MATEO 14

Wet Xwa ne rtxobnis

(Mr. 6:14-29; Lc. 9:7-9)

1Cheguin ke won Herodes ne rnebééy lo lyu ne la Galilea yra ne kalaa Jesus, 2lex re Herodes lo men ne rlaa dxiin lo Herodes:

―Xwa ne rtxobnis wa wban. Por neguin rap men poder rlaa men gyelmilaguer.

3Re Herodes zenga porke laa Herodes wkyeen mén wanëëz men Xwa, wliib men Xwa kon kaden; lex wguu men Xwa chegyiib. Wlaa Herodes yra neree por xdol Herodías xewnaa Blib bech Herodes. 4Porke ndal tir re Xwa lo Herodes:

―Ngyidet negwa ne rlaa de ne nuno de xewnaa bech de.

5Wlaan Herodes nket Herodes Xwa, per wdxe Herodes mén porke yrandxee mén nan ne te profet nak Xwa. 6Per chene wzaa Herodes iz, wa xsaap Herodías wya nzeb nes lo yra xemyooz Herodes; kesentyent wtseleedx Herodes zegne wya nzeb. 7Lex wgon Herodes Dëdyuzh ne sdee Herodes logne ynabtee nzeb. 8Orguin wzëët xnaa nzeb lo nzeb gan kox ynab nzeb, lex re nzeb lo Herodes:

―Guniiz xtoo Xwa ne rtxobnis lo noo kon te lengyaan.

9Ne won Herodes zenga, wdenles lextoo Herodes; per kom che wgon Herodes Dëdyuzh nes lo xemyooz Herodes, wap Herodes degne wkyeen Herodes men ne rlaa dxiin lo Herodes ne ydee men xtoo Xwa lo nzeb. 10Lex wxaal Herodes mén wa men watxuug men xtoo Xwa lenchegyiib. 11Wluzh nga wdxinneey men xtoo Xwa, nuu we te lengyaan, wdee meno lo nzeb, lex laa nzeb wdekwento lo xnaa nzeb.

12Zhich guin wa yra xpén Xwa weey men xkwerp Xwa, walugyeer meno. Wluzh nga waluu men diiz lo Jesus.

Wdee Jesus ne wu gaaymil mén

(Mr. 6:30-44; Lc. 9:10-17; Jn. 6:1-14)

13Chene won Jesus ne wket men Xwa, wruu Ne nga, wdee Ne lenbark za Ne te ledne yëtet mén. Per chene waknan méno, wruu men yra gyëz ne nak nes guin zanal men Ne nii men. 14Chene wruu Ne lenbark, wii Ne yra menroo menduxtee guin; lex wles lextoo Ne men, wneseyaken Ne yrandxee mengyiz ne zano men. 15Chene che rzëë, wbig yra xpén Ne lo Ne, re men:

―Chexke rzëë no ni te mén nuudet lugarree. Gugue lo yra ménree gya men chen tsa men yra gyëzwin ne nak guex nee yka men ne gu men.

16Orguin wke Jesus, re Jesus lo men:

―Yët neguin ne tsa men; laa de gudee ne gu men.

17Wke men re men lo Ne:

―Per nonchee gaay gyëtxtil no le txup mël neey noo nee.

18Orguin re Ne lo men:

―Gutano we nee.

19Lex wkyeen Ne wzob yra mén guin lo gyizh. Zhich guin wgoob Ne yra gaay gyëtxtil guin no le yrup mël guin, wkalo Ne gyeybaa, wdee Ne dexkyizhtee lo Dëdyuzh. Wluzh nga wla Ne yra gyëtxtil guin, wdee No lo yra xpén Ne, lex laa men wgyiizo lo yra mén guin. 20Wu men yrandxee men axtegue ne wyezaa men, no chene wluzh nga, wsezaa men chibtxup tsegwed yra gyëtxtilbla ne wrukaa. 21Yra mén guin ne wu, zeg gaaymil nak nonchee mgyeey, ngabdet no wnaa ni minwin.

Wzaa Jesus lo nis

(Mr. 6:45-52; Jn. 6:16-21)

22Zhich guin wkyeen Jesus yra xpén Ne wdee men lenbark chen sanergue men tekaa men stebkoo nis, myentras ne le Ne guli yra mén guin nëz. 23Wluzhse wguli Ne yra mén guin nëz, wyeep Ne te xtoo gyeey tete Ne chen ynab Ne lo Dëdyuzh. Chene wnit lyu, tete Ne zu nga. 24Le bark ne za yra xpén Ne chexke nat za we. Noze zere zerotee rlaa mëlo, porke nes lo we rasob mee. 25Ne zëdyenii lyu, za Jesus nes lo men rzaa Ne lo nis. 26Chene wii yra xpén Ne ne za Ne rzaa Ne lo nis, kesentyent wdxe men, wobtsadii men, re men:

―¡Te bis!

27Orguin wnii Jesus lo men, re Ne:

―¡Ydxedet de, nzholeedx gugak, noo nee!

28Lex wke Bëd, re Bëd:

―Dechey, belne laa de wa, gulaa ne saa noo lo nis chiid noo lo de.

29Orguin re Ne:

―Gutaa.

Lex wruu Bëd lenbark za Bëd nes lo Ne rzaa Bëd lo nis. 30Per chene wyenen Bëd ne kesentyent rlen mee, wdxe Bëd; kom le Bëd chexke zazebgyët, wkarëz Bëd, re Bëd:

―¡Dechey, guselaache noo!

31Orguin wzegaa Ne nya Ne wnëëz Ne nya Bëd, re Ne:

―¡Ake mén ne rlaleedxdet Dëdyuzh ydeblextoo! ¿Penak wgutxup lextoo de?

32Zhich guin chene wdee Ne lenbark yrup Ne Bëd, wyakchigue mee. 33Orguin wzuzhib yra xpén Ne ne wyan lenbark lo Ne, re men:

―¡Nli ne XPee Dëdyuzh nak de!

Wneseyaken Jesus yra mén ne rzhuun ne nuu nes Genesaret

(Mr. 6:53-56)

34Chene wdekaa Jesus stebkoo nis yra Ne xpén Ne, wdxiin Ne lo xelyu men-Genesaret. 35Chene wyenen yra mén ne nuu nga ne Jesus ne, wxoon men diiz ydendxee nes guin, lex wa mén wano men yra mengyiz lo Ne. 36No wnab men lo Ne ne ydee Ne si ytee nya men maske nonchee luzh xab Ne, no yrandxee mén ne wtee nya luzh xab Ne wyaken.

Nu geselecteerd:

MATEO 14: zpi

Markering

Deel

Kopiëren