hiɗi kew-gaferaŋa, gurona visi sa gurayna naŋ ma kirapsi gaa'a, boyna visi sa hayna naŋ ma ɓetsi haysi goyo.
13Hazayel di'e: Nan gorvona vaŋ zawni, nan diyna zawni, sle ŋulon lakŋi nan lum ɗawn lita litige? Elise hot di'e: Ma-Vatɗin ɗekan ala naŋ ma muɗ mi mulla vi Siriya. 14Hazayel hin Elise, nam co kat mulamna. Mulamna ka jobom ala Elise daŋ anige? Nam hot dit ala: Nam dan ala naŋ ma muɗ ŋaa'a. 15Hay buurta ka'ta, Hazayel yaw borgona, nam cukum hay niyna, baram kulo hay vok mulla, mulla cap mita. Hazayel ti mulda hay baŋalamu.
Yoram mulla vi Yuda
2 Lml 21:5-20
16Hay busata vaslta vi Yoram, goora vi Akab mulla vi Israyel kayni, Yoram goora vi Yosafat mulla vi Yuda vurna hay mulda. 17Hay li ma nam muɗ mul kayni, busata valam dok-ɦidi yam ma'. Nam ti mulda hay Yerusalem ir busat glafandi. 18Nam poy hay hagata vi gurona vi Israyel, ki sum sa hay ziyna vi Akab nala, kay cata valam kayni ti goota vi Akab, nam li slen ma joo'o kir Ma-Vatɗina. 19May Ma-Vatɗina may min a ɓulak Yuda goyɗi kuɗ David ma sunda valamu, kuɗ dita-ŋaɓayta ta nam li'e kay vulum fitilla dok-dok jar gurona valamu.
20Hay liyna valam kayni, sum sa Edomna yaw kulo'o kat sa Yudana sa ka li gaŋeraŋ kisina, nisi tun mul kisi kay tuwsiya. 21Yoram kal hay Sayir, hiɗi keke-ma-duura valam kafe; nam fok kulo hay henjeta, nam kol kay sum sa Edomna sa ka ŋuyi talamu, ci sa ŋulona vi keke-ma-duura kaw, sumun mun jaŋi kay guɗukŋa visiya. 22Yawta-kulota vi sa Edomna kat gaŋeraŋa vi Yuda ka ta-ta vaydi. Hay na'ta kayn kaw sum sa hay Libna yaw kulo'o.
23Caw lopna vi Yoram ma hinina, hiɗi sle ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi gurona vi Yuda. 24Yoram miti kuɗ sumiyamu, nisi pum gaa kuɗ sumiyamu hay hoyok-ziyna vi David. Goora valam Ahasiya ti mulda hay baŋalamu may.
Ahasiya mulla vi Yuda
2 Lml 22:1-6
25Co hay busata doogo yam ma'ta vi Yoram goora vi Akab mulla vi Israyel kayni, Ahasiya goora vi Yoram, mulla vi Yuda, nam vurna hay mulda. 26Hay li ma Ahasiya muɗ mul kayni, busata valam coy dok-ma' yam ma'. Nam ti mulda hay Yerusalem ir busat kep. Sulum ya' Atali, goota vi Omri, mulla vi Israyel. 27Nam poy hay hagat ta Akab poy haya'ta, nam li slen ma joo'o kir Ma-Vatɗina, ki sum sa vo hay ziyna vi Akab nala, kay nam ka juni hiɗi sum sa vo hay ziyna vi Akabna kuɗ slita. 28Nam kalay hiɗi Yoram goora vi Akab, kay li duura hiɗi Hazayel mulla vi Siriya, kay li duura hay Ramot vi Galaad. Sum sa Siriyan ka tuw Yoram goy mili. 29Mulla Yoram hotay hay Yisreel cit milla ma sum sa Siriyan vulumta hay Rama, kayn hay li ma nam ka li duura hiɗi Hazayel mulla vi Siriya. Ahasiya goora vi Yoram mulla vi Yuda kalay hay Yisreel kay sar Yoram, goora vi Akab, kay moyna ma ka talamna.
Nu geselecteerd:
2 MULIYANA 8: Massana
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
BIBALDA TA PELDETTA © L'Alliance Biblique du Cameroun, 2001